ວັນທີ 12 ກໍລະກົດ 2017 ນີ້ ທີ່ດ່ານດາກຕະອ໋ອກ, ເມືອງດາກຈຶງ, ແຂວງເຊກອງ ໄດ້ຈັດພິທີມອບ-ຮັບ ແລະ ເປີດນຳໃຊ້ ໂຄງການກໍ່ສ້າງດ່ານດາກຕະອ໋ອກ, ເມືອງດາກຈຶງ, ແຂວງເຊກອງ ໂດຍການເຂົ້າຮ່ວມຂອງ ທ່ານ ສີດາ ສຸວັນນະສາຍ ຮອງເລາພັກແຂວງ, ຮອງເຈົ້າແຂວງໆເຊກອງ, ທ່ານ ຮວ່ຽນ ແຄ່ງ ຕວ່ານ ຮອງປະທານຄະນະກຳມະການປະຊາຊົນ ແຂວງກວາງນາມ ສສ ຫວຽດນາມ, ມີທ່ານ ຄຳແສງ ພົມມະແສງ ຫົວໜ້າກົງສຸນໃຫຍ່ແຫ່ງ ສປປ ລາວ ປະຈໍານະຄອນດາໜັງ, ພ້ອມຂະແໜງການກ່ຽວຂ້ອງທັງ 2 ຝ່າຍເຂົ້າຮ່ວມ.
ທ່ານ ຫງວຽນ ຫິວ ຖັງ ຫົວໜ້າກອງບັນຊາການທະຫານຊາຍແດນ ແຂວງກວ່າງນາມ ສສ ຫວຽດນາມ ກ່າວລາຍງານວ່າ: ໂຄງການກໍ່ສ້າງດ່ານດາກຕະອ໋ອກ, ເມືອງດາກຈຶງ ແຂວງເຊກອງ, ແມ່ນໂຄງການຮ່ວມມືລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽນາມ, ໂດຍແມ່ນທຶນຊ່ວຍເຫຼືອລ້າ 100 ສ່ວນຮ້ອຍ ຈາກລັດຖະບານຫວຽດນາມ, ເຊິ່ງໄດ້ອານຸມັດທຶນໃນເດືອນ ພຶດສະພາ ປີ 2014 ແລະ ມອບໃຫ້ ແຂວງເຊກອງ ເປັນຜູ້ປະສານງານ ຄຸ້ມຄອງໂຄງການ ຮ່ວມກັບ ສສ ຫວຽດນາມ,ໂດຍສະເພາະກອງບັນຊາການທະຫານຊາຍແດນ ແຂວງກວາງນາມ ທີ່ ເປັນເຈົ້າຂອງໂຄງການ, ໂຄງການກໍ່ສ້າງດ່ານ ດາກຕະອອກ ໄດ້ເລີ່ມລົງມືກໍ່ສ້າງມາແຕ່ເດືອນ ທັນວາ ປີ 2014 ,ໂດຍ ແມ່ນບໍລິສັດດ້າຍຮົງຟຸກ ເປັນຜູ້ຮັບ ເໝົາກໍ່ສ້າງມູນຄ່າທັງໝົດ 48 ຕື້ກວ່າດົ້ງ, ມີໄລຍະການກໍ່ສ້າງ 2 ປີ, ເປັນປະເພດອາຄານ 2 ຊັ້ນຊົງລາວ ທີ່ມີເອກະລັກສະເພາະ ມີເນື້້ອທີ່ໂຄງການທັງໝົດ 1,300 ຕາແມັດ ມາຮອດປະຈຸບັນ ໜ້າວຽກທັງໝົດແມ່ນກໍ່ສ້າງສຳເລັດແລ້ວ 100ສ່ວຮ້ອຍ, ໂຄງການນີ້ແມ່ນມີຄວາມໝາຍຄວາມສຳຄັນເປັນຢ່າງຍິ່ງ ລະຫວ່າງ ສອງຊາດລາວ-ຫວຽດນາມ, ເພື່ອເປັນການອຳນວຍຄວາມສະດວກໃຫ້ແກ່ປະຊາຊົນທັງສອງປະເທດ, ເວົ້າລວມ - ເວົ້າສະເພາະແມ່ນ 2 ແຂວງເຊກອງ-ກວາງນາມ ໃນການໄປມາຫາສູ່ ແລກປ່ຽນຊື້-ຂາຍສິນຄ້າງນຳກັນ, ພ້ອມທັງເສີມຂະຫຍາຍການພົວພັນຮ່ວມມືຮອບດ້ານ ແລະ ຮັດແໜ້ນສາຍພົວພັນມິດຕະພາບ, ຄວາມສາມັກຄີແບບພິດເສດຂອງ 2 ຊາດໃຫ້ຮຸ່ງເຮືອງສີວິໄລໄປພ້ອມໆກັນ, ທັງເປັນການກະກຽມຂຳນັບຮັບຕ້ອນ ວັນເຊັນສົນທິສັນຍາຮ່ວມມືຮອບດ້ານ ລາວ-ຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ ໃຫ້ເປັນຂະບວນຟົດຟື້ນ.
ໃນຕອນທ້າຍຂອງພິທີ ໄດ້ມີການເຊັນບົດບັນທຶກ ມອບ-ຮັບ ໂຄງການດັ່ງກ່າວຢ່າງເປັນທາງການຂອງທັງສອງຝ່າຍ ຝ່າຍແຂວງເຊກອງ ສປປລາວໂດຍແມ່ນ ທ່ານ ສີດາ ສຸວັນນະສາຍ, ຮອງເຈົ້າແຂວງໆເຊກອງ, ຝ່າຍແຂວງ ກວາງນາມ ສສ ຫວຽດນາມ ໂດຍແມ່ນ ທ່ານ ຮວ່ຽນ ແຄ່ງ ຕວ່ານ ຮອງປະທານຄະນະກຳມະການປະຊາຊົນ ແຂວງກວາງນາມ, ຮ່ວມເຊັນບົດບັນທຶກ ໂດຍມີ ຂະແໜງການກ່ຽວຂ້ອງທັງ 2 ຝ່າຍ ເຂົ້າຮ່ວມເປັນສັກຂີພິຍານ.
Editor: ກຳປານາດ ລັດຖະເຮົ້າ
