ໃນວັນທີ 29 ມິຖຸນາ - 10 ກໍລະກົດ 2017 ນີ້ ແຂວງວຽງຈັນ ໄດ້ເປີດກອງປະຊຸມດຳເນີນຊີວິດການເມືອງ ປັບປຸງປົວແປງທົ່ວອົງຄະນະພັກແຂວງວຽງຈັນ ຂຶ້ນຢ່າງເປັນທາງການ ໂດຍການເປັນກຽດເຂົ້າຮ່ວມຂອງ ທ່ານ ຈັນສີ ໂພສີຄຳ ກົມການເມືອງສູນກາງພັກ, ຫົວໜ້າຄະນະຈັດຕັ້ງສູນກາງພັກ, ທັງເປັນຄະນະຮັບຜິດຊອບບັ້ນດຳເນີນຊີວິດການເມືອງ ປັບປຸງປົວແປງພັກຂັ້ນສູນກາງ, ມີບັນດາສະຫາຍໃນຄະນະບໍລິຫານງານພັກແຂວງວຽງຈັນ ເຂົ້າຮ່ວມຢ່າງພ້ອມພຽງ.
ທ່ານ ສີດາລໍ່ ຈົ່ງເຕັ່ງເຈ້ຍຊ້າ ຮອງເລຂາຄະນະບໍລິຫານງານພັກແຂວງວຽງຈັນ ໄດ້ສະຫຼຸບລາຍງານການຈັດ ຕັ້ງປະຕິບັດວຽກງານຮອບດ້ານຂອງຄະນະບໍລຫານງານພັກແຂວງວຽງຈັນໃນໄລຍະ1ປີກວ່າຜ່ານມາ ເຊິ່ງຄະນະພັກແຕ່ລະຂັ້ນໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ແກ່ສະມາຊິກພັກ,ພະນັກງານ, ທະຫານ, ຕຳຫຼວດ ແລະ ປະຊາຊົນບັນດາເຜົ່າ ຢ່າງຕໍ່ເນື່ອງ,ເປັນເຈົ້າການເຂົ້າຮ່ວມແກ້ໄຂຄວາມບໍ່ສະຫງົບ 3 ແຂວງໃຈກາງ, ເສັ້ນທາງເລກທີ 13 ເໜືອ, ເມືອງກາສີ-ເມືອງນານ ເຊິ່ງສາມາດເຮັດໃຫ້ທົ່ວແຂວງ ມີສະຖຽນລະພາບທາງດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ. ຄະນະພັກແຕ່ ລະຂັ້ນໄດ້ເອົາໃຈໃສ່ຊີ້ນຳ-ນຳພາແຕ່ລະຂະແໜງການ, ເຮັດໃຫ້ເສດຖະກິດຂອງແຂວງຂະຫຍາຍຕົວຢ່າງຕໍ່ເນື່ອງ ດ້ວຍຈັງຫວະທີ່ໜັກແໜ້ນ, ຍືນຍົງ ແລະ ໝັ້ນທ່ຽງ ສະເລ່ຍ 8,17 ສ່ວນຮ້ອຍຕໍ່ປີ, ລວມຍອດຜະລິດຕະພັນພາຍໃນບັນລຸໄດ້ 5 ພັນ 929 ຕື້ກີບ (ສະເລ່ຍຕໍ່ຫົວຄົນບັນລຸໄດ້ 13 ລ້ານກວ່າກີບຕໍ່ຄົນຕໍ່ປີຫຼື ເທົ່າກັບ 1.660 ໂດລາສະຫາລັດຕໍ່ຄົນຕໍ່ປີ, ຄວາມທຸກຍາກຂອງປະຊາຊົນນັບມື້ຫຼຸດລົງ, ສະພາບການລົງທຶນພາກເອກະຊົນທັງພາຍໃນ ແລະ ຕ່າງ ປະເທດໄດ້ເພີ່ມຂຶ້ນ. ພື້ນຖານໂຄງລ່າງທາງດ້ານເສດຖະກິດໄດ້ຮັບການພັດທະນາຢ່າງຕໍ່ເນື່ອງ. ລະບົບການຈັດຕັ້ງຂອງຄະນະພັກແຕ່ລະຂັ້ນ ໄດ້ຮັບການປັບປຸງເປັນປົກກະຕິ, ມີຄຸນນະພາບ, ການກໍ່ສ້າງໜ່ວຍພັກແຂງຮູ້ນຳພາຮອບດ້ານ ເພີ່ມຂຶ້ນ 78 ໜ່ວຍ ເທົ່າກັບ 46 ສ່ວນຮ້ອຍຂອງແຜນການ, ການອອກບັດ-ມອບບັດໃຫ້ສະມາຊິກພັກໄດ້ເຮັດຢ່າງຕໍ່ເນື່ອງ ກວມເອົາ 62 ສ່ວນຮ້ອຍຂອງສະມາຊິກພັກທັງໝົດ, ແບບແຜນວິທີນຳພາຂອງພັກໄດ້ຮັບການປັບປຸງບູລະນະດີຂຶ້ນ, ສະມາຊິພັກ, ພະນັກງານໄດ້ຮັບການບຳລຸງກໍ່ສ້າງຢ່າງຕໍ່ເນື່ອງ. ໄດ້ສຸມທຸກກຳລັງແຮງ, ທຶນຮອນເຂົ້າໃນການກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ຕາມ 4 ເນື້ອໃນ 4 ຄາດໝາຍ, ປັບປຸງລະບົບການເມືອງຢູ່ຂັ້ນຮາກຖານໂດຍສຸມໃສ່ 4 ຈຸດສຸມພັດທະນາ ຄື: ຈຸດສຸມພັດທະນາເມືອງຄີ່, ຈຸດສຸມພັດທະນາຜາສັງ, ຈຸດສຸມພັດທະນາຜາບ່ອງ ແລະ ຈຸດສຸມເມືອງກາສີ, ສາມາດສ້າງບ້ານພັດທະນາໄດ້ 190 ບ້ານ, ບ້ານທຸກຍາກຍັງເຫຼືອ 10 ບ້ານ, ຄອບຄົວທຸກຍາກຍັງເຫຼືອ 1.033 ຄອບຄົວ, ອົງການປົກຄອງຂັ້ນຮາກຖານໄດ້ຮັບການປັບປຸງເຂັ້ມແຂງເທື່ອລະກ້າວ, ເສດຖະກິດ-ສັງຄົມໄດ້ຮັບການພັດທະນາ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງໃຫ້ດີຂຶ້ນ. ໄດ້ຕິດຕາມຄຸ້ມຄອງບໍລິຫານລັດ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ເປັນຕົ້ນແມ່ນກວດກາພົບເຫັນໂຄງການທີ່ບໍ່ໄດ້ປະເມີນຜົນແຕ່ໄດ້ເອົາເຂົ້າໃນແຜນໃນສົກປີ 2013-2014 ຈຳນວນ 31 ໂຄງການ, ໃນຕົວຈິງປະຕິບັດໄດ້ 29 ໂຄງການລວມມູນຄ່າ 560 ຕື້ກວ່າກີບ, ຊຳລະແລ້ວ 128 ຕື້ກີບ,ໄດ້ພົບເຫັນພະນັກງານກວດກາບໍລິມາດວຽກໃຫ້ບໍລິສັດກ່ອນຕົວຈິງມີມູນຄ່າເສຍຫາຍ 10 ຕື້ກວ່າກີບ,ໂຄງການທີ່ມີຄ່າຈ້າງທີ່ປຶກສາ 4 ໂຄງການແຕ່ບໍ່ໄດ້ຈ້າງມູນຄ່າ 2 ຕື້ກວ່າກີບ,ໂຄງການທີມີເງິນແຮ 3 ໂຄງການມູນຄ່າ 17 ຕື້ກວ່າກີບ.
Editor: ກຳປານາດ ລັດຖະເຮົ້າ
