ພິທີເປີດງານບຸນມະໂຫລານ ມິດຕະພາບ ລາວ-ຫວຽດນາມ ຄັ້ງທີ 4 ໄດ້ຈັດຂື້ນໃນວັນທີ 17 ກໍລະກົດ 2017 ນີ້ ທີ່ຫໍປະຊຸມແຫ່ງຊາດ ໂດຍໃຫ້ກຽດເຂົ້າຮ່ວມພິທີ ຄັ້ງນີ້ ມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ, ມີບັນດາການນຳພັກ-ລັດ, ກະຊວງ, ບັນດາກົມກອງ, ສະຖາບັນ, ສະມາຄົມ ແຂກທີ່ກ່ຽວຂອງ ລາວ ແລະ ຫວຽດນາມ ເຂົ້າຮ່ວມ ຢ່າງພ້ອມພຽງ.
ສປປ ລາວ ແລະ ສາທາລະນະລັດ ສັງຄົມນິຍົມຫວຽດນາມ ມີມູນເຊື້ອຊ່ວຍເຫລືອ ເຊີ່ງກັນ ແລະ ກັນມາແຕ່ດົນນານ. ມີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ທີ່ເປັນມູນເຊື້ອ ລະຫວ່າງ ສອງຊາດ ລາວ-ຫວຽດນາມ ແບບຫາຍາກໃນການພົວພັນສາກົນ. ເຊີ່ງໄດ້ກາຍເປັນມໍລະດົກອັນລ້ຳຄ່າ ເປັນກົດເກນແຫ່ງການຄົງຕົວ ແລະ ຂະຫຍາຍຕົວ ຂອງສອງປະເທດ, ເປັນຫນຶ່ງໃນບັນດາປັດໄຈຕັດສິນໄຊຊະນະ ຂອງການປະຕິວັດ ຂອງສອງປະເທດ. ຄວາມສາມັກຄີແບບພິເສດຂອງສອງຊາດ ລາວ-ຫວຽດນາມ ໄດ້ສະແດງອອກຢ່າງເລີກເຊີ່ງ ຜ່ານບົດກອນລືຊື່ຂອງ ປະທານໂຮ່ຈິມິນ ທີ່ວ່າ: ຮັກຫອມກັນຫມາຍຫມັ້ນ, ຫລາຍສັນພູກໍ່ປິນໄຕ່, ຫລາຍນ້ຳໃຫຍ່ ແລະ ໂຄກຄ້ອຍ, ຂວາງກັ້ນກໍ່ດຸ່ງໄປ, ສອງຊາດລາວ-ຫວຽດນາມໄດ້ ຝັງຄວາມຮັກຢູ່ໃນໃຈ, ຮົງຮ່າທັງແມ່ຂອງ, ບໍ່ເລີກປຸນປານໄດ້. ແລະ ກາບກອນຂອງປະທານ ໄກສອນ ພົມວິຫານ ທີ່ວ່າ: ຕາບໃດສາຍນ້ຳຂອງ ບໍ່ເຫືອດແຫ້ງ ຂາດເຂີນເປັນຊາຍ, ສາຍພູຫລວງແສນສູງ ບໍ່ຕ່ຳເປັນຄັ້ງຫຍ້າ, ຮົງຮາວັງເວີນກວ້າງ ບໍ່ແປນດິນກະທ້າງໄຂ່, ສອງຫົວໃຈ ລາວ-ຫວຽດນາມ ພີ່ນ້ອງ ບໍ່ໄກຂ້າງຫ່າງກັນ. ພ້ອມນີ້ກໍ່ຍັງມີ ຄຳເວົ້າຂອງປະທານສູພານູວົງ ທີ່ວ່າ: ຄວາມສາມັກຄີມິດຕະພາບ ລາວ-ຫວຽດນາມ ສູງກວ່າພູທີ່ສູງທີ່ສຸດ, ຍາວກວ່າແມ່ນ້ຳ, ກວ່າງກວ່າມະຫາສະຫມຸດ, ແຈ້ງກວ່າເດືອນເພັງ ແລະ ຫອມຫວນກວ່າດອກໄມ້ ທີ່ຫອມກວ່າຫມູ່ຫມົດ.
ພັກ-ລັດ ແລະ ປະຊາຊົນລາວ ບັນດາເຜົ່າ ມີຄວາມປິຕີຊົມຊື່ນ ຢ່າງຍິ່ງ ຜ່ານຂະບວນວິວັດແຫ່ງການພົວພັນ ສອງປະເທດ ໄດ້ເຮັດໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ທີ່ປະທານໂຮ່ຈິມິນ ຜູ້ນຳທີ່ແສນຍິ່ງໃຫຍ່ ຂອງ ປະຊາຊົນ ຫວຽດນາມ, ປະທານ ໄກສອນ ພົມວິຫານ ແລະ ປະທານ ສຸພານຸວົງ ຜູ້ນຳທີ່ແສນເຄົາລົບຮັກຂອງປະຊາຊົນລາວ ເປັນຜູ້ກໍ່ຕັ້ງ ແລະ ໄດ້ຮັບການສຶບທອດ ເພີ່ມພູນຄູນສ້າງ ຖະນຸຖະຫນອມ ການນຳແຕ່ລະລຸ້ນ ໄດ້ຮັບປົກປັກຮັກສາ ແລະ ເສີມຂະຫຍາຍ ຢ່າງບໍ່ຢຸດຢັງ ເຖິງວ່າ ສະພາບການສາກົນ ຈະມີການປ່ຽນແປງ ໄປຢ່າງສັບສົນ ສະຫລັບສັບຊ້ອນ ແຕ່ນ້ຳໃຈອັນບໍລິສຸດຜຸດຝ່ອງ ລາວ-ຫວຽດນາມ ຍັງໄດ້ຮັບການເສີມຂະຫຍາຍ ແລະ ນັບມື້ ນັບແຕກດອກອອກຜົນ ເຮັດໃຫ້ທຸກຂົງເຂດວຽກງານ ປະກອບສ່ວນອັນສຳຄັນ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ຂອງ ສອງປະເທດ ລາວ-ຫວຽດນາມ ກໍ່ຄືການປະກອບສ່ວນເຂົ້າໃນການເສີມສ້າງສັນຕະພາບ, ສະຖຽນລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.
ພັກ-ລັດ ແລະ ປະຊາຊົນ ລາວ ຍາມໃດກໍ່ຖືສົນທິສັນຍາ ມິດຕະພາບ ແລະ ການຮ່ວມມື ລາວ-ຫວຽດນາມ ເປັນຂິດຫມາຍປະຫວັດສາດອັນສຳຄັນ ໃນການພົວພັນ ລະຫວ່າງ ລາວ-ຫວຽດນາມ ເຊີ່ງສອງຝ່າຍໄດ້ຕົກລົງບັນຫາ ທີ່ເປັນພື້ນຖານທາງດ້ານກົດຫມາຍ ແລະ ການເມືອງ ແຫ່ງການພົວພັນ ສອງພັກ, ສອງລັດ ໃນໄລຍະໃຫມ່. ສົນທີສັນຍາດັ່ງກ່າວ ຍັງແມ່ນຫມາກຜົນລວມຍອດ ແຫ່ງການຕໍ່ສູ່ປະຕິວັດ ຂອງ ສອງປະເທດ ລາວ-ຫວຽດນາມ ອ້າຍນ້ອງ. ທີ່ໄດ້ຄຽງບ່າ-ຄຽງໄລ່ ຮ່ວມຂຸມຄອງອັນດຽວກັນ, ສາຍສຳພັນ ລາວ-ຫວຽດນາມ ໄດ້ຮ່ວມທຸກ-ຮ່ວມສຸກ ຮ່ວມເປັນ-ຮ່ວມຕາຍນຳກັນ ຜ່ານຜ່າຄວາມຫຍຸ້ງຍາກລຳບາກ ນານາປະການ ໃນແປວໄຟແຫ່ງການຕໍ່ສູ້ເອົາໄຊຊະນະ ຜູ້ຮຸກຮານ ແລະ ຍາດໄດ້ເອົາໄຊຊະນະອັນຍິ່ງໃຫຍ່ ແລະ ສະຫງ່າອົງອາດທີ່ສຸດ. ເພື່ອສຶບຕໍ່ ເສີມຂະຫຍາຍສາຍພົວພັນມິດຕະພາບ ທີ່ເປັນມູນເຊື້ອ, ຄວາມສາແບບພິເສດ ແລະ ການຮ່ວມມືຮອບດ້ານ ລະຫວ່າງ ສປປ ລາວ ແລະ ສສ ຫວຽດນາມ ເຂົ້າສູ່ລວງເລີກ, ຕິດແທດຕົວຈິງ ແລະ ມີປະສິດທິຜົນ ລັດຖະບານສອງປະເທດ ລາວ-ຫວຽດນາມ ໄດ້ສຸມໃສ່ສົມທົບກັບການຈັດຕັ້ງຜັນຂະຫຍາຍ ສັນຍາວ່າດ້ວຍການຮ່ວມມື ທະວີພາຄີສອງຝ່າຍ ໄລຍະຍາວ 2015-2020 ສ້າງບາດກ້າວບຸທະລຸຍ່າງຕັ້ງຫນ້າ ໃຫ້ແກ່ການພົວພັນ ສອງປະເທດ.
Editor: ກຳປານາດ ລັດຖະເຮົ້າ
