ພິທີຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກ ປະຊາຊົນ ປະຕິວັດລາວ ສະໃໝສໍາຮອງ ຂອງ 13 ໜ່ວຍພັກອ້ອມຂ້າງເມືອງລະຄອນເພັງ ໄດ້ຈັດຂຶ້ນໃນເມື່ອບໍ່ດົນນີ້ ຢູ່ທີ່ສະໂມສອນເມືອງ ໂດຍການເຂົ້າຮ່ວມເປັນປະທານ ຂອງທ່ານ ພັນຕີ ບຸນທະວີ ພິມມະສານ, ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ, ມີເລຂາໜ່ວຍພັກ ພ້ອມດ້ວຍສະມາຊິກພັກສົມບູນ-ສໍາຮອງ ຂອງ 13 ໜ່ວຍພັກ ແລະ ພາກສ່ວນກ່ຽວຂ້ອງເຂົ້າຮ່ວມ. ທ່ານ ສີຕ້ອຍ ສີດາວົງ, ຕ່າງໜ້າເລຂໜ່ວຍພັກທັງ 13 ໜ່ວຍ ໄດ້ລາຍງານການນໍາພາຮອບດ້ານ ຂອງໜ່ວຍພັກໃນໄລຍະຜ່ານມາ, ຈາກນັ້ນ, ຕາງໜ້າສະມາຊິກພັກສົມບູນຜູ້ຕິດຕາມ ໄດ້ນໍາເອົາມະຫາຊົນກ້າວໜ້າ ຈໍານວນ 27 ທ່ານ, ຍິງ 14 ທ່ານ ເຂົ້າສູ່ພິທີ ພ້ອມທັງລາຍງານຜົນການຕິດຕາມກໍ່ສ້າງມະຫາຊົນກ້າວໜ້າ ນັບແຕ່ມື້ໄດ້ຮັບມອບໝາຍຈາກໜ່ວຍພັກ ໂດຍເຫັນວ່າມະຫາຊົນໄດ້ມີການພັດທະນາຕົນເອງ, ມີຄວາມຫ້າວຫັນຕໍ່ໜ້າທີ່ວຽກງານ, ມີຄຸນທາດການເມືອງໜັກແໜ້ນ, ເຊື້ອໝັ້ນຕໍ່ການນໍາພາຂອງພັກ, ນໍ້າໃຈຮັກຊາດ ແລະ ດໍາລົງຊີວິດປອດໃສຂາວສະອາດ. ຈາກນັ້ນ, ທ່ານ ນາງ ຈັນທະຈອນ ດ້ວງໂພໄຊ, ຫົວໜ້າໜ່ວຍງານກໍ່ສ້າງພັກ ຄະນະຈັດຕັ້ງເມືອງ ໄດ້ຜ່ານມະຕິຕົກລົງຂອງຄະນະປະຈໍາພັກເມືອງ ວ່າດ້ວຍການອະນຸມັດຮັບຮອງເອົາມະຫາຊົນກ້າວໜ້າ ເຂົ້າເປັນສະມາຊິກພັກປະຊາຊົນ ປະຕິວັດລາວ ສະໃໝສໍາຮອງ, ເລຂາໜ່ວຍພັກທັງ 13 ໜ່ວຍຂຶ້ນຈັບມືຮັບເອົາສະມາຊິກສໍາຮອງໃໝ່ຢ່າງເປັນທາງການ. .
ໂອກາດດັ່ງກ່າວທ່ານ ພັນຕີ ບຸນທະວີ ພິມມະສານ ຮອງເລຂາພັກເມືອງ ໄດ້ໂອ້ລົມ ໂດຍທ່ານໄດ້ຍ້ອງຍໍຊົມເຊີຍ ຕໍ່ບັນດາໜ່ວຍພັກ ທີ່ໄດ້ເອົາໃຈໃສ່ນໍາພາຮອບດ້ານ ໂດຍສະເພາະວຽກງານກໍ່ສ້າງ ແລະ ຂະຫຍາຍພັກ, ຍ້ອງຍໍຊົມເຊີຍຕໍ່ສະມາຊິກພັກສໍາຮອງໃໝ່ ທີ່ມີຄວາມບຸກໜ້າບືນຕົວ ໃນການເຝິກຝົນຫຼໍ່ຫຼອມຕົນເອງ ກາຍເປັນຜູ້ມີຄວາມກ້າວໜ້າຫ້າວຫັນ, ມີມາດຖານເງື່ອນໄຂເຂົ້າເປັນສະມາຊິພັກ, ພ້ອມດຽວກັນນີ້ຍັງໄດ້ຮຽກຮ້ອງ ໃຫ້ບັນດາໜ່ວຍພັກຈົ່ງສືບຕໍ່ ໃນການນໍາພາຮອບດ້ານ ໂດຍສະເພາະການກໍ່ສ້າງ ແລະ ຂະຫຍາຍພັກ ຕ້ອງເນັ້ນໃຫ້ໄດ້ທັງປະລິມານ ແລະ ຄຸນນະພາບ, ຮຽກຮ້ອງໃຫ້ສະມາຊິກພັກສໍາຮອງໃໝ່ທຸກທ່ານ ຈົ່ງໄດ້ສືບຕໍ່ເຝິກຝົນຫຼໍລອມຕົນເອງ ເປັນແບບຢ່າງນໍາໜ້າ ໃຫ້ມະຫາຊົນ ເພື່ອເລື່ອນເປັນສະມາຊິກພັກສົມບູນ ໃນອານາຄົດ.
Editor: ດາວໄຊ ສີວິໄລ
