ໃນລະຫວ່າງວັນທີ 24 ຫາ 28 ມິຖຸນາ 2017 ຜ່ານມານີ້ ຄະນະຜູ້ແທ່ນຂັ້ນສູງສູນກາງແນວລາວສ້າງຊາດ ນຳໂດຍ ທ່ານ ປະລິນຍາເອກ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ພ້ອມຄະນະ ໄດ້ສຳເລັດການເຂົ້າຮ່ວມກອງປະຊຸມສາມແນວໂຮມ ລາວ-ຫວຽດນາ ແລະ ກຳປູເຈຍ ທີ່ໄດ້ຈັດຂື້ນທີ່ນະຄອນຫລວງຮ່າໂນ່ຍ, ສາທາລະນະລັດ ສັງຄົມນິຍົມ ຫວຽດນາມ.
ກອງປະຊຸມໄດ້ທົບທວນຄືນກ່ຽວກັບການຍົກສູງປະສິດທິຜົນໃນການຮ່ວມມື ຈັດຕັ້ງປະຕິບັດບົດບັນທຶກຊ່ວຍຈຳ ລະຫວ່າງ ສູນກາງແນວລາວສ້າງຊາດ, ແນວໂຮມປະເທດຊາດຫວຽດນາມ ແລະ ແນວໂຮມສາມັກຄີມາຕຸພູມກຳປູເຈຍ ທີ່ໄດ້ຮ່ວມລົງນາມໃນປີ 2013 ຜ່ານມາ ທີ່ນະຄອນຫລວງວຽງຈັນ ສປປ ລາວ. ຊຶ່ງເຫັນວ່າການຮ່ວມມືລະຫວ່າງສາມປະເທດ ໃນຂົງເຂດວຽກງານມີບາດກ້າວໃຫມ່ອັນຕັ້ງຫນ້າດ້ວຍເນື້ອໃນ ແລະ ຮູບການທີ່ອຸດົມສົມບູນ, ມີປະສິດທິຜົນ ຊຶ່ງເປັນການປະກອບສ່ວນຮັດແຫນ້ນສາຍພົວພັນມິດຕະພາບອັນເປັນມູນເຊື້ອຄວາມສາມັກຄີລະຫວ່າງສາມປະເທດ ກໍ່ຄືສາມແນວໂຮມໃຫ້ເຂົ້າສູ່ລວງເລິກ. ສາມແນວໂຮມ ຍາມໃດກໍ່ໄດ້ເພີ່ມທະວີຄວາມເອົາໃຈໃສ່ໃນການຊຸກຍູ້ ແລະ ສົ່ງເສີມປະຊາຊົນສາມປະເທດ ທີ່ດຳລົງຊີວິດຢູ່ຕາມເຂດຊາຍແດນຕິດຈອດກັນ ລະຫວ່າງ ລາວ-ຫວຽດນາມ ແລະ ກຳປູເຈຍ ຮັດແຫນ້ນຄວາມສາມັກຄີຮ່ວມມືຊ່ວຍເຫລືອຊຶ່ງກັນ ແລະ ກັນ ປະຕິບັດກົດຫມາຍຂອງແຕ່ລະປະເທດ ເຫັນວ່າມີຄວາມເປັນລະບຽບຮຽບຮ້ອຍ ແລະ ມີຄວາມສະຫງົບໂດຍພື້ນຖານຕາມຊາຍແດນ. ນອກນີ້, ກໍ່ໄດ້ສົ່ງຜູ້ແທນຂັ້ນສູງ ແລະ ຂັ້ນວິຊາການຢ້ຽມຢາມພົບປະແລກປ່ຽນບົດຮຽນເຊິ່ງກັນ ແລະ ກັນ. ແຕ່ຄ່ຽງຄູ່ກັບຜົນງານນັ້ນ ຍັງມີບາງບັນຫາຄົງຄ້າງ ທີ່ສາມແນວໂຮມຈະຕ້ອງໄດ້ເອົາໃຈໃສ່ ເປັນຕົ້ນແມ່ນ ຄວາມສະຫງົບ, ຄວາມເປັນລະບຽບຮຽບຮ້ອຍຢູ່ບາງບ່ອນຕາມເຂດຊາຍແດນ ລາວ-ຫວຽດນາມ ແລະ ກຳປູເຈຍ. ຊຶ່ງໃນຊຸມປີຜ່ານມາ ເນື້ອງຈາກພວກອິດທິກຳລັງປໍລະປັກ ແລະ ບຸກຄົນທີ່ບໍ່ຫວັງດີຕໍ່ປະເທດຊາດພວກເຮົາ ຍັງບໍ່ປະລະກົນອຸບາຍຫັນປ່ຽນໂດຍສັນຕິດ ສ່ວຍໃຊ້ບັນຫາຊົນເຜົ່າ, ສາສະຫນາ, ສິດທິມະນຸດ ແລະ ຄວາມຫຍຸ້ງຍາກດ້ານຕ່າງໆ ກົດດັນ, ໃສ່ຮ້າຍປ້າຍສີ ເພື່ອແບ່ງແຍກຄວາມສາມັກຄີມິດຕະພາບທີ່ເປັນມູນເຊື້ອຂອງສາມປະເທດພວກເຮົາ.
ເພື່ອສືບຕໍ່ເສີມຂະຫຍາຍການຮ່ວມມືລະຫວ່າງສາມແນວໂຮມ ໃຫ້ມີບາດກ້າວໃຫມ່ນັ້ນ ກອງປະຊຸມຄັ້ງນີ້ໄດ້ຄົ້ນຄ້ວາ, ປຶກສາຫາລືຢ່າງພາວະວິໄສ ແລະ ມີຄວາມຮັບຜິດຊອບສູງຕໍ່ບັນດາເນື້ອໃນຂອງບົດຊ່ວຍຈຳ, ແຜນການຮ່ວມມື ລະຫວ່າງຄະນະກຳມະການສູນກາງແນວລາວສ້າງຊາດ, ແນວໂຮມປະເທດຊາດຫວຽດນາມ ແລະ ແນວໂຮມສາມັກຄີມາຕຸພູມກຳປູເຈຍ ເປັນບ່ອນອີງໃນການຜັນຂະຫຍາຍສູ່ວຽກງານຕົວຈິ່ງຂອງແຕ່ລະປະເທດ.
ຫລັງຈາກນັ້ນ ກໍ່ໄດ້ມີພິທີລົງນາມບົດບັນທຶກຊ່ວຍຈຳ, ແຜນການຮ່ວມມືຂອງສາມແນວໂຮມຮ່ວມກັນ.
Editor: ຕະວັນ ແສງສະຫວັນ
