ສູນກາງສະຫະພັນແມ່ຍິງລາວ ຮ່ວມກັບ ສະຫະພັນແມ່ຍິງ ທະນາຄານແຫ່ງ ສາທາລະນະລັດ ປະຊາ ທິປະໄຕ ປະຊາຊົນລາວ ໄດ້ຈັດພິທີສະເຫຼີມສະຫຼອງ ວັນສ້າງຕັ້ງສະຫະພັນແມ່ຍິງລາວ ຄົບຮອບ 62 ປີ (ວັນທີ 20 ກໍລະກົດ 1955 ຫາ ວັນທີ 20 ກໍລະກົດ 2017 ) ເຊິ່ງໄດ້ຈັດຂຶ້ນໃນວັນທີ 15 ກໍລະກົດ ທີ່ຜ່ານມາ ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ປະລິນຍາເອກ ນາງ ອິນລາວັນ ແກ້ວບຸນພັນ, ກໍາມະການສູນກາງພັກ, ປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີທ່ານ ສົມພາວ ໄພສິດ ກຳມະການສູນກາງພັກ, ຜູ້ວ່າການທະນາຄານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ມີບັນດາລັດຖະມົນຕີ, ຮອງລັດຖະມົນຕີ, ຄະນະພັກຜູ້ຊີ້ນໍາອົງການຈັດຕັ້ງມະຫາຊົນຂອງກະຊວງ-ອົງການ, ພະນັກງານປະຕິວັດອາວຸໂສ, ຄອບຄົວການນຳ,ຄະນະບໍລິຫານງານສະຫະພັນແມ່ຍິງລາວ, ຄະນະນໍາສະຫະພັນແມ່ຍິງບັນດາກະຊວງ, ອົງການຂັ້ນສູນກາງ, ນະຄອນຫຼວງວຽງຈັນ, ນັກທຸລະກິດຍິງ, ຫົວໜ້າກົມ, ຮອງຫົວໜ້າກົມ, ຫ້ອງການ, ຄະນະ ແລະ ສະມາຊິກສະຫະພັນແມ່ຍິງທະນາຄານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ສະມາຊິກສູນກາງສະຫະພັນແມ່ຍິງລາວ ແລະ ບັນດາແຂກຖືກເຊີນທ່ານຍິງ, ທ່ານຊາຍ ເຂົ້າຮ່ວມ.
ເພືີ່ອທົບທວນຫວນຄືນປະຫວັດມູນເຊື້ອການກໍາເນີດ ແລະ ຜົນງານການເຄື່ອນໄຫວຂອງສະຫະພັນແມ່ຍິງລາວ ໃນພາລະກິດຕໍ່ສູ້ປົດປ່ອຍຊາດ ໃນເມືອກ່ອນກໍ່ຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ. ແມ່ຍິງລາວໄດ້ປະກອບສ່ວນຄຽງບ່າຄຽງໄຫຼ່ກັບເພດຊາຍ ເດັດດ່ຽວປະຕິບັດຕາມຄຳຂັວນທີ່ວ່າ: ທຸກສິ່ງທຸກຢ່າງເພື່ອແນວໜ້າ, ທຸກສິ່ງທຸກຢ່າງເພື່ອຕີເອົາຊະນະຈັກກະພັດອາເມລິກາ ແລະ ລູກມື. ສະມາຄົມແມ່ຍິງລາວຮັກຊາດ ກໍ່ໄດ້ຕັ້ງໜ້າປຸກລະດົມ, ເຕົ້າໂຮມຄວາມສາມັກຄີແມ່ຍິງລາວບັນດາເຜົ່າ ໃນທົ່ວເຂດປົດປ່ອຍໃຫ້ເປັນຈິດໜຶ່ງໃຈດຽວ ພາຍໃຕ້ຫົ່ມທຸງຂອງຊາດ ແລະ ຂອງພັກ, ສາມາດຮັບປະກັນວຽກງານແນວຫຼັງປ່ຽນແທນເພດຊາຍທີ່ອອກໄປສະໜາມຮົບ ເຊິ່ງສະແດງອອກແມ່ຍິງລາວມີຄວາມດຸໝັ່ນ, ມີຫົວຄິດປະດິດສ້າງ ໃນການອອກແຮງງານເພີ່ມພູນຜະລິດຜົນ, ປຸກຢ້າງແປງເຮືອນ, ສ້ອມແປງຖະໜົນຫົນທາງທີ່ຖືກທໍາລາຍ ຈາກລູກລະເບີດຂອງພວກຈັກກະພັດອາເມລິກາ, ເອົາໃຈໃສ່ເບິ່ງແຍງລ້ຽງດູ ແລະ ບອກສອນລູກເຕົ້າ ໃຫ້ກາຍເປັນພົນລະເມືອງດີຂອງຊາດ, ຈັດຕັ້ງສອນ ແລະ ຮຽນໜັງສື, ປ້ອງກັນວຽນຍາມເຮືອນຊານບ້ານຊ່ອງ ຮັບປະກັນຄວາມສະຫງົບປອດໄພ.

Editor: ດາວໄຊ ສີວິໄລ