ກອງປະຊຸມຄົບຄະນະບໍລິຫານງານພັກເມືອງລະຄອນເພັງ ເປີດກ້ວາງ ຄັ້ງທີ 7 ສະໄໝທີ VII ຕິດພັນກັບການສະຫຼຸບວຽກງານຈັດຕັ້ງ ແລະ ວຽກງານກວດກາ 5 ປີ 2010-2015. ໄດ້ໄຂຂຶ້ນໃນວັນທີ 13 ກໍລະກົດ ທີ່ຜ່ານມາ ຢູ່ທີ່ສະໂມສອນຂອງເມືອງ ໂດຍການເປັນປະທານ ຂອງທ່ານ ແກ້ວຜາ ສີລາດວງໃຈ, ຮັກສາການເລຂາພັກ-ເຈົ້າເມືອງໆ ລະຄອນເພັງ ມີຄະນະປະຈໍາພັກເມືອງ, ກໍາມະການພັກເມືອງ, ເລຂາຄະນະພັກຮາກຖານ, ເລຂາໜ່ວຍພັກ, ປະທານກວດກາຄະນະພັກຮາກຖານ, ປະທານກວດກາໜ່ວຍພັກ, ຫົວໜ້າຫ້ອງການ-ອົງການທຽບເທົ່າອ້ອມຂ້າງເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ 169 ທ່ານ, ຍິງ 15 ທ່ານ. .
ໃນໂອກາດກ່າວໄຂກອງປະຊຸມທ່ານ ແກ້ວຜາ ສີລາດວງໃຈ ຮັກສາການເລຂາພັກ-ເຈົ້າເມືອງໆ ລະຄອນເພັງ ໄດ້ຍົກໃຫ້ເຫັນຈຸດປະສົງ ແລະ ລະດັບຄາດໝາຍຂອງກອງປະຊຸມ ເຊິ່ງກອງປະຊຸມຄັ້ງນີ້ ຈະໄດ້ແບ່ງອອກເປັນ 2 ວາລະ ຄື: ໃນຄາບເຊົ້າວັນທີ 13 ກໍລະກົດ ແມ່ນຈະໄດ້ຮັບຟັງການສະຫຼຸບຕີລາຄາຄືນ ການຈັດຕັ້ງປະຕິບັດວຽກງານຈັດຕັ້ງ ແລະ ວຽກງານກວດກາໃນໄລຍະ 5 ປີ(2010-2015) ແລະ ທິດທາງແຜນການ 5 ປີ ( 2016-2020), ເຊື່ອມຊືມບົດໂອ້ລົມ ຂອງທ່ານ ປອ ບຸນທອງ ຈິດມະນີ, ກໍາມະການກົມການ ເມືອງສູນກາງພັກ ທີ່ມີຕໍ່ກອງປະຊຸມ ວຽກງານກວດກາທົ່ວປະເທດປີ 2016, ຜ່ານຂໍ້ຕົກລົງວ່າດ້ວຍການຖອນ ແລະ ແຕ່ງຕັ້ງພະນັກງານລົງກໍ່ສ້າງຮາກຖານ ປະຈໍາປີ 2017, ຜ່ານຂໍຕົກລົງສະບັບປັບປຸງ ວ່າດ້ວຍການແບ່ງງານ-ມອບວຽກໃນຄະນະປະຈໍາພັກເມືອງ, ຮັບຟັງບົດສະຫຼຸບວຽກງານກອງທຶນພັກ, ຜ່ານຂໍ້ກໍານົດກອງທືນກິລາ.
ກອງປະຊຸມຈະໄດ້ ຕີລາຄາຄືນການນໍາພາຮອບດ້ານ ຂອງອົງຄະນະພັກເມືອງ ໃນໄລຍະ 6 ເດືອນຕົ້ນປີ ແລະ ພ້ອມທັງວາງແຜນການ 6 ເດືອນທ້າຍປີ 2017. ໂອກາດດຽວກັນນີ້, ທ່ານປະທານກອງປະຊຸມໄດ້ຮຽກຮ້ອງໃຫ້ຜູ້ເຂົ້າຮ່ວມທຸກທ່ານ ຈົ່ງເອົາໃຈໃສ່ຕິດຕາມຮັບຟັງ, ຄົ້ນຄ້ວາ, ເຊີດຊູຄວາມຮັບຜິດຊອບ ແລະ ສຸມທຸກສະຕິປັນຍາ ໃນການປະກອບຄໍາເຫັນໃສ່ບັນດາເນື້ອໃນ ຂອງກອງປະຊຸມໂດຍສະເພາະບັນຫາທີ່ເຫັນວ່າຍັງບໍຄົບຖ້ວນ, ຂໍ້ຄົງຄ້າງ, ວິທີແກ້ໄຂ ແລະ ບັນດາຄາດໝາຍສູ້ຊົນໃນແຕ່ລະຂົງເຂດ. .
ກອງປະຊຸມຄັ້ນີ້ ຈະໄດ້ດໍາເນີນໄປຮອດວັນທີ 14 ກໍລະກົດ 2017 ຈິ່ງຈະໄດ້ອັດລົງ. ສ່ວນຜົນສໍາເລັດຂອງປະຊຸມນໍາສະເໜີໃຫ້ຮູ້ໃນໂອກາດຕໍ່ໄປ.
Editor: ດາວໄຊ ສີວິໄລ
