ກອງປະຊຸມປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງວຽງຈັນ ຊຸດທີ 1 ໃນມື້ທີ 2 ຂອງກອງປະຊຸມ ໄດ້ນຳເອົາບັນຫາການພັດທະນາເທສະບານຂອງແຂວງວຽງຈັນ ມາຄົ້ນຄ້ວາ ແລະ ພິຈາລະນາໂດຍເລັ່ງໃສ່ພັດທະນາໃຫ້ໄປຕາມແຜນຜັງທີ່ໄດ້ກຳນົດໄວ້ ແລະ ໃຫ້ເປັນຮູບປະທຳຫຼາຍຂຶ້ນ ແນໃສ່ໃຫ້ເປັນຕົວເມືອງທັນສະໄໝ ເປັນຕົວເມືອງທີ່ເປັນມິດກັບສິ່ງແວດລ້ອມ ທີ່ຍືນຍົງ ໂດຍສະເພາະແມ່ນເຂດໃຈກາງເທສະບານ.
ກອງປະຊຸມດັ່ງກ່າວໄດ້ຈັດຂຶ້ນໃນ ລະຫວ່າງ ວັນທີ 25-28 ມິຖຸນາ 2017 ນີ້ ຢູ່ທີ່ສະໂມສອນໃຫຍ່ຂອງແຂວງ, ໂດຍການເປັນປະທານຂອງ ທ່ານ ບຸນເພັງ ສາຍນໍລີດີ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ, ເປັນກຽດເຂົ້າຮ່ວມມີ ທ່ານ ວິດົງ ໄຊຍະສອນ ເລຂາພັກແຂວງເຈົ້າແຂວງໆວຽງຈັນ, ມີການນຳພັກລັດ, ສະມາຊິກສະພາແຫ່ງຊາດເຂດ10ແຂວງວຽງຈັນ, ສະມາຊິກສະພາປະຊາຊົນແຂວງ ແລະ ບັນດາພະແນກການຂອງແຂວງວຽງຈັນ ເຂົ້າຮ່ວມ.
ທ່ານ ຄຳແປງ ພັນດາລາ ຫົວໜ້າກອງເລຂາພັດທະນາເທສະບານແຂວງ ກ່າວໃນກອງປະຊຸມສະພາຄັ້ງນີ້ວ່າ: ການພັດທະນາເທສະບານຂອງແຂວງວຽງຈັນ ໃນເນື້ອທີ່ 750 ເຮັກຕາ ຕ້ອງຍຶດໝັ້ນຕາມມະຕິກອງປະຊຸມໄຫຍ່ຄັ້ງທີ 5 ຂອງອົງຄະນະພັກແຂວງວຽງຈັນທີ່ວ່າ: ພັດທະນາເທດສະບານແຂວງ ໃຫ້ໄປຕາມແຜນຜັງທີ່ກຳນົດໄວ້ ແລະ ໃຫ້ເປັນຮູບປະທຳຫຼາຍຂຶ້ນ ແນໃສ່ເຮັດໃຫ້ເປັນຕົວເມືອງທັນສະໄໝ, ເປັນໃຈການທາງດ້ານການເມືອງ-ການປົກຄອງ, ທາງດ້ານເສດຖະກິດ, ທາງດ້ານວັດທະນະທຳ ແລະ ສັງຄົມ. ທ່ານກ່າວຕື່ມອີກວ່າ: ໄດ້ສຳຫຼວດອອກແບບໃຈກາງເທສະບານແຂວງ ແລະ ສືກສາຄວາມເປັນໄປໄດ້ຕົວຈິງ 1,700 ເຮັກຕາ ແລະ ສຳຫຼວດອອກແບບລະອຽດ 750 ເຮັກຕາ ກວມເອົາ 5 ບ້ານເຊັ່ນ: ບ້ານໂພນໝີໃຕ້, ບ້ານໂນນສະຫວ່າງ, ບ້ານເວີນສານ, ບ້ານນາເຄືອ ແລະ ບ້ານນານິນ, ໃນໄລຍະຜ່ານມາເທດສະບານເຂດດັ່ງກ່າວ ໄດ້ຮັບການສຳເລັດປັກຫຼັກໝາຍເຂດແດນ, ສຳເລັດການກໍ່ສ້າງທາງຈຳນວນໜຶ່ງ ເພຶ່ອເປັນການອຳນວຍຄວາມສະດວກເຂົ້າສູ່ເທສະບານແຂວງເຊັ່ນ: ວົງວຽນໂພນໂຮງ, ໂພນໝີ, ເມືອງເກົ່າ, ທາງເບຕົງສາມແຍກໂພນໂຮງ, ໂພນໝີ, ທາງປູຢາງສາມແຍກໂພນໝີ ຫາ ພະແນກການເງິນ, ທາງເບຕົງປາກກະຍຸງ, ປາກແຈ້ງ, ປາກກະຍຸງ ຫາ ນາຊ້າງເຫຼັກ ແລະ ເສັ້ນທາງອື່ນໆ ກໍ່ໄດ້ຮັບການພັດທະນາ, ພ້ອມນີ້ຍັງໄດ້ແກ້ໄຂສິ່ງກີດຂວາງໃນໂຄງການພັດທະນາເທສະບານແຂວງແລ້ວ 187 ຫຼັງຄາເຮືອນ, ມູນຄ່າ 12 ຕື້ກວ່າກີບ, ມີດິນ 1.778 ຕອນ.
ນອກຈາກນັ້ນ ຍັງໄດ້ຍົກຍ້າຍ, ຮື້ຖອນເສົາໄຟຟ້າ, ສາຍໄຟຟ້າທາງ 4 ເສັ້ນມູນຄ່າ 19.780 ກີບ, ຍົກຍ້າຍ, ຮື້ຖອນທໍ່ສົ່ງ, ທໍ່ແຍກນ້ຳປະປາມູນຄ່າ 6.420 ກີບ, ຈັດສັນດິນໃຫ້ຜູ້ທີ່ໄດ້ຮັບຜົນກະທົບ ຈຳນວນ 283 ຕອນສຳເລັດແລ້ວ ແລະ ໄດ້ຈັດສັນດິນໃຫ້ພະນັກງານການນຳ, ພະນັກງານບຳນານ,ກຳລັງປ້ອງກັນຊາດ-ປ້ອງກັນຄວາມສະຫງົບ ໄດ້ 334 ຕອນ ຍັງບໍ່ສາມາດຈັດສັນໄດ້ 131 ຕອນ.
ຜູ້ແທນກອງປະຊຸມຍັງໄດ້ປະກອບຄຳຄິດຄຳເຫັນ ໃສ່ທິດທາງແຜນການພັດນາ ແລະ ກໍ່ສ້າງເທສະບານແຂວງ ໃນ 6 ເດືອນທ້າຍປີ 2017 ໃຫ້ໄປຕາມແຜນການ ແລະ ເກີດເປັນຮູບປະທຳຢ່າງແທ້ຈິງ.
Editor: ກຳປານາດ ລັດຖະເຮົ້າ
