ໃນວັນທີ 5 ກໍລະກົດ 2017 ນີ້, ທີ່ໂຮງແຮມ ຄຣາວພາຊາ, ກະຊວງແຜນການ ແລະ ການລົງທຶນ ຮ່ວມກັບ ສູນອາຊຽນ-ເກົາຫລີ ແລະ ສະພາອຸດສາຫະກຳແຫ່ງຊາດລາວ ໄດ້ຈັດກອງປະຊຸມສຳມະນາ ພາຍໃຕ້ຫົວຂໍ້: ການສ້າງຂິດຄວາມສາມາດ ກ່ຽວກັບໂອກາດຂະຫຍາຍທຸລະກິດ ໃນຮູບແບບ ອີຄອມເມີດ ( E-commerce ) ຢູ່ ສປປ ລາວ ໂດຍການການເປັນປະທານຂອງ ທ່ານ ປະລິນຍາເອກ ຄຳລຽນ ພົນເສນາ ຮອງລັດຖະມົນຕີ ກະຊວງແຜນການ ແລະ ການລົງທຶນ, ຮ່ວມກັບ ທ່ານ ກີມ ຢອງຊຸນ ( KIM YOUNG-SUN ) ເລຂາທິການໃຫຍ່ສູນອາຊຽນ-ເກົາຫລີ ແລະ ທ່ານ ຍັນ ກັງ ງອນ ( YUN KANG-HYEON ) ເອກອັກຄະລັດຖະທູດວິສາມັນ ແຫ່ງ ສາທາລະນະລັດ ເກົາຫລີ ປະຈຳ ສປປ ລາວ. ເຂົ້າຮ່ວມຍັງມີບັນດາແຂກທີ່ກ່ຽວຂ້ອງ ຈາກກະຊວງແຜນການ ແລະ ການລົງທຶນ, ຈາກສະພາການຄ້າ ແລະ ອຸດສາຫະກຳແຫ່ງຊາດ ເຂົ້າຮ່ວມ ຢ່າງພ້ອມພຽງ.
ໃນກອງປະຊຸມ ທ່ານ ປະລິນຍາເອກ ຄຳລຽນ ພົນເສນາ ຮອງລັດຖະມົນຕີ ກະຊວງແຜນການ ແລະ ການລົງທຶນ ໄດ້ກ່າວວ່າ: ສປປ ລາວ ມີແຜນນະໂຍບາຍ ຈະຫັນການລົງທຶນ ໄປສູ່ການລົງທຶນ ທີ່ມີຄຸນະພາບ ຫລຸດຜ່ອນການເອື້ອຍອິງໃສ່ແຕ່ຊັບພະຍາກອນທຳມະຊາດ, ສ້າງມູນຄ່າເພີ່ມໃຫ້ສູງຂື້ນ, ດ້ວຍການນຳໃຊ້ແຮງງານ ແລະ ສະຕິປັນຍາຂອງຄົນພາຍໃນປະເທດ, ສະຫນອງຜະລິດຕະພັນ ຄືການບໍລິການຄຸນນະພາບໃຫມ່ໃຫ້ແກ່ສັງຄົມ ແລະ ປະເທດຊາດ, ການເຊື່ມໂຍງກັບອະນຸພາກພື້ນ ແລະ ສາກົນ. ການຂະຫຍາຍທຸລະກິດ ໃນຮູບແບບ ອີຄອມເມີດ ( E-commerce ) ແມ່ນກິດຈະກຳຫນຶ່ງ ທີ່ລັດຖະບານ ໄດ້ສົ່ງເສີມ ແລະ ເຫັນວ່າ ມີໂອກາດທີ່ຈະຂະຫຍາຍໂຕຢ່າງຕໍ່ເນື່ອງ ສະນັ້ນ ການຈັດກອງປະຊຸມສຳມະນາ ການສ້າງຂິດຄວາມສາມາດກ່ຽວກັບໂອກາດການຂະຫຍາຍທຸລະກິດ ໃນຮູບແບບ ອີຄອມເມີດ ( E-commerce ) ຢູ່ໃນ ສປປ ລາວ ຈື່ງເປັນໂອກາດທີ່ດີໃຫ້ແກ່ພະນັກງານຂັ້ນສູງ ຈາກຂະແຫນງການທີ່ກ່ຽວຂ້ອງ ກໍ່ຄືນັກທຸລະກິດ ຜູ້ປະກອບການພາຍໃນປະເທດ ໄດ້ຮຽນຮູ້ ແລະ ແລກປ່ຽນບົດຮຽນຮ່ວມກັນ.
ກອງປະຊຸມ ດັ່ງກ່າວ ຍັງໄດ້ນຳສະເຫນີ ແລະ ແລກປ່ຽນຄຳຄິດເຫັນ ໃນຫລາຍໆດ້ານ ເປັນຕົ້ນ: ກາລະໂອກາດໃນການຂະຫຍາຍທຸລະກິດ ໃນຮູບແບບ ອີຄອມເມີດ ( E-commerce ) ໃນ ສປປ ລາວ, ຮັບຟັງຍຸດທະສາດໃນການພັດທະນາ ອີຄອມເມີດ ( E-commerce ) ຂອງປະເທດເກົາຫລີ, ບັນດານະໂຍບາຍ ແລະ ໂອກາດດ້ານຕ່າງໆໃນການດຳເນີນທຸລະກິດ ຮູບແບບ ອີຄອມເມີດ ( E-commerce ) ໃນຂະແຫນງອຸດສາຫະກຳ ລາວ, ການເລີ່ມຕົ້ນໃນການສ້າງຕັ້ງທຸລະກິດສຳລັບວິສາຫາກິດ ຂະຫນາດກາງ ແລະ ຂະຫນາດນ້ອຍ ແລະ ຫົວຂໍ້ອື່ນໆ.
Editor: ກຳປານາດ ລັດຖະເຮົ້າ
