ພິທີພົບປະສະມາຄົມໃຫຍ່ຊາວຫວຽດນາມປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ ທີ່ນະຄອນຫຼວງວຽງຈັນ ໃນເມື່ອບໍ່ດົນນີ້ ໂດຍມີ ທ່ານ ວິໄຊ ນະວຽງຈັນ ກໍາມະການສູນກາງແນວລາວສ້າງຊາດ, ປະທານສະມາຄົມຊາວ ຫວຽດນາມ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມຄະນະ, ມີທ່ານ ຮອງປະທານ ແລະ ຄະນະປະຈຳສູນກາງແນວລາວສ້າງຊາດ ພ້ອມດ້ວຍ ພໍ່ແມ່, ພີ່ນ້ອງ ຊາວຫວຽດນາມ ແລະ ນ້ອງນ້ອຍນັກຮຽນ ເຂົ້າຮ່ວມ.
ພິທີພົບປະ ສະມາຄົມໃຫຍ່ຊາວຫວຽດນາມ ຄັ້ງນີ້ ໄດ້ຮັບກຽດເຂົ້າຮ່ວມ ແລະ ໂອ້ລົມໂດຍທ່ານ ໄຊສົມພອນ ພົມ ວິຫານ, ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ເຊິ່ງທ່ານໄດ້ກ່າວວ່າ: ປະຊາຊົນ 2 ຊາດ ລາວ-ຫວຽດນາມ ມີມູນເຊື້ອສາມັກຄີ, ຊ່ວຍເຫຼືອເຊິ່ງກັນ ແລະ ກັນ ມາເປັນເວລາດົນນານການພົວພັນອັນເປັນມູນເຊື້ອດັ່ງກ່າວ ໄດ້ເພີ່ມຄວາມແໜ້ນແຟ້ນ ແລະ ເຕີບໃຫຍ່ກາຍເປັນຄວາມສາມັກຄີພິເສດ ແລະ ການຮ່ວມມືຮອບດ້ານຂອງສອງຊາດ ລາວ-ຫວຽດນາມ ໂດຍແມ່ນປະທານ ໂຮ່ຈີມິນ ແລະ ປະທານ ໄກສອນ ພົມວິຫານ, ປະທານ ສຸພານຸວົງ ເປັນຜູ້ກໍ່ຕັ້ງຂຶ້ນ ແລະ ການນຳແຕ່ລະຮຸ້ນຂອງສອງພັກ, ສອງລັດ ແລະ ປະຊາຊົນສອງຊາດ ຕ່າງກໍ່ໄດ້ເອົາໃຈໃສ່ປັບປຸງເສີມຂະຫຍາຍໃຫ້ກາຍເປັນການພົວພັນສາມັກຄີອັນບໍລິສຸດຜຸດຜ່ອງ ທີ່ຫາຍາກໃນການພົວພັນສາກົນ ແລະ ກາຍເປັນມໍລະດົກອັນລ້ຳຄ່າຂອງຊາດ ລາວ-ຫວຽດນາມ.
ເພື່ອໃຫ້ເຫັນແຈ້ງເຖິງມູນເຊື້ອຄວາມສາມັກຄີ, ການຮ່ວມສໍາພັນສູ້ຮົບ ແລະ ການພົວພັນຮ່ວມມືຮອບດ້ານລາວ-ຫວຽດນາມ, ກໍ່ຄືການຊ່ວຍເຫຼືອເຊິ່ງກັນ ແລະ ກັນ ຂອງຊາວຫວຽດນາມ ກັບ ປະຊາຊົນລາວບັນດາເຜົ່າ ແລະ ເພີ່ມທະວີວຽກງານໂຄສະນາ, ສຶກສາອົບຮົມຄົນຮຸ້ນໜຸ່ມ ໃຫ້ມີຄວາມຮັບຮູ້ເຂົ້າໃຈ ກ່ຽວກັບມູນເຊື້ອຄວາມສາມັກຄີພິເສດ, ການຮ່ວມສຳພັນສູ້ຮົບ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ. ຍົກສູງສະຕິເປັນເຈົ້າ, ປະກອບສ່ວນສະຕິປັນຍາ ແລະ ເຫື່ອແຮງ ເຂົ້າໃນການເພີ່ມພູນຄູນສ້າງສາຍພົວພັນ ລາວ-ຫວຽດນາມ ໃຫ້ຍືນຍົງຂະນົງແກ່ນ. ພັດທະນາຕົນເອງ, ພັດທະນາຄອບຄົວ, ເຂົ້າຮ່ວມປົກປັກຮັກສາ ແລະ ພັດທະນາບ້ານເມືອງທີ່ຕົນອາໃສຢູ່ ແລະ ຊ່ວຍເຫຼືອບ້ານເກີດເມືອງນອນ.
ສໍາລັບ ສະມາຄົມໃຫຍ່ຊາວຫວຽດນາມ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ ໃຫ້ເພີ່ມທະວີການເຕົ້າໂຮມຄວາມສາມັກຄີຂອງຊາວຫວຽດນາມຢູ່ລາວ ສຶກສາອົບຮົມໃຫ້ລູກຫານເຄື່ອນໄຫວທຳມາຫາກິນຢ່າງຖືກຕ້ອງຕາມກົດໝາຍ, ສ້າງສະມາຄົມໃຫຍ່ຊາວຫວຽດນາມ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ໃຫ້ເປັນຕົວແທນແບບທີ່ດີ ໃຫ້ບັນດາສະມາຄົມຊາວຕ່າງດ້າວທີ່ດຳລົງຊີວິດ ແລະ ທຳມາຫາກິນຢູ່ລາວຮຽນຮູ້ນຳ.

Editor: ດາວໄຊ ສີວິໄລ