ກອງປະຊຸມດຳເນີນຊີວິດ ການເມືອງປັບປຸງປົວແປງພັກ ທົ່ວອົງຄະນະພັກເມືອງ ທ່າແຕງ ແຂວງ ເຊກອງ ໄດ້ສຳເລັດລົງຢ່າງເປັນທາງການໃນຕອນເຊົ້າວັນທີ 5 ກໍລະກົດ ຜ່ານມານີ້ ທີ່ສະໂມສອນເມືອງ ທ່າແຕງ. ພາຍຫຼັງດຳເນີນມາເປັນເວລາ 7 ວັນ ໂດຍເປັນປະທານຂອງສະຫາຍ ຄໍາສອນ ກອນເຍີ ກຳມະການພັກແຂວງ ເລຂາພັກເມືອງ,ເຈົ້າເມືອງ ທ່າແຕງ, ມີຄະນະປະຈຳພັກເມືອງ,ກຳມະການພັກເມືອງ,ຫົວໜ້າຫ້ອງການ,ອົງການທຽບເທົ່າ,ນາຍ ແລະ ພົນທະຫານ, ນາຍ ແລະ ພົນຕຳຫຼວດເຂົ້າຮ່ວມ.
ຜົນສໍາເລັດຂອງກອງປະຊຸມຄັ້ງນີ້ ທ່ານ ລົດແກ້ວ ເພັງພູນສະຫວັດ ຮອງເລຂາພັກເມືອງ ທ່າແຕງ ໄດ້ຍົກໃຫ້ເຫັນຜົນງານດ້ານດີ,ດ້ານອ່ອນ,ວິທີການ,ມາດຕະການແກ້ໄຂຈຸດອ່ອນ ແລະ ແຜນການໃນຕໍ່ໜ້າລວມໄປເຖິງ ການຕຳນິສົ່ງຂ່າວຕໍ່ການນຳພາ ລວມຂອງຄະນະບໍລິຫານງານພັກເມືອງທີ່ສະແດງໃຫ້ເຫັນເຖິງການກວດກາ, ຄວາມ ຮັບຜິດຊອບ,ຄຸນທາດການເມືອງ,ຄຸນສົມບັດສິນທຳປະຕິວັດ,ແບບແຜນວິທີເຮັດວຽກ,ແບບແຜນການດຳລົງຊີວິດຂອງພະນັກງານຄຸ້ມຄອງຕໍ່ ການປະຕິບັດໜ້າທີ່ການເມືອງໃນເງື່ອນໄຂໃໝ່ ເພື່ອເສີມຂະຫຍາຍມູນເຊື້ອ,ຜົນງານອັນດີຂອງພັກໃນໄລຍະຜ່ານມາ, ແກ້ໄຂຈຸດອ່ອນ, ຂໍ້ຂາດຕົກບົກຜ່ອງ,ສິ່ງທ້າທາຍທົດສອບ ແລະ ເປັນອັນຕະລາຍຕໍ່ພັກເຮົາ ໂດຍກຳແໜ້ນຕາມຫຼັກການ ທິດນຳທັດສະນະ ແລະ ແນວ ຄິດຊີ້ນຳຂອງກົມການເມືອງສູນກາງພັກ. ພ້ອມນີ້ ກໍ່ໄດ້ສຸມໃສ່ການກວດ ກາປະເມີນຜົນຄືນການຈັດຕັ້ງປະຕິບັດວຽກງານຮອບດ້ານ,ບັນດາຄາດໝາຍຂອງມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກເມືອງ ທ່າແຕງ ໃນວຽກງານແຕ່ລະດ້ານ.
ໃນໂອກາດທີ່ມີຄວາມໝາຍສຳຄັນນີ້ ທ່ານ ຄໍາສອນ ກອນເຍີ ກຳມະການພັກແຂວງ ເລຂາພັກເມືອງ,ເຈົ້າເມືອງ ທ່າແຕງ ກໍ່ໄດ້ໃຫ້ກຽດໂອ້ລົມ ເຊິ່ງກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ອົງຄະນະພັກເມືອງ ທ່າແຕງ ຍາດມາໄດ້ຕະຫຼອດໄລຍະຜ່ານມາ ແລະ ທ່ານ ຍັງໄດ້ເນັ້ນໜັກຫຼາຍບັນຫາ ເປັນຕົ້ນແມ່ນ ໃຫ້ສືບຕໍ່ເອົາໃຈໃສ່ໃນການເພີ່ມທະວີສຶກສາອົບຮົມການເມືອງ-ແນວຄິດ, ຍົກສູງຄວາມຮັບຜິດຊອບທາງດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ປັບປຸງແບບແຜນວິທີນຳພາ-ວິທີເຮັດວຽກຂອງຄະນະພັກ,ກໍ່ສ້າງພັກໃຫ້ໄດ້ທັງ 4 ດ້ານ,ແບບແຜນດຳລົງຊີວິດພະນັກງານນຳພາ-ຄຸ້ມຄອງຕໍ່ການປະຕິບັດໜ້າທີ່ການເມືອງໃຫ້ໜັກແໜ້ນເຂັ້ມແຂງຂຶ້ນກວ່າເກົ່າ ແລະ ບັນລຸຕາມບັນດາຄາດໝາຍມະຕິກອງປະຊຸມໃຫຍ່ ຄັ້ງທີ X ຂອງພັກ,ມະຕິ IX ຂອງແຂວງ ແລະ ມະຕິ V ຂອງອົງຄະນະພັກເມືອງ ທ່າແຕງວາງໄວ້. ພ້ອມນີ້ ຄະນະພັກຮາກຖານສໍານັກງານ ແລະ ຢູ່ຮາກຖານບ້ານທຸກໜ່ວຍພັກ ຕ້ອງສືບຕໍ່ດໍາເນີນຊີວິດການເມືອງປັບປຸງປົວແປງພັກພາຍໃນໜ່ວຍຂອງຕົນໃຫ້ສໍາເລັດຕາມແຜນການທີ່ໄດ້ກໍານົດໄວ້ໃນເດືອນ ກໍລະກົດ ນີ້ໃຫ້ສໍາເລັດໂດຍພື້ນຖານ.
Editor: ກຳປານາດ ລັດຖະເຮົ້າ
