ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ ໄດ້ເປີດຊຸດຝຶກອົບຮົມວຽກງານໂຄສະ ນາ-ປາຖະກາຖາ ຊຸດທີ 2 ຂຶ້ນ, ທີ່ສະຖາບັນເຕັກໂນໂລຊີຂໍ້ມູນ-ຂ່າວສານ. ໂດຍການເປັນປະທານກ່າວເປີດຂອງ ທ່ານ ຄຳພູ ດວງຖະໜອມ ຄະນະພັກກະຊວງ, ຫົວໜ້າກົມຈັດຕັ້ງ- ພະນັກງານ, ກະຊວງ ແລະ ໃຫ້ກຽດເຂົ້າຮ່ວມ ຂອງທ່ານນາງ ພວງມາລີ ອັກຄະມຸນຕີ ຮອງຫົວໜ້າກົມໂຄສະນາ, ຄະນະໂຄສະນາອົບຮົມສູນກາງພັກ ພ້ອມດ້ວຍບັນດານັກສາມະນາກອນ ຈາກບັນດາກົມ/ທຽບເທົ່າ ແລະ ບໍລິສັດ ລັດວິສະຫະກິດ ໄປສະນີ, ໂທລະຄົມມະນາຄົມ ລວມທັງໝົດ 35 ທ່ານ.
ວຽກງານໂຄສະນາເປັນວຽກງານໜຶ່ງທີ່ສຳຄັນ ແລະ ຈຳເປັນທາງດ້ານວຽກງານການເມືອງແນວຄິດ, ເພື່ອຍົກລະດັບຄວາມຮູ້ຄວາມສາມາດ, ຄວາມສຳນານໃນການເວົ້າ-ການນຳສະເໜີ, ການສັງລວມບັນຫາ, ຄວາມສາມາດໃນການຂຽນ ແລະຊ່ວຍເພີ່ມເຕັກນິກສິນລະປະໃນການເວົ້າ. ສະນັ້ນ ກະຊວງ ໄປສະນີ,ໂທລະຄົມມະນາຄົມ ຈິ່ງໄດ້ສົມທົບກັບຄະນະໂຄສະນາອົບຮົມສູນກາງພັກ ເປີດຊຸດຝຶກອົບຮົມໃນຄັ້ງນີ້ ເພື່ອເພີ່ມທະວີຍົກລະດັບຄວາມຮູ້ຄວາມສາມາດໃຫ້ພະນັກງານ ຂັ້ນຮອງຫົວໜ້າກົມ, ຫົວໜ້າ ພະແນກ, ຮອງຫົວໜ້າພະແນກ ພາຍໃນກະຊວງ ແລະ ບັນດາລັດວິສາຫະກິດ ໄປສະນີ ໂທລະຄົມ ຍົກລະດັບຄວາມຮູ້ ດ້ານທິດສະດີ ແລະ ພຶດຕິກຳກ່ຽວກັບວຽກງານໂຄສະນາ - ປາຖະກະຖາ ເປັນຕົ້ນແມ່ນຄວາມເຂົ້າໃຈຕໍ່ການສັງລວມບັນຫາ, ສ້າງຄວາມສາມາດໃນການຂຽນ ແລະ ການເວົ້າ , ການນຳສະເໜີ ໂຄສະນາແບບເຄື່ອນທີ່ ແລະ ຜ່ານສື່ ພ້ອມດ້ວຍບັນດານິຕິກຳຕ່າງໆ ແລະ ບາງບົດຮຽນໃນວຽກງານໂຄສະນາ ຊຶ່ງຈະໄດ້ພ້ອມກັນຄົ້ນຄ້ວາຮ່ຳຮຽນດ້ານທິດສະດີ, ການສົນທະນາ, ພາກປະຕິບັດຕົວຈິງ ແລະເພື່ອຕອບສະໜອງໃຫ້ໄດ້ຄວາມຮຽກຮ້ອງຕ້ອງການ ຂອງໜ້າທີ່ການເມືອງຂອງພັກ ໃນໄລຍະໃໝ່ ແລະ ກໍ່ສ້າງພະນັກງານສືບທອດຕໍ່ວຽກງານດັ່ງກ່າວ ການຝຶກອົບຮົມຄັ້ງນີ້ ຈະໄດ້ດໍາເນີນໄປເປັນເວລາ 10 ວັນ, ລະຫວ່າງວັນທີ 5-18 ກໍລະກົດ 2017. ຈີ່ງຈະໄດ້ປິດລົງ.
Editor: ກຳປານາດ ລັດຖະເຮົ້າ
