ໜ່ວຍສະຫະພັນແມ່ຍິງ, ສະຫະພັນນັກຮົບເກົ່າ ແຂວງເຊກອງ ໄດ້ຈັດຕັ້ງພິທີປະຖະກະຖາ ວັນສ້າງຕັ້ງສະຫະພັນແມ່ຍິງລາວຄົບຮອບ 62 ປີ ເພື່ອຫວນຄືນມູນເຊື້ອການກຳເນີດເຕີບໃຫຍ່ຂະຫຍາຍຕົວ ແລະ ຜົນງານອັນໃຫຍ່ຫຼວງທີ່ສະຫະພັນແມ່ຍິງລາວຍາດມາໄດ້ ທັງເປັນການສະແດງຄວາມຮູ້ບຸນຄຸນເຖິງແມ່ຍິງລາວບັນດາເຜົ່າທີ່ໄດ້ອຸທິດຕົນ ເພື່ອພາລະກິດຕໍ່ສູ້ປົດປ່ອຍຊາດ.
ພິທີດັ່ງກ່າວ ໄດ້ຈັດຂຶ້ນໃນວັນທີ 19 ກໍລະກົດ 2017 ທີ່ຫ້ອງປະຊຸມສະຫະພັນນັກຮົບແຂວງ ໂດຍການເປັນປະທານຂອງ ທ່ານ ສອນນີ ເງື່ອມດາເລີນ ຮອງປະທານສະຫະພັນນັກຮົບເກົ່າແຂວງ, ທ່ານ ນາງ ມະນີວອນ ສາຍນ້ຳລິນ ຄະນະບໍລິຫານງານສະຫະພັນແມ່ຍິງແຂວງ, ມີພະນັກງານຫຼັກແຫຼ່ງ ແລະ ສະມາຊິກສະຫະພັນແມ່ຍິງພາຍໃນໜ່ວຍເຂົ້າຮ່ວມ.
ທ່ານ ນາງ ອິນທະຫວາ ສຸວັນດີ ປະທານໜ່ວຍສະຫະພັນແມ່ຍິງ, ຫ້ອງການສະຫະພັນນັກຮົບເກົ່າ ແຂວງເຊກອງ ກ່າວວ່າ: ກ່ອນໜ້ານີ້ 62 ປີຄື ວັນທີ 20 ກໍລະກົດ 1955 ເພື່ອຕອບສະໜອງຄວາມຕ້ອງການພາລະກິດຕໍ່ສູ້ປົດປ່ອຍຊາດ, ພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນ ໃນວັນທີ 22 ມີນາ 1955 ໂດຍແມ່ນ ປະທານ ໄກສອນ ພົມວິຫານ ຜູ້ນຳທີ່ເຄົາລົບຮັກເປັນຜູ້ປະກາດສ້າງຕັ້ງ ເພື່ອຮັບຜິດຊອບໂດຍກົງ ຕໍ່ ພາລະກຳ ປະຫວັດສາດຂອງການປະຕິວັດ, ພາຍໃຕ້ການນຳພາຂອງພັກ ແລະ ໄດ້ຮັບຜົນສະທ້ອນຈາກຂະບວນການຕໍ່ສູ້ປະຕິວັດຂອງແມ່ຍິງໃນທົ່ວໂລກ ທີ່ເລັ່ງທວງໃຫ້ປະຕິບັດສິດເສລີພາບ, ຄວາມສະເໝີພາບລະຫວ່າງຍິງ-ຊາຍທາງດ້ານການເມືອງ, ເສດຖະກິດ ແລະ ວັດທະ ນະທຳ-ສັງຄົມ. ອົງການຈັດຕັ້ງແມ່ຍິງຂັ້ນຮາກຖານຈຶ່ງໄດ້ເກີດຂຶ້ນ ໂດຍເລີ່ມຈາກການຈັດຕັ້ງໜ່ວຍແມ່ຍິງນັກຮົບຢູ່ຊົນນະບົດ, ໜ່ວຍຍຸວັນນາລີ ຢູ່ຕາມຕົວເມືອງ ຊຶ່ງການຈັດຕັ້ງດັ່ງກ່າວໄດ້ເຄື່ອນໄຫວ ແລະ ເຕີບໃຫຍ່ຂະຫຍາຍຕົວນັບມື້ນັບກວ້າງຂວາງ.
ພາຍຫຼັງປະເທດຊາດໄດ້ຮັບການປົດປ່ອຍ ແລະ ສະຖາປານາ ສປປ ລາວ ໃນວັນທີ 2 ທັນວາ 1975 ເປັນຕົ້ນມາ ແມ່ນໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອສືບຕໍ່ປະຕິບັດ 2 ໜ້າທີ່ດັ່ງກ່າວ ສະຫະພັນແມ່ຍິງລາວໄດ້ປະກອບສ່ວນຢ່າງຕັ້ງໜ້າໃນການປະຕິບັດໜ້າທີ່ການເມືອງທີ່ໄດ້ຮັບມອບໝາຍ ເພື່ອນຳພາປະເທດຊາດກ້າວໄປສູ່ຄວາມຈະເລີນຮຸ່ງເຮືອງ ແລະ ສີວິໄລຂຶ້ນເລື້ອຍໆຕາມແນວທາງຂອງພັກວາງອອກ.
Editor: ກຳປານາດ ລັດຖະເຮົ້າ
