ໃນວັນທີ 24 ມີຖຸນາ 2017 ຜ່ານມານີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ເດີນທາງເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງເຊກອງ ໂດຍມີ ທ່ານ ຄຳເຜີຍ ບຸດດາວຽງ ເຈົ້າແຂວງເຊກອງ, ພ້ອມດ້ວຍຮອງເຈົ້າແຂວງ, ຄະນະພັກ-ຄະນະນຳແຂວງ ແລະ ພະນັກງານທີ່ກ່ຽວຂ້ອງ ໃຫ້ການຕ້ອນຮັບອັນອົບອຸ່ນ.
ການຢ້ຽມຢາມ ຄັ້ງນີ້ ທ່ານ ຄຳເຜີຍ ບຸດດາວຽງ ເຈົ້າແຂວງເຊກອງ ໄດ້ລາຍງານໃຫ້ຊາບກ່ຽວກັບ ສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 6 ເດືອນ ຕົ້ນປີ 2017 ເຊີ່ງເຫັນວ່າ ແຊວງເຊກອງ ສຶບຕໍ່ສະຖານລະພາບທາງດ້ານການເມືອງ ຢ່າງຫນັກແຫນ້ນ, ສັງຄົມມີຄວາມທສະຫງົບສຸກ - ືມີຄວາມເປັນລະບຽບຮຽບຮ້ອຍ, ເສດຖະກິດ ມີການຂະຫຍາຍຕົວຢ່າງຕໍ່ເນື່ອງ ໃນລະດັບ 9,1 ສ່ວນຮ້ອຍ. ລວມຍອດຜະລິດຕະພັນ ຈີດີພີ ບັນລຸໄດ້ 1 ພັນ 500 ກວ່າຕື້ກີບ. ສະເລ່ຍລາຍຮັບ 13 ລ້ານກວ່າກີບຕໍ່ຄົນຕໍ່ປີ. ສາມາດເກັບລາຍຮັບເຂົ້າງົບປະມານໃນພູດຂອງແຂວງ ບັນລຸ 22,2 ກວ່າຈື້ກີບ, ເທົ່າກັບ 32,2 ສ່ວນຮ້ອຍ ຂອງແຜນການ.
ດ້ານການລົງທຶນທັງໝົດ ມີ 286 ໂຄງການ, ປະຕິບັດສຳເລັດ 100 ສ່ວນຮ້ອຍ ແມ່ນມີ 118 ໂຄງການ, ສຳລັບການປູກ-ການລ້ຽງ ແລະ ການຜະລິດກະສິກຳເປັນສິນຄ້າແມ່ນມີລັກສະນະຂະຫຍາຍຕົວຢ່າງກວ້າງຂວາງ ແລະ ເພີ່ມຂື້ນ. ດ້ານ ຈການພັດທະນາຊົນນະບົດ ແມ່ນມີຄາດຫມາຍສູ້ຊົນເຮັດໃຫ້ອັດຕາຄອບຄົວທຸກຍາກຫລຸດເຫລືອ 9 ສ່ວນຮ້ອຍ ໂດຍສຸມໃສ່ປະຕິບັດ 47 ແຜນງານໃຫຍ່ ທີ່ເປັນບູລິມະສິດ ຄື: ແຜນພັດທະນາຊົນນະບົດ ແລະ ແກ້ໄຂຄວາມທຸກຍາກ, ແຜນງານຍົກສະມັດຕະພາບ-ຄຸນນະພາບຂອງການຜະລິດ ຕິດພັນກັບການຜະລິດເປັນສິນຄ້າ, ແຜນງານສົ່ງເສີມ ແລະ ພັດທະນາການທ່ອງທ່ຽວ ແລະ ແຜນງານສຸດທ້າຍຄື: ແຜນງານປັບປຸງ ແລະ ພັດທະນາພື້ນຖານໂຄງລ່າງ ທີ່ຈຳເປັນ.
ໂອກາດ ນີ້, ທ່ານ ຮອງນາຍົກລັດຖະມົນຕີ ໄດ້ສະແດງຄວາມຍ້ອງຍໍ ຊົມເຊີຍ ຕໍ່ບັນດາຜົນງານທີ່ອຳນາດການປົກຄອງແຂວງເຊກອງ ແລະ ພໍ່ແມ່ປະຊາຊົນ ຍາດມາໄດ້ ໃນໄລຍະ ເຄີ່ງປີຜ່ານມາ, ທ່ານ ຮອງນາຍົກ ຍັງໄດ້ເນັ້ນເຕື່ມໃນບາງບັນຫາ ເຊັ່ນ: ການເອົາໃຈໃສ່ກ່ຽວກັບການເກັບລາຍຮັບເຂົ້າງົບປະມານໃຫ້ໄດ້ຄາດຫມາຍ ທີ່ສະພາແຫ່ງຊາດໄດ້ຮັບຮອງ, ກວດກາຕິດຕາມບັນດາລາຍຮັບຕົວຈິງ, ຄວາມໂປ່ງໃສ ແລະ ການຮົ່ວໄຫລຕ່າງໆ, ເອົາໃຈໃສ່ຊຸກຍູ້ການຜະລິດ ໃນລະດູຝົນ ການເອົາໃຈໃສ່ເຝົ້າລະວັງໄພພິບັດ ແລະ ການລະບາດຕາມລະດູການ ເພື່ອປ້ອງກັນຜົນກະທົບທີ່ເກີດຂື້ນ. ພ້ອມກັນນັ້ນຕ້ອງໄດ້ຄົ້ນຄວ້າຕື່ມ ດ້ານການພັດທະນາເສດຖະກິດ ມັງໃນຕົວເມືອງ ແລະ ຊົນນະບົດ, ບັນດາຮາກຖານທີ່ບົ່ມຊ້ອນ ແລະ ຕະຫລາດຮອງຮັບ ເພື່ອເປັນການຊຸກຍູ້ສົ່ງເສີມການຜະລິດສິນຄ້າໃຫ້ມີຄວາມເຂັ້ມແຂງ ສ້າງລາຍຮັບແກ່ປະຊາຊົນ ແລະ ສຸມໃສ່ການຈັດຕັ້ງປະຕິບັດເປົ້າຫມາຍການພັດທະນາແບບຍືນຍົງໃຫ້ປະກົດຜົນເປັນຈິງ.
Editor: ກຳປານາດ ລັດຖະເຮົ້າ
