ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງບໍລິຄຳໄຊ ຊຸດທີ 1 ໄດ້ໄຂຂຶ້ນຢ່າງເປັທາງການ ໃນວັນທີ 12 ກໍລະກົດ 2017 ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການປົກຄອງແຂວງບໍລິຄຳໄຊ ພາຍໄຕ້ການເປັນປະທານຂອງ ທ່ານ ປະລິນຍາເອກ ສຸວັນນີ ໄຊຊະນະ ຮອງເລຂາພັກແຂວງ, ປະທານສະພາປະຊາຊົນ ແຂວງບໍລິຄຳໄຊ ເປັນກຽດເຂົ້າຮ່ວມໂດຍມີ ທ່ານນາງ ສີໃສ ລືເດດມູນສອນ ກຳມະການສູນກາງພັກ ຮອງປະທານ ສະພາແຫ່ງຊາດ ທັງເປັນສະມາຊິກສະພາແຫ່ງຊາດ ຊຸດທີ່ 8 ປະຈຳເຂດເລືອກຕັ້ງທີ 11 ແຂວງບໍລິຄຳໄຊ, ທ່ານ ປະລິນຍາເອກ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງເຈົ້າແຂວງບໍລິຄຳໄຊ ມີບັນດາທ່ານ ຄະນະປະຈຳສະພາປະຊາຊົນແຂວງ ຄະນະປະຈຳພັກແຂວງ ສະມາຊິກສະພາແຫ່ງຊາດ ປະຈຳສະພາປະຊາຊົນແຂວງ ຫົວໜ້າພະແນກການ ຫ້ອງການພະນັກງານອາວຸໂສບຳນານແລະແຂກຖືກເຊີນເຂົ້າຮ່ວມ 100ກວ່າຄົນ, ກອງປະຊຸມຄັ້ງນີ້ຈະໄດ້ດໍາເນີນເປັນເວລາ 3 ວັນເຕັມ ເພື່ອສຸມໃສ່ຄົ້ນຄ້ວາພິຈາລະນາ ຮັບຮອງເອົາບາງບັນຫາສຳຄັນຂອງແຂວງ ເປັນຕົ້ນ, ຮັບຟັງການລາຍງານຂອງທ່ານ ເຈົ້າແຂວງ ກຽ່ວກັບວຽກງານພົ້ນເດັ່ນທີ່ແຂວງ ໄດ້ຈັດຕັ້ງປະຕິບັດໃນໄລຍະ 6 ເດືອນຜ່ານມາ ແລະ ວຽກງານຈຸດສຸມທີ່ເປັນບູລິມະສິດຂອງແຂວງໃນ 6 ເດືອນທ້າຍປີ 2017 ຮັບຟັງ ແລະ ພິຈາລະນາ ຮັບຮອງເອົາບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2017 ຂອງແຂວງ ຮັບຟັງ ແລະ ພິຈາລະນາຮັບຮອງເອົາບົດລາຍງານການຈັດຕັ້ງປະຕິບັດ ແຜນງົບປະມານ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2017 ຮັບຟັງການລາຍງານຂອງຫົວໜ້າອົງການໄອຍະການ ປະຊາຊົນແຂວງ ກຽ່ວກັບການຍົກສູງຄຸນນະພາບວຽກງານ ຕິດຕາມກວດກາການດຳເນີນຄະດີ ຂອງອົງການສືບສວນ-ສອບສວນ ແລະ ການເຂົ້າຮ່ວມການດຳເນີນຄະດີທີ່ປະຊຸມສານ ຮັບຟັງການລາຍງານຂອງປະທານສານປະຊາຊົນແຂວງ ກຽ່ວກັບການຍົກສູງປະສິດທິພາບການດໍາເນີນຄະດີ ຢູ່ສານຂັ້ນຕົ້ນ ແລະ ຂັ້ນອຸທອນ ທິດທາງປັບປຸງວຽກງານດັ່ງກ່າວ ຮັບຟັງ ແລະ ພິຈາລະນາຮັບຮອງເອົາບົດລາຍງານ ການເຄື່ອນໄຫວຂອງສະພາປະຊາຊົນແຂວງ ແຕ່ກອງປະຊຸມສະໄໝສາມັນເທື່ອທີ 2 ຫາ ເທື່ອທີ 3 ແລະ ທິດທາງແຜາການຫາກອງປະຊຸມສະໄໝສາມັນເທື່ອທີ່ 4 ຂອງສະພາປະຊາຊົນ ແຂວງບໍລິຄຳໄຊ ພິຈາລະນາແຜນການສ້າງນິຕິກຳຂັ້ນແຂວງ ແຕ່ປີ 2017-2020 ຕາມການສະເໜີ ຂອງຄະນະປະຈຳສະພາປະຊາຊົນແຂວງ ພ້ອມນີ້ກອງປະຊຸມຍັງຈະໄດ້ຮັບຟັງການລາຍງານ ຊີ້ແຈງຂອງບັນດາພະແນກການຈຳນວນໜຶ່ງ ຕາມຄຳສະເໜີຂອງປະຊາຊົນ ແລະ ຄຳຖາມເຈາະຈີ້ມຂອງສະມາຊິກ ສະພາປະຊາຊົນແຂວງ ຕື່ມອີກ.
Editor: ກຳປານາດ ລັດຖະເຮົ້າ
