ໃນວັນທີ 11 ກໍລະກົດ 2017 ທີ່ ກະຊວງກະສິກໍາ ແລະ ປ່າໄມ້, ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ໄດ້ໃຫ້ສໍາພາດປກ່ນັກຂ່າວກ່ຽວກັບ ການສະເຫຼີມ ສະຫຼອງ ວັນປ່ອຍປາ ແລະ ອະນຸລັກສັດນໍ້າສັດປ່າ ແຫ່ງຊາດ, ວັນທີ 13 ກໍລະກົດ 2017 ກໍຄືມື້ອື່ນນີ້, ເຊິງທ່ານໄດ້ຍົກໃຫ້ເຫັນ ຄວາມໝາຍຄວາມສໍາຄັນຂອງວັນດັ່ງກ່າວ, ມາຮອດປະຈຸບັນ ຂະ ແໜງປະມົງ ກໍ່ໄດ້ມີບາງຜົນສໍາເລັດ ທີ່ ພົ້ນເດັ່ນໃນການອານຸລັກສັດນໍ້າ ຄື: ຂໍ້ມູນປີຜ່ານມາໃນທົ່ວປະເທດ ມີວັງສະຫງວນ ຫລາຍກວ່າ 1300 ວັງ, ໄດ້ຂື້ນທະບຽນແລ້ວ 397 ວັງ, ຢູ່ 13 ແຂວງ ທົ່ວປະເທດ.
ທ່ານ ບຸນຂວາງ ຄໍາບຸນເຮືອງ ຍັງໃຫ້ຮູ້ອີກວ່າ: ສປປລາວ ຍັງເປັນປະເທດໜຶ່ງ ທີ່ຍັງມີ ຈໍານວນຊະນິດພັນສັດປ່າ ທີ່ຫາຍາກ ແລະ ໃກ້ຈະສູນພັນຂອງໂລກ ແລະ ນອກນັ້ນຍັງມີ ຊັບພະຍາກອນທໍາມະຊາດອື່ນໆ ທີ່ອຸດົມຮັ່ງມີ ຊຶ່ງເປັນທ່າແຮງໃຫ້ແກ່ການພັດທະນາ ເສດຖະກິດ - ສັງຄົມ ແລະ ເປັນເງືອນໄຂທີ່ດີ ໃຫ້ແກ່ປະຊາຊົນລາວບັນດາເຜົ່າ ໄດ້ນໍາໃຊ້ຊັບພະຍາກອນທໍາມະຊາດເຫຼົ່ານັ້ນ ເຂົ້າໃນການພະລິດ ແລະ ການດໍາລົງຊີວິດໃຫ້ດີຂື້ນ, ສະເພາະປີ 2017 ນີ້ ທ່ານ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ອອກຄໍາສັ່ງ ເລກທີ 2880/ກປ, ສັບບັບເລກທີ 07 ມິຖູນາ 2017 ກ່ຽວກັບການສ້າງຂະບວນການ ປົກປັກຮັກສາ ແລະ ພັດທະນາສັດນໍ້າ - ສັດປ່າ ເນື່ອງໃນໂອກາດ ວັນປ່ອຍປາ ແລະ ອານຸລັກສັດນໍ້າ - ສັດປ່າ ວັນທີ 13 ກໍລະກົດ 2017 ແລະ ເມື່ອມາເຖິງວັນດັ່ງກ່າວຂອງທຸກໆປີ ເປັນວັນປ່ອຍປາ ແລະ ອະນຸລັກສັດນໍ້າສັດປ່າແຫ່ງຊາດ ເຊິ່ງມາຮອດປະຈຸບັນເຫັນໄດ້ວ່າ ວຽກງານດັ່ງກ່າວ ໄດ້ກາຍເປັນຂະບວນການທົ່ວປວງຊົນ ແລະ ຫລາຍພາກສ່ວນໃນສັງຄົມ ກໍ່ໄດ້ມີສ່ວນຮ່ວມ ເປັນຢ່າງດີ ຊຶ່ງເປັນການປະກອບສ່ວນອັນສໍາຄັນ ເຂົ້າໃນການສ້າງຂະບວຮການປູກຈິດສໍານຶກໃຫ້ທົ່ວສັງຄົມ ທຸກພາກສ່ວນ ໂດຍສະເພາະແມ່ນ ອໍານາດການປົກຄອງທ້ອງຖີ່ນ ແລະ ພື້ນຖານປະຊາຊົນ ເພື່ອໃຫ້ມີຄວາມເຂົ້າໃຈກ່ຽວກັບ ຄວາມໝາຍຄວາມສໍາຄັນຂອງການຄຸ້ມຄອງ ຊັບພະຍາກອນປາ ແລະ ສັດນໍ້າ ( ການປະມົງ ) ໃຫ້ມີຄວາມຍືນຍົງ, ລວມທັງເປັນການປະກອບສ່ວນ ໃນການພັດທະນາຂະແໜງການປະມົງຂອງພວກເຮົາ ແນໃສ່ເພື່ອເຮັດໃຫ້ ສາມາດບັນລຸຄາດໝາຍສູ້ຊົນຕ່າງໆ ທີ່ວາງອອກ.
ສະເພາະປີ 2017 ນີ້ ຄາດໝາຍວ່າແຕ່ລະທ້ອງຖີ່ນ ໃນຂອບເຂດທົ່ວປະເທດ ຈະມີການປ່ອຍປາຈໍານວນທັງໝົດ ບໍ່ຫຼຸດ 40 ລ້ານໂຕ ໃສ່ແຫຼ່ງນໍ້າທໍາມະຊາດເຊັ່ນ: ແມ່ນໍ້າຂອງ, ແມ່ນໍ້າສາຂາ, ອ່າງເກັບນໍ້າ, ເຂື່ອນໄຟຟ້າ, ອ່າງເກັບນໍ້າຊົນລະປະທານ, ໜອງ, ບຶງທໍາມະຊາດ, ໜອງປາຊຸມຊົນ ແລະ ດີນບໍລິເວນນໍ້າປະເພດຕ່າງໆ ຢ່າງເປັນຂະບວນຟົດຟື້ນ.
Editor: ກຳປານາດ ລັດຖະເຮົ້າ
