ໃນວັນທີ 17 ກໍລະກົດ 2017 ທີ່ຜ່ານມາ, ທີ່ສຳນັກງານສູນກາງສະຫະພັນກຳມະບານລາວ ໄດ້ຈັດງານຖະແຫລງຂ່າວ ເປີດນຳໃຊ້ເບີ ສາຍດ່ວນ 1512 ແລະ ເຟສບຸກໃຫ້ຄຳປຶກສາແກ່ສະມາຊິກກຳມະກຳບານ, ກຳມະກອນ, ຊາວຜູ້ອອກແຮງງານ ກ່ຽວກດັບການນຳໃຊ້ແຮງງານ, ການເອົາປຽບທາງດ້ານແຮງງານ ແລະ ບັນຫາຕ່າງໆທີ່ກ່ຽວຂ້ອງກັບຜູ້ອອກແຮງງານ ດ້ານຕ່າງໆ, ງານຖະແຫລງຂ່າວ ຄັ້ງນີ້ ໂດຍການເປັນປະທານຂອງທ່ານ ສີມູນ ອຸ່ນລາສີ ຮອງປະທານສູນກາງສະຫະພັນ ກຳມະບານລາວ ເຂົ້າຮ່ວມ ມີສື່ມວນຊົນຈາກທຸກພາກສ່ວນ.
ທ່ານ ສີມູນ ອຸ່ນລາສີ ຮອງປະທານສູນກາງກຳມະບານລາວ ກ່າວວ່າ: ອົງການກຳມະບານລາວ ແມ່ນອົງການຈັດຕັ້ງມະຫາຊົນ ຫນຶ່ງ ທີ່ກວ້າງຂວາງ ມີພາລະບົດບາດ-ສິດ ຫນ້າທີ່ທຽບເທົ່າກັບບັນດາອົງການຈັດຕັ້ງພັກ-ລັດ. ອົງການຈັດຕັ້ງມະຫາຊົນອື່້ນໆ ຂອງລະບົບການເມືອງ ໃນ ສປປ ລາວ, ແລະ ຍັງເປັນອົງການຜູ້ຕາງຫນ້າຂອງຊາວຜູ້ອອກແຮງງານ ເຊິ່ງມີພາລະບົດບາດໃນການປົກປ້ອງຜົນປະໂຫຍດອັນຊອບທຳ ຂອງສະມາຊີກກຳມະບານ ແລະ ຊາວຜູ້ອອກແຮງງານ, ສຶກສາອົບຮົມຜູ້ອອກແຮງງານລາວ ໃຫ້ເປັນພົນລະເມືອງດີ, ເປັນຜູ້ອອກແຮງງານທີ່ດີ, ມີລະບຽບວິໄນໃນການອອກແຮງງານ, ເຂົ້າຮ່ວມໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ໂດຍສະເພາະແມ່ນຢູ່ໃນຫົວຫນ່ວຍແຮງງານ.
ການເປີດນຳໃຊ້ ສາຍດ່ວນ 1512 ຂອງສູນກາງກຳມະບານລາວ ເປີດໃຫ້ບໍລິການ ນັບແຕ່ວັນ ຈັນ-ສຸກ ເວລາ 8 ໂມງເຊົ້າ ເຖິງ 16 ໂມງແລງ. ໂດຍບໍ່ເສຍຄ່າໂທໃດໃດ ໃນທຸກເຄືອຂ່າຍ. ແລະ ອອກຊ້ອງທາງຫນຶ່ງ ທ່ານສາມາດຕິດຕໍ່ ເບິ່ງຂໍ້ມູນ ແລະ ມີຄຳເຫັນ ຫລື ຕັ້ງຄຳຖາມ ເພື່ອສອບຖາມ ກ່ຽວກັບວຽກງານດ້ານແຮງງານ ແລະ ດ້ານກຳມະບານ ຜ່າ່ນທາງ ສື່ ເຟສບຸກ ຂອງສູນກາງສະຫະພັນກຳມະບານລາວ ໄດ້ຕະຫລອດ 24 ຊົ່ວໂມງ.
1. ວຽກງານກຳມະບານ
- ກຳມະບານສາມາດຊ່ວຍຫຍັງທ່ານໄດ້ແດ່
- ເປັນສະມາຊິກກຳມະບານ ໄດ້ຜົນປະໂຫຍດ ແລະ ມີພັນທະແນວໃດ
2. ກ່ຽວກັບລະບຽບແຮງງານ
- ເວລາການເຮັດວຽກ, ເວລາພັກຜ່ອນ, ວັນພັກຕ່າງໆ ທີ່ຖືກຕ້ອງຕາມກົດຫມາຍ
- ລະບົບເງີນເດືອນ ຫລື ຄ່າແຮງງານ ຂອງຊາວຜູ້ອອກແຮງງານ ໃນຫົວຫນ່ວຍແຮງງານ ( ຄ່າແຮງງານຂັ້ນຕ່ຳສຸດທີ່ລັດຖະບານປະກາດໃຊ້ ໃນແຕ່ລະໄລຍະ )
- ການເຮັດວຽກນອກໂມງ ຫລື ໂອທີ ແລະ ວິທີການຄິດໄລ່ ເງີນເພີ່ມໂມງ.
- ສັນຍາແຮງງານ, ການຍົກເລີກສັນຍາ ທີ່ຖືກຕ້ອງ, ບໍ່ຖືກຕ້ອງ ແລະ ການຮຽກຮ້ອງເງີນອຸດຫນູນ ໃນເວວລາ ຖືກຍົກເລີກສັນຍາ, ເມື່ອເກີດຂໍ່ຂັດແຍ່ງ ທາງດ້ານແຮງງານ ລະຫວ່າງ ຜູ້ໃຊ້ແຮງງານ ໃນຫົວຫນ່ວຍແຮງງານ ຕ່າງໆ,
- ນອກຈາກນັ້ນ ກໍ່ຍັງມີຫລາຍໆວຽກງານ ກ່ຽວກັບວຽກງານປະກັນສັງຄົມ, ວຽກງານເຄື່ອນຍ້າຍແຮງງານທີ່ປອດໄພ ແລະ ການຕ້ານການຄ້າມະນຸດ
Editor: ກຳປານາດ ລັດຖະເຮົ້າ
