ເດືອນກໍລະກົດ ເປັນເດືອນທີ່ມີຄວາມຫມາຍສຳຄັນຢ່າງຍີ່ງ ເພາະມີຫລາຍວັນສຳຄັນ ທາງປະຫວັດສາດ ແລະ ວັນສຳຄັນຂອງຊາດ, ເຊັ່ນ: ວັນຄ້າຍວັນເກີດ ຂອງປະທານສຸພານຸວົງ 13 ກໍລະກົດ ຄົບຮອບ 108 ປີ, ວັນປ່ອຍປາ ແລະ ອະນຸລັກສັດນ້ຳ-ສັດປ່າ ແຫ່ງຊາດ 13 ກໍລະກົດຄົບຮອບ 20 ປີ, ສະເຫລີມສະຫລອງປີແຫ່ງສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 18 ກໍລະກົດ ຄົບຮອບ 40 ປີ, ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ, ສຳລັບສະຫາພັນແມ່ຍິງລາວ ກໍ່ຄືແມ່ຍິງບັນດາເຜົ່າ ນອກຈາກຈະເຂົ້າຮ່ວມຂະບວນການລວມດັ່ງກ່າວແລ້ວ ຍັງໄດ້ຕັ້ງຫນ້າສ້າງຂະບວນການ-ສ້າງຜົນງານ ເພື່ອຕ້ອນຮັບວັນສ້າງຕັ້ງອົງການຈັດຕັ້ງສະຫາພັນແມ່ຍີງລາວ ຄົບຮອບ 62 ປີ ວັນທີ 20 ກໍລະກົດ.
ດັ່ງນັ້ນ, ໃນວັນທີ 7 ກໍລະກົດ 2017 ຜ່ານມານີ້, ທີ່ສຳນັກງານສູນກາງສະຫະພັນແມ່ຍິງລາວ ທ່ານນາງ ບັນດິດ ປະທຸມວັນ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ ໄດ້ຖະແຫລງຂ່າວ ຕໍ່ສື່ມວນຊົນ ກ່ຽວກັບການກະກຽມສະເຫລີມສະຫລອງ ວັນສ້າງຕັ້ງ ອົງການຈັດຕັ້ງສະຫະພັນແມ່ຍິງລາວ 20 ກໍລະກົດ ຄົບຮອບ 62 ປີ, ວ່າ: ເພື່ອເຮັດໃຫ້ການຈັດຕັ້ງສະເຫລີມສະຫລອງວັນດັ່ງກ່າວ ໃຫ້ມີຄວາມຫມາຍສຳຄັນເລີກເຊີ່ງ ແລະ ມີບັນຍາກາດພົດຟື້ນ ຕິດພັນກັບການສະຫລຸບຕິລາຄາການເຄື່ອນໄຫວພັດທະນາແມ່ຍິງ ໃນແຕ່ລະຂັ້ນ ແລະ ໃນແຕ່ລະຂົງເຂດວຽກງານ.. ການສະເຫລີມສະຫລອງໃນປີນີ້ ແມ່ນເລັງໃສ່ສຶກສາອົບຮົມສາມາຊິກ ແມ່ຍີງບັນດາເຜົ່າ ກ່ຽວກັບຜົນງານ, ມູນເຊື້ອ ແລະ ຄຸນລັກສະນະທີ່ເປັນມູນເຊື້ອຂອງແມ່ຍິງບັນດາເຜົ່າ ເພື່ອປຸກລະດົມເຕົ້າໂຮມເຂົ້າຮ່ວມໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເວົ້າສະເພາະການພັດທະນາແມ່ຍີງຕາມວິໄສທັດ, ຍຸດທະສາດ ທີ່ກອງປະຊຸມຄົບຄະນະບໍລິຫານງານສູນກາງສະຫາພັນແມ່ຍິງ ຄັ້ງທີ 2 ສະໄຫມທີ 7 ໄດ້ຮັບຮອງເອົາ.
ຈັດຕັ້ງໃຫ້ນັກຮຽນ-ນັກສຶກສາ ສະມາຊິກສະຫາພັນແມ່ຍິງ ເຂົ້າຢ້ຽມຢາມມູນເຊື້ອແມ່ຍິງລາວ ທີ່ສູນກາງສະຫາພັນແມ່ຍິງລາວ ແລະ ຢູ່ທ້ອງຖີ່ນ ບ່ອນທີ່ມີເງື່ອນໄຂ. ຊຸກຍູ້ຂະບວນການອົບຮົມແນວຄິດ ການຈັດຕັ້ງ ຂໍແຂ່ງຂັນ 3 ດີ ຂອງສະຫາພັນແມ່ຍີງ ຕິດພັນກັບຄຳຂວັນ ຮັກຊາດ ແລະ ພັດທະນາ ຕາມທິດ 3 ສ້າງ ເຂົ້າສູ່ລວງເລີກ. ການປະຕິບັດຫນ້າທີ່ວຽກງານຂອງສະມາຊິກ ແລະ ແມ່ຍິງ ໄປຄຽງຄູ່ກັບການສ້າງຄອບຕົວ ແລະ ບ້ານແມ່ຍິງ 3 ດີ ໃຫ້ເປັນຂະບວນການກວ້າງຂວາງກວ່າເກົ່າ. ເພື່ອຕ້ອນຮັບ ວັນດັ່ງກ່າວ ຈະໄດ້ມີການສ້າງກິດຈະກຳ ປາຖະກາຖາ, ການຈັດງານສຳມະນາ, ໂຄສະນາປະຫວັດສາດ, ມູນເຊື້ອ, ຜົນງານ, ການເຕິບໃຫຍ່ ຂະຫຍາຍໂຕຂອງສະຫະພັນແມ່ຍິງລາວ ແລະ ຮູບການອື່ນໆ ທີ່ຕິດພັນກັບຂະບວນການລວມ ຂອງຊາດ, ຂອງພັກ ໂດຍຜ່ານພາຫານະສື່ມວນຊົນ ໃຫ້ກວ້າງຂວາງ ແລະ ເຂົ້າເຖິງ ທຸກກຸ່ມເປົ້າຫມາຍ. ພ້ອມກັນນັ້ນ ທ່ານນາງ ບັນດິດ ປະທຸມວັນ ຮອງປະທານ ຍັງກ່າວໃຫ້ຮູ້ຕື່ມອີກວ່າ: ໃນວັນທີ 15 ກໍລະກົດ 2017 ທີ່ຈະມາເຖິງນີ້ ສູນກາງສະຫະພັນແມ່ຍິງລາວ ຈະໄດ້ຮ່ວມກັຍສະຫາພັນແມ່ຍິງ ທະນາຄານ ແຫ່ງ ສປປ ລາວ ແລະ ກຸ່ມທະນາຄານ ຈັດພິທີຊຸມນຸມ ເພື່ອຫວນຄືນມູນເຊື້ອ ແລະ ຜົນສຳເລັດດ້ານຕ່າງໆຂອງແມ່ຍິງລາວ ຈັດກິດຈະກຳເດີນແບບເຄື່ອງນຸ່ງຖືຂອງແມ່ຍິງ ແລະ ມ່ວນຊື່ນແບບມວນຊົນ, ນອກນັ້ນ ຍັງມີການວາງສະແດງເຄື່ອງຫັດຖະກຳ ແລະ ອາຫານພື້ນເມືອງລາວ ທີ່ສະຖາບັນການທະນາຄານ ເຂດດົງໂດກ. ແລະ ໃນວັນທີ 19 ກໍລະກົດ ຄະນະບໍລິຫານງານ ແມ່ນຈະໄດ້ມີການວາງກະຕ່າດອກໄມ້ ຕໍ່ຫນ້າອະນຸສອນສະຖານ ປະທານ ໄກສອນ ພົມວິຫານ ແລະ ປະທານ ສຸພານູວົງ ແລະ ບັນດາຜູ້ນຳຮຸ້ນກ່ອນ.
Editor: ກຳປານາດ ລັດຖະເຮົ້າ
