ໂອກາດເຂົ້າຮ່ວມກອງປະຊຸມ 3 ແນວໂຮມ ລາວ-ຫວຽດນາມ ແລະ ກໍາປູເຈຍ ໃນວັນທີ 25 ມິຖຸນາ 2017 ຜ່ານມາ ໃນວັນດຽວກັນຄະນະຜູ້ແທນຂັ້ນສູງ ສູນກາງແນວລາວສ້າງຊາດ ນຳໂດຍທ່ານ ປະລິນຍາເອກ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍພັນລະຍາ ແລະ ຄະນະໄດ້ໄປວາງພວງມາລາ ຢູ່ສຸສານປະທານ ໂຮ່ຈີມິນ, ແລະ ເດີ່ນທາງໄປຢ້ຽມຢາມນັກສຶກສາລາວ ຢູ່ມະຫາວິທະຍາໄລແຫ່ງຊາດຮ່າໂນ່ຍ ຊຶ່ງກໍ່ໄດ້ຖືກຕ້ອງຮັບຢ່າງອົບອຸ່ນຈາກການນຳຂອງມະຫາວິທະຍາ
ໄລດັ່ງກ່າວ, ພ້ອມທັງ ໄດ້ຮັບຊົມການສະແດງສິລະປະວັນນະຄະດີ ຈາກນັກສຶກສາວິທະຍາໄລແຫ່ງຊາດ ຮ່າ ໂນຍ່ ແລະ ໃນຕອນຄໍ່າຂອງວັນດຽວກັນ ຄະນະຜູ້ແທນຂັ້ນສູງ ສູນກາງແນວລາວສ້າງຊາດ ນຳໂດຍທ່ານ ປະລິນຍາເອກ ໄຊສົມພອນ ພົມວິຫານ, ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ພ້ອມດ້ວຍພັນລະຍາ ແລະ ຄະນະ ຍັງໄດ້ເຂົ້າຢ້ຽມຂໍ່ານັບ ທ່ານ ຫງຽນ ຟູ ຈອງ, ເລຂາທິການໃຫຍ່ ພັກກອມມູນິດ ຫວຽດນາມ ແລະ ເຂົ້າຮ່ວມງານລ້ຽງສະຫລຸບຊົມເຊີຍຜົນສໍາເລັດຂອງປະຊຸມ.
ຕໍ່ມາໃນວັນທີ 26 ແລະ 27 ມິຖຸນາ 2017 ຄະນະຜູ້ແທນຂັ້ນສູງ ສູນກາງແນວລາວສ້າງຊາດ ໄດ້ໄປຢ້ຽມຢາມເມືອງອຽນເຊີນ, ແຂວງຕຽນກວາງ ໂດຍໄດ້ຮັບການຕ້ອນຮັບຈາກທ່ານເຈົ້າແຂວງຕຽນກວາງ, ຊຶ່ງແຂວງດັ່ງກ່າວ ເປັນເຂດຮອ່ງຮອຍປະຫວັດສາດ ເປັນທີ່ຫມັ່ນການເຄື່ອນໄຫວເຮັດວຽກ ແລະ ພັກເຊົາ ຂອງປະທານ ໄກສອນ ພົມວິຫານ, ຊຶ່ງຢູ່ສະຖານທີນີ້ ໄດ້ເປັນບ່ອນຈັດກອງປະຊຸມໃຫຍ່ຂອງບັນດາກຳລັງລາວຕໍ່ຕ້ານ ໃນວັນທີ 13 ສິງຫາ 1950 ຊຶ່ງທ່ານໄດ້ຮັບເລືອກຕັ້ງເປັນກຳມະການຄະນະບໍລິຫານງານ ສູນກາງແນວລາວອິດສະຫລະ, ລັດຖະມົນຕີກະຊວງປ້ອງກັນປະເທດຂອງລັດຖະບານລາວຕໍ່ຕ້ານ ໃນເມື່ອກ່ອນ. ຈາກນັ້ນ ຄະນະຜູ້ແທນສູນກາງແນວລາວສ້າງຊາດ ຍັງໄດ້ໄປຢຽ້ມຊົມ ສະຖານທີ ແລະ ບອນເຮັດວຽກຂອງປະທານ ສຸພາ ນຸວົງ ໃນເມື່ອກ່ອນ, ແລະ ຄະນະໄດ້ເດີ່ນທາງຕໍ່ໄປທ່ຽວຊົມ-ຢ້ຽມຢາມເມືອງຊາປາ, ແຂວງລາວກາຍ ຊຶ່ງກໍ່ໄດ້ຮັບການຕ້ອນຮັບຢ່າງອົບອຸ່ນຈາກການນຳຂອງແຂວງ.
ຕໍ່ມາໃນວັນທີ 28 ມິຖຸນາ 2017 ຄະນະຜູ້ແທນຂັ້ນສູງ ສູນກາງແນວລາວສ້າງຊາດ ໄດ້ເດີ່ນທາງໄປຢຽ້ມຢາມ ແຂວງຝູເຖາະ ຊຶ່ງເປັນເຂດທີ່ຫມັ້ນ ທີ່ທ່ານປະທານ ໄກສອນ ພົມວິຫານ ໄດ້ເຄື່ອນໄຫວຄັ້ງທຳອິດ ປັບປຸງກຳລັງທະຫານ ແນວລາວອິດສະຫລະ ພ້ອມທັງຢຽ້ມຢາມ ພື້ນຖານວັດທະນະທຳ ແລະ ເສດຖະກິດຂອງແຂວງຕື່ມອີກ. ຊຶ່ງກໍ່ໄດ້ຖືກຕ້ອນຮັບຈາກອຳນາດການປົກຄອງ ແຂວງຝູເຖາະ ຢ່າງອົບອຸ່ນ. ຈາກນັ້ນ ໃນຕອນແລງຂອງວັນດຽວກັນ ຄະນະຜູ້ແທນສູນກາງແນວລາວສ້າງຊາດ ກໍ່ໄດ້ເດີ່ນທາງກັບຄືນປະເທດດ້ວຍຄວາມສະຫວັດດີພາບ.
Editor: ຕະວັນ ແສງສະຫວັນ
