ພິທີໂຮມຊຸມນຸມໃຫຍ່ ສະເຫລີມສະຫລອງ 2 ວັນປະຫວັດສາດ ລາວ-ຫວຽດນາມ ກໍຄື ວັນເຊັນສົນທິສັນຍາ ມິດຕະພາບ ແລະ ການຮ່ວມມື ຄົບຮອບ 40 ປີ (18/7/1977-18/7/2017) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ (5/9/1962-5/9/2017) ໄດ້ຈັດຂຶ້ນ ໃນວັນທີ 18 ກໍລະກົດ ທີ່ຜ່ານມາ ຢູ່ນະຄອນຫລວງວຽງຈັນ, ໂດຍມີ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານນາງ ຕ່ອງທິຝ່ອງ ຮອງປະທານສະພາແຫ່ງຊາດ ແຫ່ງ ສສ ຫວຽດນາມ, ມີບັນດາຮອງນາຍົກລັດຖະມົນຕີ, ລັດຖະມົນຕີ, ຮອງລັດຖະມົນຕີ, ຫົວໜ້າກົມ, ຮອງກົມ, ພະນັກງານ, ທະຫານ-ຕຳຫລວດ, ພ້ອມດ້ວຍອະດີດການນຳພັກ-ລັດ ອ້ອມຂ້າງສູນກາງ ເຂົ້າຮ່ວມຢ່າງພ້ອມພຽງ..
ໃນໂອກາດດັ່ງກ່າວ, ທ່ານ ບຸນຍັງ ວໍລະຈິດ ໄດ້ຍົກໃຫ້ເຫັນເຖິງມູນເຊື້ອການຕໍ່ສູ້ ຊ່ວຍເຫລືອເຊິ່ງກັນ ແລະ ກັນ ລະຫວ່າງປະຊາຊົນສອງຊາດ ລາວ-ຫວຽດນາມ ໃນການຕໍ່ສູ່ອັນຍືດເຍື້ອຍາວນານ, ຕ້ານພວກລ່າເມືອງຂຶ້ນ ທັງເກົ່າ ແລະ ໃໝ່ ຈົນສາມາດຍາດໄດ້ ໄຊຊະນະຮ່ວມກັນ, ເຊິ່ງທັງ ສອງຊາດລາວ-ຫວຽດນາມ ໄດ້ມີການພົວພັນຖານບ້ານໃກ້ເຮືອນຄຽງທີ່ດີນຳກັນ ມາແຕ່ບູຮານນະການ, ປະຊາຊົນສອງຊາດ ໄດ້ດຳລົງຊີວິດ ແລະ ທຳມາຫາກິນບົນຜືນແຜນດິນ ທີ່ມີສາຍພູຫລວງຍາວຢຽດ ແລະ ແມ່ນ້ຳຫລາຍສາຍຕິດຈອດກັນ ແຕ່ເໜືອເຖິງໃຕ້, ໃນຍາມທຸກກໍ່ຮ່ວມທຸກ, ໃນຍາມສຸກກໍ່ຮ່ວມສຸກ ນຳກັນຕະຫລອດມາ, ທັງໄດ້ຜ່ານການທົດສອບໃນຂະບວນການວິວັດ ແຫ່ງການຕໍ່ສູ້ຕ້ານພວກລ່າເມືອງຂຶ້ນຕ່າງດ້າວ ອັນຍືດເຍື້ອຍາວນານ ແລະ ສຸດແສນລະອິດລະອ້ຽວຂ້ຽວຂາດ ເຊິ່ງສອງຊາດ ລາວ-ຫວຽດນາມ ໄດ້ອີງຫລັງໃສ່ກັນ, ຮັກແພງເຊື່ອໝັ້ນເຊິ່ງກັນ ແລະ ກັນ, ຍອມເສຍສະຫລະເພື່ອກັນ ແລະ ຮ່ວມເປັນຮ່ວມຕາຍນຳກັນ ອັນນັ້ນແມ່ນບໍ່ເກີດ ແຫ່ງການພົວພັນສາມັກຄີພິເສດ ທີ່ກາຍເປັນປັດໄຈຕັດສິນຜົນສຳເລັດ ແລະ ໄຊຊະນະຂອງການປະຕິວັດ ຢູ່ສອງປະເທດຂອງພວກເຮົາ ເຊິ່ງເປັນຕົວແບບທີ່ຫາໄດ້ຍາກ ໃນການພົວພັນ ລະຫວ່າງຊາດຢູ່ໃນໂລກ, ເປັນສາຍພົວພັນທີ່ຍິ່ງໃຫຍ່, ເລິກເຊິ່ງ, ດູດດື່ມ ແລະ ເປັນມໍລະດົກລ້ຳຄ່າ ຂອງທັງສອງຊາດ ລາວ-ຫວຽດນາມ.
ທ່ານ ບຸນຍັງ ວໍລະຈິດ ກ່າວຕື່ມວ່າ: ພາຍຫລັງປະເທດຊາດ ໄດ້ຮັບການປົດປ່ອຍ ໃນປີ 1975 ສອງປະເທດ ລາວ-ຫວຽດນາມ ໄດ້ກ້າວເຂົ້າສູ່ສັງກາດໃໝ່, ສັງກາດແຫ່ງສັນຕິພາບ, ເອກະ ລາດ. ເອກະພາບ ແລະ ປະຕິບັດເປັນເຈົ້າຕົນເອງ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ໄປສູ່ຈຸດໝາຍສັງຄົມນິຍົມທີ່ວາງໄວ້. ໃນເງື່ອນໄຂ ແລະ ສະພາບແວດລ້ອມໃໝ່ນີ້, ສາຍພົວພັນພິເສດ ລະຫວ່າງສອງຊາດ ຍິ່ງໄດ້ຮັບການເສີມຂະຫຍາຍ ສູ່ລະດັບອັນໃໝ່, ເປັນສາຍພົວພັນ ລະຫວ່າງສອງລັດ ທີ່ມີເອກະລາດ, ມີອຳນາດອະທິປະໄຕ ຢ່າງເຕັມສ່ວນ ແລະ 55 ປີ ແຫ່ງການສ້າງຕັ້ງ ສາຍພົວພັນການທູດ ແລະ 40 ປີ ແຫ່ງການເຊັນສົນທິສັນຍາ ມິດຕະພາບ ແລະ ການຮ່ວມມື ລະຫວ່າງສອງປະເທດ ແມ່ນໄລຍະເວລາແຫ່ງການທົດສອບ ຄວາມໝັ້ນແກ່ນແໜ້ນໜຽວ ຂອງສາຍພົວພັນ ລະຫວ່າງ ສອງປະເທດພວກເຮົາ ເຊິ່ງເປັນພື້ນຖານອັນໜັກແໜ້ນ ໃຫ້ແກ່ການເພີ່ມທະວີ ການຮ່ວມມືຮອບດ້ານ ລະຫວ່າງສອງພັກ, ສອງ

ລັດ ແລະ ປະຊາຊົນສອງຊາດ ລາວ-ຫວຽດນາມ ໃນໄລຍະໃໝ່ ກໍຄືປັດຈຸບັນ.

Editor: ດາວໄຊ ສີວິໄລ