ແຂວງວຽງຈັນ ອະນຸຍາດໃຫ້ນັກລົງທຶນຈີນ ເຂົ້າປູກໄມ້ໃຫ້ໝາກແບບປະສົມປະສານຢູ່ເມືອງຫີນເຫີບ ເຊິ່ງຈະປູກໝາກມ່ວງ, ຫມາກລີ້ນຈີ່ ແລະ ຫມາກລຳໄຍ,ເຊິ່ງພິທີເຊັນສັນຍາເພື່ອອະນຸຍາດຢ່າງເປັນທາງການມີຂຶ້ນໃນ ຫນຶ່ງອາທິດທີ່ຜ່ານມາ ລະຫວ່າງ ທ່ານ ສຸກັນ ວິໄລຣັດ ຫົວໜ້າພະແນກ ແຜນການ-ການລົງທຶນ ແຂວງວຽງຈັນ ແລະ ທ່ານ ທາວ ຊິນຍີ ປະທານບໍລິສັດ ຊິນຮວງ ຕາວຕີງອີ້ ການຄ້າ ຈຳກັດ, ໂຄງການນີ້ມີມູນຄ່າການລົງທຶນ 1 ລ້ານໂດລາສະຫາລັດ. ເນື້ອໃນສຳຄັນຂອງສັນຍາລະບຸ ວ່າ: ໂຄງການປູກໄມ້ໃຫ້ໝາກແບບປະສົມປະສານ ເຊິ່ງປະກອບດ້ວຍການປູກໝາກມ່ວງ, ໝາກລີ້ນຈີ່ ແລະ ໝາກລຳໄຍ ເຊິ່ງຈະຈັດຕັ້ງປະຕິບັດຢູ່ບ້ານຄອນແກ້ວ ເມືອງເມືອງຫີນເຫີບ, ແຂວງວຽງຈັນ ໃນເນື້ອທີ່ 150 ເຮັກຕາ ໂດຍມີໄລຍະການສຳປະທານ 30 ປີ, ນັບແຕ່ມື້ເຊັນສັນຍາເປັນຕົ້ນໄປຫຼັງຈາກນັ້ນແມ່ນສົ່ງດິນດັ່ງກ່າວຄືນໃຫ້ລັດ.
ໂຄງການນີ້ເປັນໂຄງການປູກໄມ້ໃຫ້ໝາກແບບປະສົມປະສານ ໂດຍຈະນຳໃຊ້ເຕັກນິກວິທະນາສາດເຂົ້າໃນການຜະລິດ ບໍ່ນຳໃຊ້ເຄມີ ທີ່ເປັນອັນຕະລາຍຕໍ່ຜູ້ທຳການຜະລິດ, ຕໍ່ປະຊາຊົນບໍລິເວນໄກ້ຄຽງ ແລະ ໃນໂຄງການນີ້ຈະບໍ່ປູກໝາກກ້ວຍທີ່ໃຊ້ສານ ເຄມີ ເພື່ອຫວັງຜົນກຳໄລໃນໄລຍະສັ້ນເດັດຂາດ. ສ່ວນການປູກຕົວຈິງແມ່ນຈະເລີ່ມລົງມືໃນຕົ້ນລະດູຝົນປີໜ້າໃນຈຳນວນ 150 ເຮັກຕາ ນີ້ແມ່ນຈະປູກໝາກມ່ວງ 50 ສ່ວນຮ້ອຍ, ຂອງເນື້ອທີ່ ຄາດວ່າ 5 ປີ ຈະໄດ້ເກັບຜົນຜະລິດຂາຍ, 70 ສ່ວນຮ້ອຍແມ່ນສົ່ງໄປຈີນອີກ 30 ສ່ວນຮ້ອຍ ແມ່ນຂາຍພາຍໃນ, ດ້ານແຮງງານແມ່ນຈະນຳໃຊ້ປະຊາຊົນຢູ່ບ້ານຄອນແກ້ວ ແລະ ບ້ານໄກ້ຄຽງເຊິ່ງໂຄງການມີຄວາມຕ້ອງການແຮງງານຢ່າງໜ້ອຍ 50 ຄົນ ຂຶ້ນໄປ, ສ່ວນວິຊາກການແມ່ນນຳໃຊ້ຄົນຈີນ.
Editor: ກຳປານາດ ລັດຖະເຮົ້າ
