ວັນທີ 13 ກໍລະກົດ 2017 ຜ່ານມານີ້, ໜ່ວຍພັກຫ້ອງການສຶກສາທິການ ແລະ ກິລາເມືອງ ທ່າແຕງ, ແຂວງເຊກອງ. ໄດ້ເປີດກອງປະຊຸມບັ້ນດຳເນີນຊີວິດການເມືອງປັບປຸງປົວແປງພັກ, ຊຶ່ງກອງປະຊຸມນີ້ ໄດ້ຈັດຂຶ້ນຢູ່ທີ່ສະໂມສອນຂອງຫ້ອງການດັ່ງກ່າວ,ໂດຍພາຍໃຕ້ການເປັນປະທານຂອງທ່ານ ຄໍາໄພ ສິມມາວັດ ຮອງເລຂາພັກເມືອງ-ຮອງເຈົ້າເມືອງທ່າແຕງ, ຜູ້ຊີ້ນໍາຂົງເຂດວັດທະນະທໍາ-ສັງຄົມ, ມີທ່ານນາງ ດວງຈັນ ເທບບົວລະບັດ ກໍາມະການພັກເມືອງ ເລຂາໜ່ວຍພັກຫ້ອງການສຶກສາທິການ ແລະ ກິລາເມືອງ, ມີຄະນະໜ່ວຍພັກ ຈາກໂຮງຮຽນປະຖົມສົມບູນ, ມັດທະຍົມຕອນຕົ້ນ-ຕອນປາຍໃນເທດສະບານເມືອງ ພ້ອມດ້ວຍສະມາຊິກພັກສົມບູນ ແລະ ສຳຮອງ ພາຍໃນໜ່ວຍເຂົ້າຮ່ວມ. ໃນກອງປະຊຸມບັ້ນດໍາເນີນຊີວິດການເມືອງປັບປຸງປົວແປງພັກ ທົ່ວໜ່ວຍພັກຫ້ອງການສຶກສາທິການ ແລະ ກິລາ ໃນຄັ້ງນີ້ ບັນດາຄະນະໜ່ວຍພັກ, ສະມາຊິກພັກສົມບູນ, ສຳຮອງທີ່ເຂົ້າຮ່ວມ ໄດ້ຮັບຟັງເຊື່ອມຊຶມການບັນຍາຍເອກະສານ ເດັດດ່ຽວ ປັບປຸງປົວແປງພັກ, ໃຫ້ປອດໃສເຂັ້ມແຂງ ແລະ ໜັກແໜ້ນ ຈາກທ່ານນາງ ດວງຈັນ ເທບບົວລະບັດ ເລຂາໜ່ວຍພັກຫ້ອງການສຶກສາທິການ ແລະ ກິລາເມືອງ, ເຊິ່ງມີເນື້ອໃນເລັ່ງໃສ່ການເສີມຂະຫຍາຍມູນເຊື້ອ, ຜົນງານດ້ານດີຂອງຄະນະພັກ, ໜ່ວຍພັກແລະ ແກ້ໄຂດ້ານອ່ອນ, ຂໍ້ຄົງຄ້າງ,ສິ່ງທ້າທາຍ ໃນໄລຍະ 2 ປີ ຜ່ານມາ, ທີ່ຈະຕ້ອງພ້ອມກັນຫັນປ່ຽນໄປໃນທາງທີ່ຕັ້ງໜ້າໃຫ້ມີຜົນສຳເລັດດີຂຶ້ນກວ່າເກົ່າ, ດ້ວຍຈິດໃຈບຸກທະລຸທັງ 4 ດ້ານ, 5 ຫຼັກມູນການສຶກສາ ແລະ ຍົກສູງຄວາມສາມາດ, ການນຳພາ ແລະ ລັກສະນະນຳໜ້າ ຂອງສະມາຊິກພັກ,ພະນັກງານນຳພາ, ພະນັກງານຄຸ້ມຄອງທຸກສະຫາຍ ໃນການຈັດຕັ້ງປະຕິບັດຫລັກການກໍ່ສ້າງພັກ ໃຫ້ປອດໃສ່ເຂັ້ມແຂງໜັກແໜ້ນ, ມີຫລັກການລວມສູນປະຊາທິປະໄຕ, ຫລັກການຕຳນິຕິຊົມຕົນເອງ, ຕິຊົມກໍ່ສ້າງຊ່ວຍເຫຼືອເຊິ່ງກັນ ແລະ ກັນ ເພື່ອພ້ອມເສີມຂະຫຍາຍຈຸດດີ ພ້ອມກັນຊອກຊ່ອງທາງແກ້ໄຂຈຸດອ່ອນ ແລະ ຂໍ້ຄົງຄ້າງ ໃຫ້ໄປພ້ອມກັບການແກ້ໄຂປະກົດການຫຍໍ້ທໍ້ຕ່າງໆ ທີ່ອາດຈະເກີດຂື້ນຢູ່ໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ.
ທັງນີ້ ກໍ່ເພື່ອເຮັດໃຫ້ພະນັກງານນໍາພາ, ພະນັກງານຄຸ້ມຄອງ ແລະ ສະມາຊິກພັກສົມບູນ-ສຳຮອງ ທຸກສະຫາຍ ມີຄວາມເຂົ້າໃຈແຈ້ງຕໍ່ເນື້ອໃນ, ຈຸດປະສົງເປົ້າໜາຍທີ່ສຳຄັນຂອງເອກະສານດັ່ງກ່າວ ທີ່ຈະນຳໄປຈັດຕັ້ງປະຕິບັດເຂົ້າໃນໜ້າທີ່ວຽກງານຕົວຈິງໃຫ້ມີຜົນສຳເລັດຕາມຈຸດປະສົງ ແລະ ລະດັບຄາດ ໝາຍທີ່ວາງໄວ້. ຊຶ່ງກອງປະຊຸມຄັ້ງນີ້ ຈະດຳເນີນໄປຈົນເຖິງວັນທີ 19 ກໍລະກົດ 2017 ຈິ່ງຈະສໍາເລັດ.
Editor: ກຳປານາດ ລັດຖະເຮົ້າ
