ລາວ-ຫວຽດນາມ ມີສາຍພົວພັນຢ່າງແຫນ້ນແຟ້ນມາແຕ່ຍາວນານ ແລະ ໃນປີ 2017 ນີ້ ແມ່ນເປັນປີທີ່ມີຄວາມຫມາຍທີ່ສຳຄັນທາງດ້ານປະຫວັດສາດ ສາຍພົວພັນ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ( 18 ກໍລະກົດ 1977-18 ກໍລະກົດ 2017 ) ຄົບຮອບ 40 ປີ, ແລະ ຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດ ລາວ-ຫວຽດນາມ ( 5 ກັນຍາ 1962 - 5 ກັນຍາ 2017 )
ດັ່ງນັ້ນ, ມາໃນວັນທີ 7 ກໍລະກົດ 2017 ທ່ານ ປະລີນຍາເອກ ໄຊສົມພອນ ພົມວິຫານ ກົມການເມືອງສູນກາງພັກ, ປະທານສູນກາງແນວລາວສ້າງຊາດ ໄປພົບປະ ສະມາຄົມໃຫຍ່ ຊາວຫວຽດນາມ ປະຈຳ ສປປ ລາວ. ພິທີພົບປະດັ່ງກ່າວ ໄດ້ຈັດຂື້ນທີ່ສຳນັກງານ ສະມາຄົມໃຫຍ່ ຊາວຫວຽດນາມ ປະຂຳ ສປປ ລາວ. ໂດຍໃຫ້ກຽດຕ້ອນຮັບ ມີ ທ່ານ ວິໄຊ ນະວຽງຈັນ ປະທານສະມາຄົມໃຫຍ່ ຊາວຫວຽດນາມ ປະຈຳ ສປປ ລາວ, ພ້ອມດ້ວຍຄະນະບໍລິຫານງານສະມາຄົມ, ສະມາຊິກ ແລະ ຕາງຫນ້າພໍ່ແມ່ປະຊາຊົນຊາວຫວຽດນາມ ທີ່ດຳລົງຊີວິດ ໃນ ສປປ ລາວ. ຕໍ່ກັບການພົບປະ ຄັ້ງນີ້, ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ໄດ້ສະແດງຄວາມຮັກແພງ ແລະ ຍ້ອງຍໍຊົມເຊີຍຕໍ່ຜົນງານຂອງສະມາຄົມໃຫຍ່ ຊາວຫວຽດນາມ ປະຈຳ ສປປ ລາວ ກໍ່ຄືການປະກອບສ່ວນຂອງອ້າຍນ່້່ອງຊາວຫວຽດນາມ ຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມກັນນີ້ ທ່ານ ປະທານສູນກາງແນວລາວສ້າງຊາດ ຍັງໄດ້ຍົກໃຫ້ເຫັນມູນເຊື້ອອັນດີງາມ ຂອງປະຊາຊົນ 2 ຊາດ ລາວ-ຫວຽດນາມ ທີ່ມີມູນເຊື້ອຄວາມສາມັກຄີ, ຊ່ວຍເຫລືອເຊື່ງກັນ ແລະ ກັນ ມາເປັນເວລາດົນນານ. ການພົວພັນທີ່ເປັນມູນເຊື້ອດັ່ງກ່າວ ໄດ້ເພີ່ມຄວາມຮັດແຫນ້ນສາມັກຄີ ແລະ ເຕີບໃຫຍ່ ກາຍເປັນຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຂອງສອງຊາດ ລາວ-ຫວຽດນາມ. ສອງພັກ-ສອງລັດ ແລະ ປະຊາຊົນສອງຊາດ ໄດ້ເອົາໃຈໃສ່ປັບປຸງເສີມຂະຫຍາຍ ກາຍເປັນຄວາມສາມັກຄີ ທີ່ບໍລິສຸດຜຸດຜ່ອງ ທີ່ຫາຍາກໃນການພົວພັນສາກົນ ແລະ ກາຍເປັນມໍລະດົກອັນລ້ຳຄ່າ ຂອງສອງຊາດ ລາວ ແລະ ຫວຽດນາມ.
ເພື່ອເປັນການສຶບຕໍ່ມູນເຊື້ຄວາມສາມັກຄີແບບພິເສດ ແລະ ສຳພັນສູ້ຮົບ, ລວມທັງການຮ່ວມມືຮອບດ້ານ ລາວ-ຫວຽດນາມ ກໍ່ຄືການຊ່ວຍເຫລືອເຊີ່ງກັນ ແລະ ກັນ ລາວ-ຫວຽດນາມ, ທ່ານ ປະທານສູນກາງແນວລາວສ້າງຊາດ ຈີ່ງໄດ້ມີຄຳເຫັນໃນການພົບປະຄັ້ງນີ້ ຄື: (ຫນຶ່ງ), ເພີ່ມທະວີໂຄສະນາ ສຶກສາອົບຮົມຄົນຮຸ້ນໃຫມ່-ຮຸ້ນຫນຸ່ມ ໃຫ້ມີຄວາມຮັບຮູ້ເຂົ້າໃຈ ກ່ຽວກັບມູນເຊື້ອແຫ່ງຄວາມສາມັກຄີພິເສດ, ການຮ່ວມສຳພັນສູ້ຮົບ ແລະ ການຮ່ວມມືຮອບດ້ານ ລະຫວ່າງ ສປປ ລາວ ແລະ ສສ ຫວຽດນາມ. (ສອງ), ຍົກສູງສະຕີເປັນເຈົ້າ, ປະກອບສ່ວນສະຕີປັນຍາ ແລະ ເຫື່ອແຮງໃນການເພີ່ມພູນຄູນສ້າງ ສາຍພົວພັນ ລາວ-ຫວຽດນາມ ໃຫ້ຢືນຍົງທະນົງແກ່ນ ຊົ່ວກາລະນາ. (ສາມ) ຕ້ອງມີການພັດທະນາຕົນເອງ, ພັດທະນາຄອບຄົວ, ເຂົ້າຮ່ວມປົກປັກຮັກສາ ແລະ ພັດທະນາບ້ານເມືອງ ທີ່ຕົນຢູ່ອາໄສ ແລະ ຊ່ວຍເຫລືອ ບ້ານເກີດເມືອງນອນ. (ສີ່) ສຳລັບສະມາຄົມໃຫຍ່ ຊາວຫວຽດນາມ ປະຈຳ ສປປ ລາວ ໃຫ້ເພີ່ມທະວີເຕົ້າໂຮມຄວາມສາມັກຄີ ຂອງຊາວຫວຽດນາມ ທີ່ອາໄສຢູ່ ໃນລາວ, ສຶກສາອົບຮົມບັນດາລູກຫລານ ເຄື່ອນໄຫວທຳມາຫາກິນ ຢ່າງຖືກຕ້ອງຕາມລະບຽບກົດຫມາຍ, ສ້າງສະມາຄົມໃຫຍ່ ຊາວຫວຽດນາມ ປະຈຳ ສປປ ລາວ ໃຫ້ເປັນຕົວແບບທີ່ດີ ໃຫ້ກັບບັນດາສະມາຄົມຊາວຕ່າງປະເທດ ທີ່ດຳລົງຊີວິດ ແລະ ທຳມາຫາກິນ ໃນ ສປປ ລາວ ຮຽນຮູ້ນຳກັນ.
Editor: ກຳປານາດ ລັດຖະເຮົ້າ
