ເພື່ອຢັ້ງຢືນເຖິງຜົນສໍາເລັດໃນການປະຕິບັດໜ້າທີ່ວຽກງານແບບຮອບດ້ານຂອງໜ່ວຍພັກຄະນະຊາວໜຸ່ມແຂວງສາລະວັນ ໃນທ້າຍອາທິດຜ່ານມາ ໜ່ວຍພັກຄະນະຊາວໜຸ່ມແຂວງສາລະວັນ ໄດ້ເປີດກອງປະຊຸມ ເພື່ອຢັ້ງຢືນເປັນໜ່ວຍພັກເຂັ້ມແຂງຮູ້ນຳພາຮອບດ້ານ ຄັ້ງທີ IV ຕໍ່ເນື່ອງ ທີ່ແຂວງສາລະວັນ, ເປັນກຽດເຂົ້າຮ່ວມຂອງທ່ານ ນາງ ບຸນທະວີ ດວງລາສີ, ຄະນະປະຈໍາພັກແຂວງ, ປະທານສະຫະພັນແມ່ຍິງແຂວງ, ຜູ້ຊີ້ນໍາອົງການຈັດຕັ້ງມະຫາຊົນຂັ້ນແຂວງ, ມີຕາງໜ້າຈາກຄະນະພັກ, ຄະນະກວດກາແຂວງ, ຄະນະຈັດຕັ້ງແຂວງ, ອົງການຈັດຕັ້ງມະຫາຊົນ ພ້ອມດ້ວຍສະມາຊິກພັກ ແລະ ພະນັກງານ-ລັດຖະກອນ ພາຍໃນຫ້ອງການເຂົ້າຮ່ວມທັງໝົດ 29 ທ່ານຍິງ 13 ທ່ານ.
ກອງປະຊຸມຄັ້ງນີ້ ແມ່ນໄດ້ຮັບຟັງບົດສະຫຼຸບ ແລະ ທິດທາງແຜນການໃນການຈັດຕັ້ງປະຕິບັດໜ່ວຍພັກເຂັ້ມແຂງ-ຮູ້ນຳພາຮອບດ້ານ ເຊິ່ງສະເໜີໂດຍທ່ານ ຈັນສີລອນ ສີສົມບູນ ກຳມະການພັກແຂວງ ຄະນະບໍລິຫານງານຊາວໜຸ່ມແຂວງ ສາລະວັນ ເຊິ່ງສະແດງໃຫ້ເຫັນຕະຫຼອດໄລຍະຜ່ານມາ ໜ່ວຍພັກຄະນະຊາວໜຸ່ມແຂວງ ໄດ້ຖືສໍາຄັນໃນການຈັດຕັ້ງປະຕິບັດຕາມສອງມາດຕະຖານໃຫຍ່ຄື: ການສ້າງໜ່ວຍພັກເຂັ້ມແຂງທັງ 4 ດ້ານ, ມີດ້ານການເມືອງ, ດ້ານແນວຄິດ, ດ້ານການຈັດຕັ້ງ, ດ້ານແບບແຜນການນຳພາ ແລະ ຮູ້ນຳພາຮອບດ້ານຕາມ 5 ເນື້ອໃນຄື: ຮູ້ນໍາພາຮອບດ້ານການເມືອງແນວຄິດ, ຮູ້ນຳພາຮອບດ້ານເສດຖະກິດ-ວັດທະນະທຳສັງຄົມ, ຮູ້ນຳພາວຽກງານປ້ອງກັນຊາດ-ປ້ອງກັນຄວາມສະຫງົບ, ຮູ້ນຳພາວຽກງານກໍ່ສ້າງພັກ-ກໍ່ສ້າງພະນັກງານ ແລະ ສະມາຊິກຊາວໜຸ່ມ. ນ້ອງນ້ອຍເຍົາວະຊົນ-ອະນຸຊົນຢ່າງເປັນປົກກະຕິຕ່າງໆ. ກົດລະບຽບ ແລະ ຂໍ້ແຂ່ງຂັນ 4 ບຸກຂອງຄະນະຊາວໜຸ່ມປະຊາຊົນປະຕິວັດລາວ ເຊິ່ງປະຕິບັດໄດ້ 45 ຄັ້ງ, ມີຈຳນວນພົນເຂົ້າຮ່ວມ 23,400 ເທື່ອຄົນ, ໄດ້ຖືເອົາວຽກງານສ້າງຂະບວນການຕິດພັນກັບການສ້າງວຽກເຮັດງານທຳ ແລະ ສິດຜົນປະໂຫຍດອັນຊອບທຳຂອງຊາວໜຸ່ມ-ເຍົາວະຊົນ ດ້ວຍການຫັນມະຕິ, ຫັນວຽກເປັນແຜນການ, ໂຄງການລະະອຽດ ພ້ອມນັ້ນ ກໍ່ໄດ້ປັບປຸງການຈັດຕັ້ງ ແລະ ແບບແຜນວິທີເຮັດວຽກ ເພື່ອໃຫ້ເຂັ້ມແຂງກວ່າເກົ່າ, ໜ່ວຍພັກຄະນະຊາວໜຸ່ມແຂວງມີສະມາຊິກພັກທັງໝົດ 16 ທ່ານ, ສຳຮອງ 2 ທ່ານ, ມີໜ້າຕົວຈິງ 13 ທ່ານ, ທົ່ວແຂວງມີຊາວໜຸ່ມ 114,400 ກວ່າທ່ານ, ຍິງ 57,600 ກວ່າທ່ານ, ມີໜ່ວຍຮາກຖານຊາວໜຸ່ມທັງໝົດ 52 ຮາກຖານ, ອ້ອມຂ້າງເມືອງ 134 ໜ່ວຍ, ໂຮງຮຽນ 137 ໜ່ວຍ, ສາມາດຮັບຊາວໜຸ່ມຕົວແບບ 4 ບຸກໄດ້ 275 ໜ່ວຍ, ສ້າງກອງ 3 ດີ 4 ຮູ້ຂອງເຍົາວະຊົນທັນວາໄດ້ 26 ກອງ ແລະ ສ້າງກອງນໍາໜ້າ 7 ກອງ.
ນອກນັ້ນ ໃນຕອນທ້າຍພິທີ ທ່ານ ນາງ ບຸນທະວີ ດວງລາສີ ຍັງໄດ້ໂອ້ລົມຊີ້ທິດເຍືອງທາງ ແລະ ກໍ່ໄດ້ເນັ້ນໜັກຫຼາຍບັນຫາ ເຊັ່ນ: ໃຫ້ຄະນະຊາວໜຸ່ມແຂວງຕ້ອງເປັນເຈົ້າການໃນການສຶກສາຮົບຮົມການເມືອງ-ແນວຄິດເຊື່ອມຊຶມມະຕິຄຳສັ່ງຕ່າງໆ ຂອງຂັ້ນເທິງໃຫ້ສະມາຊິກພັກ, ພະນັກງານ ແລະ ສະມາຊິກຊາວໜຸ່ມ-ໄວໜຸ່ມ ຕະຫຼອດຮອດນ້ອງນ້ອຍເຍົາວະຊົນໃຫ້ເລິກເຊິ່ງທົ່ວເຖິງ.
Editor: ດາວໄຊ ສີວິໄລ
