ທ່ານ ຄຳປະເສີດ ເທບປັນຍາ ຮອງອຳນວຍການໃຫຍ່ ລັດວິສາຫະກິດໄຟຟ້າລາວ ພ້ອມຄະນະ ໄດ້ລົງມາເຮັດວຽກ ແລະ ພົບປະຢ້ຽມຢາມພະນັກງານ - ກຳມະກອນ ຢູ່ລັດວິສາຫະກິດໄຟຟ້າລາວ ສາຂາແຂວງວຽງຈັນ. ໃຫ້ກຽດຕ້ອນຮັບໂດຍ ທ່ານ ຈຳປາທອງ ວົງເດືອນ ເລຂາຄະນະພັກຮາກຖານ, ຫົວໜ້າລັດວິສາຫະກິດໄຟຟ້າລາວ ສາຂາແຂວງວຽງຈັນ ພ້ອມດ້ວຍຄະນະ, ມີພະນັກງານຫລັກແຫລ່ງບັນດາພະແນກການ, ສູນບໍລິການ ແລະ ຕະຫລອດຮອດອ້າຍນ້ອງກຳມະກອນໄຟຟ້າ ເຂົ້າຮ່ວມຢ່າງພ້ອມພຽງ.
ຈຸດປະສົງແມ່ນເພື່ອຢື້ຢາມຖາມຂ່າວ ແລະ ນຳເອົາຄວາມເປັນຫ່ວງເປັນໃຍຂອງບັນດາທ່ານຄະນະອຳນວຍການລັດວິສາຫະກິດໄຟຟ້າລາວ ທີ່ມີຕໍ່ບັນດາທ່ານໃນຄະນະພັກ, ຄະນະສາຂາ ແລະ ພະນັກງານຫລັກແຫລ່ງຕະຫລອດຮອດອ້າຍນ້ອງກຳມະກອນລັດວິສາຫະກິດໄຟຟ້າລາວ ສາຂາແຂວງວຽງຈັນ. ພ້ອມນີ້ກໍ່ເພື່ອເປັນການພົບປະປຶກສາຫາລືກ່ຽວກັບການຈັດຕັ້ງປະຕິບັດເຄື່ອນໄຫວໜ້າທີ່ວຽກງານ ແລະ ການດຳເນີນທຸລະກິດຂອງລັດວະສາຫະກິດໄຟຟ້າລາວ ສາຂາແຂວງວຽງຈັນໃນໄລຍະຜ່ານມາ ແລະ ໃນຕໍ່ໜ້າ. ທີ່ປະຊຸມໄດ້ຮັບຟັງການລາຍງານກ່ຽວກັບການດຳເນີນທຸລະກິດຂອງໄຟຟ້າສາຂາແຂວງວຽງຈັນ ປະຈຳ 6 ເດືອນຕົ້ນປີ 2017 ແລະ ແຜນການສູ້ຊົນປະຕິບັດວຽກງານ 6 ເດືອນທ້າຍປີ 2017 ໂດຍຫຍໍ້ ຈາກ ທ່ານ ຈຳປາທອງ ວົງເດືອນ ເລຂາຄະນະພັກຮາກຖານ, ຫົວໜ້າລັດວິສາຫະກິດໄຟຟ້າລາວ ສາຂາແຂວງວຽງຈັນ ໄດ້ໃຫ້ຮູ້ວ່າ: ຄະນະພັກ, ຄະນະສາຂາ, ຄະນະພະແນກ ແລະ ບັນດາສູນບໍລິການຕ່າງໆໄດ້ຖືສຳຄັນຕໍ່ວຽກງານການເມືອງ-ແນວຄິດ, ໄດ້ສຶກສາອົບຮົມດ້ວຍຫລາຍຮູບແບບເຮັດໃຫ້ສາຂາມີຄວາມສະຫງົບໂດຍພື້ນຖານ, ພະນັກງານມີຄວາມອຸ່ນອ່ຽນທຸ່ນທ່ຽງ ເຊື້ອໝັ້ນຕໍ່ການນຳພາຂອງພັກ-ລັດ, ຕັ້ງໜ້າປະຕິບັດລະບຽບກົດໝາຍ ແລະ ທຸກມະຕິຄຳສັ່ງຂອງຂັ້ນເທິງວາງອອກໃນແຕ່ລະໄລຍະໄດ້ດີ ແລະ ມີຜົນສຳເລັດ. ເຊິ່ງສະແດງອອກໃນການຈັດຕັ້ງປະຕິບັດວຽກງານ ແລະ ດຳເນີນທຸລະກິດຂອງລັດວິສາຫະກິດໄຟຟ້າລາວ ສາຂາແຂວງວຽງຈັນ ໃນ 6 ເດືອນຕົ້ນປີ 2017. ປະຈຸບັນແຂວງວຽງຈັນແມ່ນໄດ້ຊົມໃຊ້ໄຟຟ້າທັງໝົດ 11 ເມືອງເທົ່າກັບ 100 ສ່ວນຮ້ອຍ, ຈຳນວນບ້ານໄດ້ຊົມໃຊ້ໄຟຟ້າຮອດ ເດືອນ 6 ປີ 2017 ແມ່ນມີທັງໝົດ 433 ບ້ານເທົ່າກັບ 100 ສ່ວນຮ້ອຍ ແລະ ຈຳນວນຄອບຄົວໄດ້ຊົມໃຊ້ໄຟຟ້າທັງໝົດ 97,767 ຄອບຄົວ ເທົ່າກັບ 119,10 ສ່ວນຮ້ອຍ.
ໃນໂອກາດນີ້ ທ່ານ ຄຳປະເສີດ ເທບປັນຍາ ຄະນະພັກ, ຮອງອຳນວຍການໃຫຍ່ລັດວິສາຫະກິດໄຟຟ້າລາວ ກໍ່ໄດ້ໃຫ້ທິດຊີ້ນຳກ່ຽວກັບການຈັດຕັ້ງປະຕິບັດວຽກງານ ແລະ ດຳເນີນທຸລະກິດຂອງລັດວິສາຫະກິດໄຟຟ້າລາວ ສາຂາແຂວງວຽງຈັນ ເປັນຕົ້ນເອົາໃຈໃສ່ຊອກໃຫ້ເຫັນບັນດາສາຍເຫດທີ່ພາໃຫ້ເກີດພະລັງງານຕົກເຮ່ຍ ແລະ ການຄຸ້ມຄອງໝໍ້ນັບໄຟໃຫ້ມີຄວາມໜາແໜ້ນກ່ວາເກົ່າ, ພ້ອມທັງສຸມໃສ່ການພັດທະນາທາງດ້ານເຕັກນິກ ແລະ ຄວາມປອດໄພໃຫ້ສູງຂຶ້ນ. ພ້ອມດຽວກັນນີ້ກໍ່ຕ້ອງໄດ້ຄົ້ນຄ້ວາສ້າງລາຍຮັບໃຫ້ຫລາຍ, ຫລຸດຜ່ອນລາຍຈ່າຍ ແລະ ສ້າງທຸກເງື່ອນໄຂໃຫ້ມີຜົນກຳໄລທາງດ້ານລາຍຮັບໃຫ້ສູງຂຶ້ນເລື້ອຍໆ.
Editor: ກຳປານາດ ລັດຖະເຮົ້າ
