ບັ້ນດຳເນີນຊີວິດການເມືອງ ປັບປຸງປົວແປງພາຍໃນອົງຄະນະພັກແຂວງວຽງຈັນ ໄດ້ໄຂຂຶ້ນມາແຕ່ວັນທີ 29 ມິຖຸນາ ຫາ ວັນທີ 10 ກໍລະກົດ 2017 ແລະ ໄດ້ປິດລົງດ້ວຍຜົນສຳເລັດອັນຈົບງາມ, ໂດຍການເປັນກຽດເຂົ້າຮ່ວມຂອງ ທ່ານ ຈັນສີ ໂພສີຄຳ ກົມການເມືອງສູນກາງພັກ, ຫົວໜ້າ ຄະນະຈັດຕັ້ງສູນກາງພັກ, ທັງເປັນຄະນະຮັບຜິດຊອບ ບັ້ນດຳເນີນຊີວິດການເມືອງ ປັບປຸງປົວແປງພັກຂັ້ນສູນກາງ, ມີບັນດາສະຫາຍໃນຄະນະບໍລິຫານງານພັກແຂວງ, ສະມາຊິກສະພາແຫ່ງຊາດ, ສະພາຂັ້ນແຂວງ, ເລຂາພັກເມືອງ,ຫົວໜ້າພະແນກການ, ອົງການ, ກົມກອງອ້ອມຂ້າງແຂວງ ເຂົ້າຮ່ວມຢ່າງພ້ອມພຽງ.
ທ່ານ ວິດົງ ໄຊຍະສອນ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆວຽງຈັນ ໄດ້ສະຫຼູບສັງລວມວ່າ: ບັ້ນດຳເນີນຊີວິດການເມືອງ ປັບປຸງປົວແປງພາຍໃນພັກຄັ້ງນີ້ ແມ່ນໄດ້ຮັບ ໝາກຜົນສູງ ສາມາດເຫັນໄດ້ດ້ານດີ, ດ້ານອ່ອນ ແລະ ຂໍ້ຄົງຄ້າງທີ່ຈະຕ້ອງໄດ້ແກ້ໄຂ ເປັນຕົ້ນແມ່ນດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ນ້ຳໃຈເສຍສະຫຼະເພື່ອຜົນປະໂຫຍດສ່ວນລວມ, ຄວາມຮັບຜິດຊອບການເມືອງ, ແບບແຜນວິທີນຳພາ ແລະ ວິທີເຮັດວຽກ, ແບບແຜນວິທີດຳລົງຊີວິດ, ຄວາມເປັນແບບຢ່າງຂອງຄະນະພັກ, ຄະນະນຳຈຳນວນໜື່ງ. ຜ່ານການດຳເນີນຊີວິການເມືອງສຳຫຼວດຕີລາຄາຈັດປະເພດເປີດເຜີຍ ແລະ ປິດລັບຂອງຄະນະພັກ,ການນຳຂັ້ນແຂວງ ຈຳນວນ 50 ທ່ານ, ໃນນັ້ນໄດ້ປະເພດແຂງ 86 ສ່ວນຮ້ອຍ, ປະເພດກາງ 14 ສ່ວນຮ້ອຍ, ແຕ່ທາງຄະນະຮັບຜິດຊອບດຳເນີນຊີວິດການເມືອງໄດ້ຕີລາຄາໃນລະດັບ 80 ສ່ວນຮ້ອຍ, ເຫດຜົນຍ້ອນການປະຕິບັດວຽກງານບາງດ້ານບໍ່ໄດ້ຮັບຜົນ (ໂດຍສະເພາະແມ່ນຂົງເຂດເສດຖະກິດ). ໃນບັ້ນດຳເນີນຊີວິດການເມືອງປັບປຸງປົວແປງພາຍໃນພັກຄັ້ງນີ້ ຍັງໄດ້ປະກາດແຕ່ງຕັ້ງໃຫ້ ທ່ານ ດາວເຮືອງ ນັນທະວົງ ຄະນະປະຈຳພັກແຂວງ, ຫົວໜ້າພະແນກການເງິນແຂວງ ຂື້ນມາເປັນຮອງເຈົ້າແຂວງໆວຽງຈັນ.
ໃນໂອກາດທີ່ ທ່ານ ຈັນສີ ໂພສີຄຳ ກົມການເມືອງສູນກາງພັກ,ຫົວໜ້າຄະນະຈັດຕັ້ງສູນກາງພັກ,ທັງເປັນຄະນະຮັບຜິດຊອບບັ້ນດຳເນີນຊີວິດການເມືອງ ປັບປຸງປົວແປງພັກຂັ້ນສູນກາງ ໄດ້ເຂົ້າຮ່ວມ ແລະ ຕິດຕາມການດຳເນີນຊີວິດການເມືອງປັບປຸງປົວແປງພາຍໃນພັກ ຕະຫຼອດໄລຍະ 10 ວັນຜ່ານມາ ແລະ ຜ່ານການຮັບຟັງບົດສະຫຼູບຕີລາຄາດ້ານດີ,ດ້ານອ່ອນ ທີ່ສະຫາຍເລຂາພັກແຂວງໄດ້ລາຍງານມານັ້ນ ທ່ານໄດ້ເນັ້ນໜັກ ໃຫ້ບັນດາສະຫາຍໄດ້ກຳແໜ້ນ ແລະເອົາໃຈໃສ່ໂດຍສະເພາະແມ່ນຄະນະພັກ,ຄະນະນຳແຕ່ລະຂັ້ນ ຕ້ອງມີຄວາມຕັດສິນໃຈສູງ ໃນການຊຸກຍູ້,ສົ່ງເສີມພະນັກງານ-ສະມາຊິກພັກແຕ່ລະ ທ່ານທີ່ຢູ່ໃນຄວາມຮັບຜິດຊອບຂອງຕົນ ໃຫ້ເອົາໃຈໃສ່ຝຶກຝົນຫຼ່ໍຫຼອມຕົນເອງທາງດ້ານຄຸນທາດການເມືອງ ແລະ ຄຸນສົມບັດສິນທຳປະຕິວັດ, ຕັ້ງໜ້າປັບປຸງກໍ່ສ້າງຕົນເອງ ແລະ ກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ,ໜັກແໜ້ນ, ຄະນະພັກແຕ່ລະຂັ້ນຕ້ອງເພີ່ມທະວີປັບປຸງແບບແຜນນຳພາ ແລະ ວິທີເຮັດວຽກທີ່ມີແຜນການ,ມີການກວດກາປະເມີນຜົນໃຫ້ມີຄວາມເຂັ້ມງວດ, ເພີ່ມທະວີວຽກງານສຶກສາອົບຮົມການເມືອງ-ແນວຄິດ ໃຫ້ພະນັກງານສະມາຊິກພັກ, ເພີ່ມທະວີຄວາມສາມັກຄີພາຍໃນຄະນະພັກໃຫ້ແໜ້ນແຟ້ນ ມີຄວາມເປັນເອກະພາບກັນສູງ ໃນການສືບຕໍ່ປັບປຸງປົວແປງພັກໃຫ້ປອດໃສ, ເຂັ້ມແຂງ, ໜັກແໜ້ນ, ເພີ່ມທະວີຄວາມຮັບຜິດຊອບ ແລະ ການນຳພາຂອງຄະນະພັກທຸກຂັ້ນຕໍ່ການສະກັດກັ້ນແກ້ໄຂແນວຄິດເອກະຊົນ, ພະຍາດອາດຍາສິດ ແລະ ການສ້ໍລາດບັງຫຼວງໃຫ້ແທດເຖິງເປັນປົກກະຕິ ຖືເປັນຄວາມຮັບຜິດຊອບໂດຍກົງຂອງຄະນະພັກ ແລະ ພະນັກງານການນຳທຸກຂັ້ນທຸກທ່ານ.
Editor: ກຳປານາດ ລັດຖະເຮົ້າ
