ໂດຍປະຕິບັດຕາມຂໍ້ຕົກລົງຂອງທ່ານເຈົ້າແຂວງບໍລິຄຳໄຊ ສະບັບເລກທີ 253/ຂບຊ,ລົງວັນທີ 03 ເມສາ 2017 ວ່າດ້ວຍ ການອະນຸຍາດໃຫ້ ທ່ານ ອູ ສີຫາວົງ ຮັບສຳປະທານການກໍ່ສ້າງພັດທະນາຕະລາດປາກຊັນ ຢູ່ບ້ານໂພໄຊ, ເມືອງປາກຊັນ, ແຂວງບໍລິຄຳໄຊ, ກໍ່ຄືບໍລິສັດ ຜູ້ສຳປະທານ ທີ່ໄດ້ເຊັນບົດບັນທຶກຄວາມເຂົ້າໃຈ MOU ກັບພະແນກແຜນການ ແລະ ການລົງທຶນແຂວງໄນໄລຍະ 3 ເດືອນ ທີ່ຜ່ານມາ. ມາໃນຕອນເຊົ້າຂອງວັນທີ 23 ມິຖຸນາ 2017 ຜ່ານມາ ຢູ່ທີ່ຫ້ອງປະຊຸມພະແນກ ແຜນການ ແລະ ການລົງທຶນແຂວງ ບໍລິຄໍາໄຊ, ໄດ້ຈັດພິທີເຊັນສັນຍາ ການກໍ່ສ້າງ ແລະ ການບໍລິການຕະຫຼາດປາກຊັນແຫ່ງເກົ່າ ທີ່ຕັ້ງຢູ່ບ້ານໂພໄຊ, ເມືອງປາກຊັນ, ແຂວງບໍລິຄຳໄຊ ລະຫວ່າງ ທ່ານ ພອນພິລາດ ສິດສາທອນ ຫົວໜ້າພະແນກ ແຜນການ ແລະ ການລົງທຶນແຂວງ ບໍລິຄຳໄຊ ໃນນາມຕາງໜ້າຝ່າຍລັດ ແລະ ທ່ານ ອູ ສີຫາວົງ ໃນນາມຜູ້ລົງທຶນພັດທະນາຕະຫຼາດ ໂດຍຊ້ອງໜ້າທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີພະແນກການທີ່ກຽ່ວຂ້ອງຂັ້ນແຂວງ,ຂັ້ນເມືອງ ເຂົ້າຮ່ວມເປັນສັກຂີພິຍານ.
ເພື່ອແນ່ໃສ່ໃຫ້ການຈັດຕັ້ງປະຕິບັດໂຄງການດັ່ງກ່າວໄດ້ດຳເນີນໄປຢ່າງຖືກຕ້ອງຕາມລະບຽບ-ກົດໝາຍທີ່ວາງໄວ້ ໃຫ້ທ່ວງທັນຕາມກຳນົດເວລາ ແລະ ໃຫ້ຕະຫຼາດແຫ່ງດັ່ງກ່າວໄດ້ຮັບການພັດທະນາ ເປັນບ່ອນຈຳໜ່າຍສິນຄ້າຂອງປະຊາຊົນ, ກໍ່ຄືເປັນສະຖານທີ່ຊື້-ຂາຍ ທີ່ສະອາດງາມຕາ, ເປັນລະບຽບຮຽບຮ້ອຍ ແລະ ໄດ້ຮັບການປັບປຸງດີຂື້ນເປັນກ້າວໆ.
Editor: ກຳປານາດ ລັດຖະເຮົ້າ
