ໃນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນນະຄອນຫລວງວຽງຈັນ ໄດ້ຮັບຮອງເອົາຮ່າງຂໍ້ຕົກລົງວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງໃນໄລຍະໃໝ່ ໂດຍໄດ້ລະບຸເຖິງຫລາຍບັນຫາ ເພື່ອແນໃສ່ສ້າງນະຄອນຫລວງໃຫ້ມີໂສມໜ້າໃໝ່ທີ່ສະອາດຈົບງາມ ແລະ ເປັນຕາ ໜ້າຢູ່ ນັ້ນແມ່ນຄວາມມຸ່ງມາດປາຖະໜາຂອງຊາວນະຄອນຫລວງວຽງຈັນທີ່ຄອງຄອຍມາ.
ຂໍ້ກຳນົດດັ່ງກ່າວໄດ້ລະບຸເຖິງ 4 ຂົງເຂດຄື: ຂົງເຂດອຸດສາຫະກຳ ແລະ ການຄ້າ ປະກອບມີການຈັດສັນບັນດາກິດຈະການທີ່ລົ້ນຕະຫລາດຄືນໃໝ່, ການຂາຍເຄື່ອງນອກທີ່ຕັ້ງທີ່ໄດ້ກຳນົດໄວ້. ສຳລັບ ຂົງເຂດໂຍທາທິການ ແລະ ຂົນສົ່ງ ຈະເລັ່ງຈັດສັນບາງເສັ້ນທາງເດີນລົດຄືນໃໝ່, ການຮື້ຖອນສິ່ງຕໍ່ເຕີມບໍ່ຖືກຕ້ອງກັບແຜນຜັງ ແລະ ສິ່ງຮົກເຮື້ອຕາມຖະໜົນຫລວງ ແລະ ເສັ້ນທາງສຳຄັນໃນເທດສະບານ, ການຮື້ຖອນປ້າຍໂຄສະນາທຸກຊະນິດ ທີ່ບໍ່ຖືກລະບຽບ, ແກ້ໄຂສິ່ງກີດຂວາງຕາມທາງຍ່າງ ແລະ ເຂດສາທາລະນະ ແລະ ການຈັດສັນຄວາມບໍ່ເປັນລະບຽບຮຽບຮ້ອຍໃນກິດຈະການກໍ່ສ້າງ, ສ່ວນຂົງເຂດພະລັງງານ, ບໍ່ແຮ່ ແລະ ໄປສະນີໂທລະຄົມມະນາຄົມແມ່ນຈະເລັ່ງແກ້ໄຂບັນດາສາຍໂທລະສັບ, ສາຍໄຟຟ້າ, ສາຍເຄເບິນຕາມສາຍທາງຫລັກຈຳນວນ 21 ເສັ້ນ, ຕາມຕະຫລາດ ແລະ ຊຸມຊົນ, ສ່ວນຂົງເຂດວັດທະນະທຳ-ສັງຄົມ ຈະເລັ່ງແກ້ໄຂການມົ້ວສຸມດື່ມສິ່ງມືນເມົາ, ສະພາບອາລະວາດຕີກັນ, ຮ້ານຄາລາໂອເກະ, ຮ້ານກາເຟຢອດ ທີ່ລາມົກອານາຈານ ແລະ ສິ່ງຫຍໍ້ທໍ້ອື່ນໆ
ເພື່ອແນໃສ່ແກ້ໄຂຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ເຂດຊານເມືອງ ເຮັດໃຫ້ສັງຄົມມີຄວາມສະຫງົບສຸກ ເພື່ອຍົກສູງບົດບາດຂອງນະຄອນຫລວງວຽງຈັນ ໃຫ້ສົມກັບເປັນນະຄອນຫລວງຂອງ ປະເທດ.
Editor:ດາວໄຊ ສີວິໄລ
