ທ່ານ ຄໍາສອນ ກອນເຍີ ກໍາມະການພັກແຂວງ ເລຂາພັກເມືອງ ເຈົ້າເມືອງ-ເມືອງ ທ່າແຕງ ໄດ້ນຳເອົາຄອມພິວເຕີ ( ນ໋ອດບຸກ ) ຈໍານວນ 6 ຊຸດ, ມູນຄ່າ 22 ລ້ານ 9 ແສນກວ່າກີບ. ມອບໃຫ້ 6ເຂດຈຸດສຸ່ມພັດທະນາທົ່ວເມືອງທ່າແຕງ. ແຂວງເຊກອງ ໃນວັນທີ 30 ມິຖຸນາ ຜ່ານມານີ້ ຢູ່ທີ່ສະໂມສອນຂອງເມືອງ ໂດຍແມ່ນຫົວໜ້າເຂດຈຸດສຸ່ມພັດທະນາທັງ 6 ເຂດ ຂອງເມືອງທ່າແຕງ ໃຫ້ກຽດກ່າວຮັບ. ມີຄະນະປະຈໍາພັກເມືອງ,ກໍາມະການພັກເມືອງ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີ່ພະຍານ.
ຈຸດປະສົ່ງ ໃນການມອບຄອມພິວເຕີ ( ນ໋ອດບຸກ ) ຄັ້ງນີ້, ເພື່ອໃຫ້ການປະຕິບັດໜ້າທີ່ວຽກງານຂອງແຕ່ລະເຂດໃນທົ່ວເມືອງທ່າແຕງ ມີຄວາມສະດວກວ່ອງໄວ, ທ່ວງທັນກັບສະພາບການຕົວຈິງ, ເປັນການປະກອບສ່ວນເຂົ້າໃນວຽກງານໃຫ້ມີຄວາມໜັກແໜ້ນທາງດ້ານການເມືອງ-ແນວຄິດ ແລະ ຂົງເຂດວຽກງານສອງກໍາລັງປະກອບອາວຸດ ໂດຍຕິດພັນກັບວຽກງານ 3 ສ້າງ, ແຜນພັດທະນາຂອງເມືອງ ແລະ ແຂວງວາງອອກໃຫ້ບັນລຸຕາມລະດັບຄາດໝາຍ, ທັງເປັນການປັບປຸງທຸກວຽກງານຢູ່ຂັ້ນຮາກຖານໃນ 6 ເຂດຈຸດສຸ່ມພັດທະນາ, ວຽກກອງປະຊຸມພາຍໃນເຂດຂອງຕົນ ລວມໄປເຖິງການມອບພາລະບົດບາດ,ສິດ ແລະ ໜ້າທີ່ຂອງແຕ່ລະໜ້າວຽກໃຫ້ຢ່າງລະອຽດຈະແຈ້ງ ທີ່ຕິດພັນກັບການສ້າງຂະບວນການຕ່າງໆ ເພື່ອຂ່ໍານັບຮັບຕ້ອນວັນສໍາຄັນຂອງຊາດ ທີ່ຈະມາເຖິງນີ້. ທ່ານ ເລຂາພັກເມືອງ ທ່າແຕງ ຍັງໄດ້ເນັ້ນໃຫ້ຫົວໜ້າເຂດຈຸດສຸ່ມພັດທະນາແຕ່ລະເຂດໃນທົ່ວເມືອງ ທ່າແຕງ ຕິດຕາມຄືນກ່ຽວກັບການຈັດຕັ້ງປະຕິບັດທຸກຂົງເຂດວຽກງານ,ສະຫຼຸບຕີລາຄາດ້ານດີ,ດ້ານອ່ອນ ແລະ ຂໍ້ຄົງຄ້າງ ທີ່ຈະແກ້ໄຂໃນຕໍ່ໜ້າ ໂດຍສະເພາະ ຄົນເຂົ້າ-ຄົນອອກ,ສະຖິຕິ,ການຍົກຍ້າຍພົນລະເມືອງ ຕ້ອງໄດ້ໄປຕາມຂະບວນການ ແລະ ກົດໝາຍການປົກຄອງທ້ອງຖິ່ນ, ນອກນີ້ ຕ້ອງຕິດຕາມບັນດາກຸ່ມເປົ້າໝາຍຂາຍຢາເສບຕິດ, ການຄ້າຂາຍທີ່ຜິດຕໍ່ລະບຽບກົດໝາຍໃຫ້ຢ່າງເຂັ້ມງວດຂື້ນກວ່າເກົ່າ, ພ້ອມທັງຮຽກຮ້ອງໃຫ້ບັນດາສະຫາຍທີ່ເປັນຫົວໜ້າເຂດຈຸດສຸ່ມພັດທະນາ ຈົ່ງເອົາໃຈໃສ່ປົກປັກຮັກສາ ແລະ ນຳໃຊ້ຄອມພິວເຕີ ນີ້ໃຫ້ເກີດປະໂຫຍດຢ່າງສູງສຸດ.
Editor: ກຳປານາດ ລັດຖະເຮົ້າ
