ໃນວັນທີ 11 ກໍລະກົດ 2017 ທີ່ສຳນັກງານໃຫຍ່ ສູນກາງແນວລາວສ້າງຊາດ, ນະຄອນຫລວງວຽງຈັນ, ທ່ານນາງ ຄໍາຈັນ ພົມແສງສະຫວັນ ຮອງປະທານ ສູນກາງແນວລາວສ້າງຊາດ, ຜູ້ຊີ້ນຳວຽກງານໂຄສະນາ ໄດ້ຖະແຫລງຂ່າວ ຜົນສຳເລັດກອງປະຊຸມ 3 ແນວໂຮມ ລາວ-ຫວຽດນາມ-ກຳປູເຈຍ ແລະ ການກະກຽມກອງປະຊຸມສາກົນ ເພື່ອເສີມສ້າງຊາຍແດນສັນຕິພາບ, ມິດຕະພາບລະຫວ່າງ ລາວ-ຫວຽດນາມ ທີ່ຈະຈັດຂຶ້ນ ໃນເດືອນກໍລະກົດນີ້ ເຊິ່ງ ທ່ານ ໄດ້ໃຫ້ຮູ້ວ່າ: ເພື່ອມເສີມຂະຫຍາຍ ສາຍພົວພັນມິດຕະພາບອັນເປັນມູນເຊື້ອ ໃນວັນທີ 25 ມິຖຸນາ 2017 ທີ່ຜ່ານມາ, ທີ່ນະຄອນຫລວງຮ່າໂນ້ຍ ແຫ່ງສາທາລະນະລັດ ສັງຄົມນິຍົມຫວຽດນາມ, ອົງການແນວໂຮມປະເທດຊາດຫວຽດນາມ ໄດ້ເປັນເຈົ້າພາບ ຈັດກອງປະຊຸມປະທານແນວໂຮມ 3 ປະເທດ ລາວ-ຫວຽດນາມ-ກຳປູເຈຍ ຢ່າງເປັນທາງການ, ກອງປະຊຸມໃນຄັ້ງນີ້ ມີຄະນະຜູ້ແທນຂັ້ນສູງຂອງສູນກາງແນວລາວສ້າງຊາດ ນຳໂດຍ ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ, ຄະນະຜູ້ແທນຂັ້ນສູງ ແນວໂຮມປະເທດຊາດຫວຽດນາມ ນຳໂດຍ ທ່ານ ເຈິ່ນແທ່ງ ເມິ້ນ, ປະທານສູນກາງແນວໂຮມ ປະເທດຊາດຫວຽດນາມ ແລະ ຄະນະຜູ້ແທນຂັ້ນສູງແນວໂຮມ ສາມັກຄີ ພັດທະນາມາຕຸພູມກຳປູເຈຍ ນຳໂດຍ ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊຳຣິນ ປະທານສະພາແຫ່ງຊາດ, ປະທານແນວໂຮມສາມັກຄີ ພັດທະນາມາຕຸພູມ ກຳປູເຈຍ.
ກອງປະຊຸມດັ່ງກ່າວ ທັງ 3 ຝ່າຍມີຄວາມຍິນດີເປັນຢ່າງຍິ່ງ ທີ່ໄດ້ພ້ອມກັນຕີລາຄາ ປະເມີນຜົນການຈັດຕັ້ງປະຕິບັດບົດບັດທຶກຊ່ວຍຈຳ ໂຄງການຮ່ວມມືະຫວ່າງ ແນວລາວສ້າງຊາດ ກັບແນວໂຮມປະເທດຊາດຫວຽດນາມ ແລະ ແນວໂຮມສາມັກຄີ ພັດທະນາມາຕຸພູມກຳປູເຈຍ ທີ່ໄດ້ລົງສນາມໃນວັນທີ 18/12/2013 ທີ່ນະຄອນຫລວງວຽງຈັນ ແຫ່ງ ສປປ ລາວ; ພ້ອມນີ້ 3 ຝ່າຍໄດ້ສົນທະນາແລກປ່ຽນ ແລະ ເປັນເອກະພາບກັນເພື່ອສືບຕໍ່ເສີມຂະຫຍາຍ ບັນດາໝາກຜົນທີໄດ້ຮັບໃນ 3 ປີ ທີ່ຜ່ານມາ. ເຊິ່ງອົງການແນວໂຮມ 3 ປະເທດ ສືບຕໍ່ຜັນຂະຫຍາຍ ກ່ຽວກັບການໂຄສະນາ, ສຶກສາອົບຮົມໃຫ້ທຸກຊັ້ນຄົນ ພິເສດຕໍ່ກັບຄົນລຸ້ນໜຸ່ມສືບທອດໃ ຫ້ມີຄວາມຮັບຮູ້ເຂົ້າໃຈຢ່າງເລິກເຊິງ ກ່ຽວກັບມູນເຊື້ອປະຫວັດສາດ ສາຍພົວພັນລະຫວ່າງ ລາວ-ຫວຽດນາມ-ກຳປູເຈຍ ໃຫ້ມີຄວາມເອກອ້າງທະນົງໃຈ ຕໍ່ສາຍພົວພັນອັນດີງາມ, ບໍລິສຸດຜຸດຜ່ອງຂອງສາມປະເທດ; ພ້ອມກັນນີ້, ອົງການແນວໂຮມ 3 ຝ່າຍ ສືບຕໍ່ເພີ່ມທະວີການເປີດກວ້າງ ການພົບປະແລກປ່ຽນມິດຕະພາບ ລະຫວ່າງແນວໂຮມ, ບັນດາອົງການພາຄີຂອງແນວໂຮມ ແລະ ປະຊາຊົນ 3 ປະເທດ ເປັນຕົ້ນແມ່ນການສົ່ງເສີມ ສ້າງເງື່ອນໄຂອຳນວຍຄວາມສະດວກໃຫ້ແນວໂຮມທຸກຂັ້ນ ໂດຍສະເພາະທ້ອງຖິ່ນ ທີ່ມີຊາຍແດນຕິດຈອດກັນໃຫ້ມີການຮ່ວມມືແລກປ່ຽນບົດຮຽນ, ດ້ານວັດທະນະທຳ, ການພັດທະນາເສດຖະກິດ-ສັງຄົມ, ການສ້າງພື້ນຖານໂຄ່ງລ່າງ, ຊ່ວຍເຫລືອພື້ນຟູໄພທຳມະຊາດ ແລະ ເຂົ້າຮ່ວມການເສີມສ້າງຊາຍແດນສັນຕິພາບ, ມິດຕະພາບ, ຮ່ວມມືພັດທະນາໃຫ້ໝັ້ນຄົງ; ພ້ອມທັງໃຫ້ມີການຊຸກຍູ້ສົ່ງເສີມ ໃຫ້ມີການຄ້າຂາຍສິນຄ້າ ທີ່ມີຄຸນນະພາບສູງ ຈາກບັນດາບ້ານ, ເມືອງທີ່ມີຊາຍແດນຕິດຈອດກັນຂອງ 3 ປະເທດ ລາວ-ຫວຽດນາມ-ກຳປູເຈຍ ເພື່ອຮັບປະກັນ ດ້ານສຸຂະພາບຂອງປະຊາຊົນ ແລະ ຜົນປະໂຫຍດດ້ານເສດຖະກິດ ຂອງປະຊາຊົນ ເຊິ່ງແຕ່ລະປີ ຈັດໃຫ້ມີຕະຫລາດ ນັດສາມັກຄີ, ງານວາງສະແດງສິນຄ້າຢູ່ເຂດຊາຍແດນເຮັດໃຫ້ມີການແລກປ່ຽນ ດ້ານການຄ້າຫລາຍຂຶ້ນ.
Editor: ກຳປານາດ ລັດຖະເຮົ້າ
