ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໃຫ້ທິດນໍາພະນັກງານການນໍາພັກ-ລັດ 28 ທ່ານ ທີ່ສໍາເລັດ ຊຸດບຳລຸງວຽກງານ ປກຊ-ປກສ ຊຸດທີ XIII ໃຫ້ເອົາໃຈໃສ່ ການປະຕິບັດໜ້າທີ່ວຽກງານຂອງຕົນ ດ້ວຍຄວາມມີສະຕິ, ຄວາມຮັບຜິດຊອບ ໃນການຊີ້ນຳ-ນຳພາ ຂົງເຂດວຽກງານທີ່ຕົນຢ່າງໜັກແໜ້ນ ເພື່ອປະກອບການສ່ວນເຂົ້າໃນ ພາລະກິດປົກປັກຮັກສາ ແລະ ການສ້າງພັດສ້າງສາພັດທະນາ ໃນໄລຍະໃໝ່ ສິ່ງສໍາຄັນທີ່ສຸດນັ້ນ ຕ້ອງໄດ້ສ້າງຄວາມໂປ່ງໃສ, ຄວາມຊື່ສັດ, ຄວາມບໍລິສຸດ ຂອງພະນັກງານ-ນັກຮົບພວກເຮົາ ແລະ ເປັນແບບຢ່າງທີ່ດີ ໃຫ້ແກ່ປະຊາຊົນ.
ໃນວັນທີ 27 ມິຖຸນາ ທີ່ຜ່ານມານີ້ ວິທະຍາຄານປ້ອງກັນຊາດ ໄກສອນ ພົມວິຫານ ໄດ້ຈັດພິທີປິດຊຸດບໍາລຸງວຽກງານ ປກຊ-ປກສ ຊຸດທີ XIII ໃຫ້ແກ່ພະນັກງານການນຳ ພັກ-ລັດ ຈຳນວນ 28 ທ່ານ ພາຍຫລັງມາເປັນເວລາ 2 ເດືອນ ໂດຍເປັນກຽດເຂົ້າຮ່ວມ ແລະ ໂອ້ລົມ ຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ມີບັນດາຜູ້ຕາງໜ້າຈາກ ສູນກາງພັກ ແລະ ລັດຖະບານ, ຈາກກອງກຳລັງປ້ອງກັນຊາດ-ປ້ອງກັນຄວາມສະຫງົບ ພ້ອມດ້ວຍບັນດາ ຄະນະພັກ-ຄະນະນຳ, ຄູ-ອາຈານ ພາຍໃນວິທະຍາຄານ ປ້ອງກັນຊາດ ໄກສອນ ພົມວິຫານ ແລະ ນັກສຶກສາການນຳ ພັກ-ລັດ ເຂົ້າຮ່ວມ.
ໃນພິທີດັ່ງກ່າວ ໄດ້ມີການສະເໜີ ບັນດາເອກະສານ, ຮັບຟັງການປາຖະກະຖາ, ການສົນທະນາ, ຂຽນບົດເກັບກ່ຽວ ແລະ ຈັດຕັ້ງຖອດຖອນ ບົດຮຽນຮ່ວມກັນ ລະຫວ່າງ ພະນັກງານການນຳ ກັບ ຄະນະບັນຊາວິທະຍາຄານ ແລະ ຄູ-ອາ ຈານ ເຫັນໄດ້ ວ່າ: ພະນັກງານການນຳແຕ່ລະທ່ານ ໄດ້ຮັບການປະກອບຄວາມຮັບຮູ້ອັນໃໝ່ ທາງດ້ານຫລັກມູນພື້ນຖານ, ທິດສະດີວິທະຍາສາດ ໃນການປ້ອງກັນຊາດ-ປ້ອງກັນຄວາມສະຫງົບ ໄລຍະ ໃໝ່ ເພີ່ມຂຶ້ນຕື່ມອີກບາດກ້າວໜຶ່ງ ເປັນຕົ້ນ ດ້ານຄວາມຮູ້ພື້ນຖານ ຕໍ່ກັບວຽກງານ ປກຊ-ປກສ, ດ້ານຄວາມຮັບຮູ້ ໃນຂົງເຂດຍຸດທະສາດປ້ອງກັນຊາດ, ດ້ານຍຸດທະສາດການທະຫານ. ພ້ອມນັ້ນ, ຍັງໄດ້ຮັບຮູ້ເຖິງການເສີມຂະຫຍາຍພາລະບົດບາດ, ໜ້າທີ່ເປັນເສນາທິການດ້ານວຽກງານ ປກຊ-ປກສ ໃຫ້ແກ່ ພັກ-ລັດຖະບານ ແລະ ທ້ອງຖິ່ນ, ບັນຫາລວມໃນການຊີ້ນຳບັນຊາກຳລັງ ປກຊ-ປກສ ໃນຂົງເຂດຄວາມຮັບຜິດຊອບຂອງຕົນ ແລະ ໄປທັດສະນະສຶກສາຕົວຈິງ ຢູ່ບາງກົມກອງກຳລັງຫຼວງ ຈຳນວນໜຶ່ງ.
ໂອກາດນີ້, ທ່ານນາຍົກລັດຖະມົນຕີ ກໍໄດ້ສະແດງຄວາມຊົມເຊີຍ ຕໍ່ຜົນສໍາເລັດ ແລະ ໄດ້ໃຫ້ທິດຊີ້ນໍາພະນັກງານການນໍາຄັ້ງນີ້ ວ່ານີ້ເປັນການປະກອບ ອົງຄວາມຮູ້ອັນໜຶ່ງ ໃຫ້ແກ່ການປະຕິບັດ ໜ້າທີ່ວຽກງານຂອງຕົນ ດ້ວຍຄວາມມີສະຕິ, ຄວາມຮັບຜິດຊອບ ໃນການຊີ້ນຳ-ນຳພາ ຂົງເຂດວຽກງານທີ່ຕົນຮັບຜິດຊອບ ແລະ ສິ່ງທີ່ຂາດບໍ່ໄດ້ ກໍ່ແມ່ນຄວາມຮູ້ທາງດ້ານແນວທາງນະໂຍບາຍຂອງພັກ, ດ້ານທິດສະດີປະຕິວັດ, ທິດສະດີມາກ-ເລນິນ, ແນວຄິດ ໄກສອນ ພົມວິຫານ ແລະ ທິດສະດີກ່ຽວກັບການ ປ້ອງກັນຊາດ-ປ້ອງກັນຄວາມສະຫງົບ. ພ້ອມນີ້, ທ່ານຍັງໄດ້ຍົກໃຫ້ເຫັນ ທິດທາງລວມໃນການເຮັດວຽກງານ ປກຊ-ປກສ ຕິດພັນກັບວຽກງານພັດທະນາ ເສດຖະກິດ-ສັງຄົມ ແລະ ວຽກງານການຕ່າງປະເທດ ນັບຕັ້ງແຕ່ອະດີດ ຈົນເຖິງປະຈຸບັນ ແລະ ທິດທາງແນວທ່າອ່ຽງ ໃນອະນາຄົດ. ໃນຕອນທ້າຍ, ທ່ານ ທອງລຸນ ສີສຸລິດ ຍັງໄດ້ເນັ້ນໃຫ້ພະນັກງານ ແລະ ກອງກຳລັງ ປກຊ-ປກສ ທຸກຄົນ ຕ້ອງໄດ້ເຮັດວຽກຢ່າງມີສະຕິ, ມີຈິດໃຈບຸກບືນ ແລະ ມີນ້ຳໃຈ-ມີມາດຕະການປະຢັດ-ທ່ຽງທໍາ ຈະເຮັດໄດ້ຄືແນວນັ້ນ, ພວກເຮົາຕ້ອງໄດ້ສ້າງຄວາມໂປ່ງໃສ, ຄວາມຊື່ສັດ, ຄວາມບໍລິສຸດ ຂອງພະນັກງານ-ນັກຮົບພວກເຮົາ ແລະ ເປັນແບບຢ່າງທີ່ດີ ໃຫ້ແກ່ປະຊາຊົນ.
ຂອບໃຈຂໍ້ມູນຈາກ ລາຍການກອງທັບ ປະຊາຊົນລາວ

Editor: ດາວໄຊ ສີວິໄລ