ກອງປະຊຸມດຳເນີນຊີວິດການເມືອງປັບປຸງ ປົວແປງພັກ ທົ່ວອົງຄະນະພັກເມືອງ ທ່າແຕງຂຶ້ນໃນວັນທີ 27 ມິຖຸນານີ້ ທີ່ສະໂມສອນເມືອງ ທ່າແຕງ ແຂວງ ເຊກອງ ໂດຍພາຍໃຕ້ການເປັນປະທານຂອງສະຫາຍ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ ທ່າແຕງ,ເປັນກຽດເຂົ້າຮ່ວມຂອງ ທ່ານ ສີດາ ສຸວັນນະສາຍ ຮອງເລຂາພັກແຂວງ ຮອງເຈົ້າແຂວງ ເຊກອງ,ມີບັນດາສະຫາຍໃນຄະນະປະຈຳພັກເມືອງ, ກຳມະການພັກເມືອງ, ຫົວໜ້າ-ຮອງຫ້ອງການ, ເລຂາຄະນະພັກຮາກຖານ,ໜ່ວຍພັກ, ສະມາຊິກພັກທົ່ວອົງຄະນະພັກເມືອງເຂົ້າຮ່ວມ.
ທ່ານ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ ກ່າວວ່າ: ກອງປະຊຸມຄັ້ງນີ້ເປັນກອງປະຊຸມທີ່ສຳຄັນ ແລະ ມີຄວາມໝາຍເລິກເຊິ່ງ, ພວກເຮົາຈະໄດ້ພ້ອມກັນຮັບຟັງ ແລະ ປະກອບຄຳເຫັນໃສ່ເນື້ອໃນເອກະສານສຳຄັນຕ່າງໆ ອັນທີໜຶ່ງຮັບຟັງການເຜີຍແຜ່ຄຳສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 1 ກຸມພາ 2017 ວ່າດ້ວຍການດຳເນີນ ຊີວິດການເມືອງປັບປຸງປົວແປງທົ່ວພັກປະຈຳປີ 2017, ອັນທີສອງ ແມ່ນຈະໄດ້ຮັບຟັງແຜນການຈັດຕັ້ງດຳເນີນ ຊີວິດການເມືອງປັບປຸງປົວ ແປງທົ່ວພັກປະຈຳປີ 2017, ສະບັບລົງວັນທີ 2 ກຸມພາ 2017 ຂອງຄະນະຮັບຜິດຊອບ ດຳເນີນຊີວິດການເມືອງປັບປຸງ ປົວແປງທົ່ວພັກ. ພ້ອມນັ້ນ ຮັບຟັງການເຜີຍແຜ່ຄຳແນະນຳເພີ່ມເຕີມຂອງ ຄະນະຮັບຜິດຊອບ ການດຳເນີນຊີວິດການເມືອງປັບປຸງປົວແປງພັກປະຈຳປີ 2017, ສະບັບລົງວັນທີ 16 ພຶດສະພາ 2017, ອັນທີສາມ ຈະໄດ້ເຊື່ອມຊຶມບັນດາເອກະສານເດັດດ່ຽວປັບປຸງປົວແປງ ພັກໃຫ້ປອດໃສເຂັ້ມແຂງ ແລະ ໜັກແໜ້ນ, ອັນທີສີ່ແມ່ນຈະໄດ້ ຮັບຟັງ ແລະ ປະກອບຄວາມ ເຫັນໃສ່ຮ່າງບົດສະຫຼຸຸບຕີລາຄາຄວາມຮັບຜິດຊອບລວມ ຂອງຄະນະພັກໃນການຈັດຕັ້ງ ປະຕິບັດມະຕິກອງປະຊຸມໃຫຍ່ ຄັ້ງທີ 5 ຂອງອົງຄະນະພັກເມືອງທ່າແຕງ ແລະ ມະຕິກອງປະຊຸມໃຫຍ່ຄັ້ງທີ 10 ຂອງພັກ, ອັນທີຫ້າ ແມ່ນຈະໄດ້ພ້ອມກັນ ທາບທາມລົງຄະແນນສຽງ ຄວາມເຊື່ອໝັ້ນໄວ້ວາງໃຈຕໍ່ຄະນະພັກເມືອງ, ຄະນະນຳແຕ່ລະຂັ້ນການນໍາ, ສຳລັບຄະນະພັກເມືອງ ຍັງຈະໄດ້ລົງຄະແນນສຽງທາບທາມຄວາມເຊື່ອໝັ້ນໄວ້ວາງໃຈຕໍ່ບຸກຄະລາກອນໃນຄະນະ. ເພື່ອເຮັດໃຫ້ກອງປະຊຸມດຳເນີນໄປຕາມລະດັບຄາດໝາຍ ທີ່ໄດ້ກ່າວມານັ້ນ ນອກນັ້ນ ທ່ານ ຄໍາສອນ ກອນເຍີ ໄດ້ຮຽກຮ້ອງມາຍັງສະມາຊິກພັກທັງໝົດ ຈົ່ງເພີ່ມທະວີສຶກສາອົບຮົມການເມືອງ-ແນວຄິດ, ຍົກສູງຄວາມຮັບຜິດຊອບທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ປັບປຸງແບບແຜນວິທີນຳພາ, ວິທີເຮັດວຽກຂອງຄະນະພັກ, ແບບແຜນດຳລົງຊີວິດພະນັກງານນຳພາ-ຄຸ້ມຄອງຕໍ່ການປະຕິບັດໜ້າທີ່ການເມືອງໃຫ້ໜັກແໜ້ນແລະເຂັ້ມແຂງຂຶ້ນກວ່າເກົ່າ.
Editor: ກຳປານາດ ລັດຖະເຮົ້າ
