ທ້າຍເດືອນມີຖຸນາ 2017 ນີ້ ທ່ານ ປະລີນຍາເອກ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍຄະນະ ໄດ້ລົງເຄື່ອນໄຫວ ຊຸກຍູ້ການຜະລິດອຸດສະຫະກຳ-ກະສິກຳ ຢູ່ເມືອງປາກກະດິງ. ໃນນັ້ນທ່ານໄດ້ລົງກວດກາ ເບິ່ງສະຖານທີ່ ທ່າເຮືອ ຂົນສົ່ງຫີນຜາ ຂອງ ບໍລິສັດ ລາວຈະເລີນ ຂາອອກ-ຂາເຂົ້າ ຂຸດຄົ້ນແຮ່ທາດ ຈຳກັດຜູ້ດຽວ. ຢູ່ບ້ານ ທ່າສະອາດ, ໃນນັ້ນ ທ່ານ ຈັນທະໝອມ ເທບອຸໄທ ປະທານບໍລິສັດ ໄດ້ລາຍງານວ່າ ບໍລິສັດໄດ້ສຳປະທານ ຂຸດຄົ້ນຫີນຜາຢູ່ບ້ານນາພົງ, ເມືອງປາກກະດິງ ໃນນັ້ນໄດ້ຜະລິດ,ຈຳໜ່າຍຫີນຄົບຫຼາຍຂະໜາດ -ຫຼາຍປະເພດ ຕາມການສັ່ງຈອງຂອງລູກຄ້າ, ທັງພາຍໃນ ແລະ ຕ່າງປະເທດ. ສຳລັບການສົ່ງອອກຕ່າງປະເທດນັ້ນ ແມ່ນຫີນທີ່ມີຂະໜາດບໍ່ເກີນ 25 ຊັງຕີແມັດ ຕາມການອະນຸຍາດຂອງແຂວງ. ນອກນັ້ນ ທາງບໍລິສັດມີຄວາມພ້ອມຕອບສະໜອງຫີນຄົບ ຫຼາຍປະເພດໃຫ້ແກ່ການກໍ່ສ້າງພື້ນຖານໂຄງລ່າງ ໂຄງການກໍ່ຕ່າງໆພາຍໃນແຂວງໃນຫລາຍໂຄງການ.
ຫລັງຈາກນັ້ນ ທ່ານ ເຈົ້າແຂວງ ຍັງໄດ້ລົງເບິ່ງສວນຢາງພາລາຂອງ ບໍລິສັດ ໂກເອັກໂກ ໃນນັ້ນ ທ່ານປະທານ ບໍລິສັດໄດ້ລາຍງານໃຫ້ຮູ້ວ່າ: ບໍລິສັດ ໄດ້ເລີ່ມປູກຢາງພາລາມາແຕ່ຕົ້ນປີ 2007 ໃນເນື້ອທີ່ສຳປະທານ 1.000 ເຮັກຕາ ແລະ ເລີ່ມປາດຢາງມາແຕ່ປີ 2015 ສາມາດເກັບນ້ຳຢາງໄດ້ປະມານ 1.500 ໂຕນຕໍ່ປີ, ຄົນງານມີ ເກືອບ 400 ຄົນ ແລະ 350 ຄົນແມ່ນຄົນລາວ ສ່ວນໃຫຍ່ແມ່ນປະຊາຊົນບ້ານທີ່ໄກ້ຄຽງ ການປາດຢາງແມ່ນແບບມອບ ເໜົາ 60 ຕໍ່ 40 ຂອງຜົນຜະລິດທັງໝົດ, ຄື: ຜູ້ຮັບປາດແມ່ນ 40 ແລະ ບໍລິສັດ 60,ຕະຫຼາດສົ່ງອອກແມ່ນຈຳໜ່າຍຢູ່ລາວ ໂດຍການຂາຍຢາງດິບ.
ໃນເວລາຕໍ່ມາ ທ່ານ ເຈົ້າແຂວງຍັງໄດ້ລົງໄປເບີ່ງການລຽ້ງໜູພັນຊີ້ນຂອງຄອບຄົວ ທ່ານ ໄມມີ ແກ້ວມີໄຊ ທີ່ບ້ານວຽງຄຳ ເຊີ່ງໄດ້ເລີ່ມລຽ້ງໝູພັນຊີ້ນ ມາໄດ້ 2 ປີແລ້ວ, ປີໜື່ງລຽ້ງ 3 ງວດ, ລຽ້ງງວດໜື່ງ 200-300 ໂຕ, ແນວພັນແມ່ນນໍາເຂົ້າຈາກປະເທດເພື່ອນບ້ານ ແລະ ຈາກຟາມແຂວງຄໍາມ່ວນ, ງວດໜື່ງສາມາດສ້າງລາຍໄດ້ 50-60 ລ້ານກີບ, ມີ 3 ແຮງງານພາຍໃນຄອບຄົວ. ການຈໍາໜ່າຍແມ່ນຂາຍໃຫ້ພໍ່ຄ້າຕາມຕະຫຼາດພາຍໃນແຂວງ. ຫລັງຈາກນັ້ນ ທ່ານ ເຈົ້າແຂວງຍັງໄດ້ລົງເບິ່ງການຜະລິດປັກດຳເຂົ້ານາປີ ຂອງປະຊາຊົນ ທີ່ບ້ານປາກກະດິງໃຕ້ ເມືອງປາກກະດິງ ລຽບຕາມແຄມແມ່ນໍ້ຂອງຕື່ມອີກ.
Editor: ກຳປານາດ ລັດຖະເຮົ້າ
