ໃນວັນທີ 18 ກໍລະກົດ 2017, ຄະນະສານອາຍາ, ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ໄດ້ນໍາເອົາສໍານວນຄະດີປຸ້ນຊັບ, ລັກພາຕົວ, ນຳໃຊ້ອາວຸດເສິກບໍ່ຖືກຕ້ອງ ແລະ ປອມແປງເອກະສານ ວິຊາສະເພາະທີ່ມີມູນຄ່າເສຍຫາຍເກືອບຕື້ກີບ, ມາພິຈະລະນາ, ຕັດອິດສະຫຼະພາບ ແລະ ປັບໃໝ.
ໃນຫ້ອງປະຊຸມ, ອົງການໄອຍະການປະຊາຊົນ ໄດ້ຖະແຫຼງ ວ່າ: ຈຳເລີຍ 11 ຄົນ ຄື: ທ້າວ ທິບພະກອນ ອາຍຸ 35 ປີ, ທ້າວ ຄຳພອນ ອາຍຸ 32 ປີ, ທ້າວ ປະຈວບ ອາຍຸ 28 ປີ, ທ້າວ ອານຸສັກ ອາຍຸ 45 ປີ, ທັງ 4 ຄົນຢູ່ບ້ານ ຫ້ວຍຫົງ, ເມືອງຈັນທະບູລີ, ທ້າວ ວັນ ອາຍຸ 35 ປີ ຢູ່ບ້ານຫ້ວຍນໍ້າເຢັນ, ທ້າວ ແສງເພັດ ອາຍຸ 55 ປີ, ນາງ ໜູກອນ ອາຍຸ 27 ປີ ທັງສອງຢູ່ບ້ານ ປາກແຮດ, ເມືອງນາຊາຍທອງ, ທ້າວ ສຸລິເດດ ອາຍຸ 44 ປີ ຢູ່ບ້ານໜອງແຕ່ງໃຕ້, ເມືອງສີໂຄດຕະບອງ, ທ້າວ ຊຽງຂາວ ອາຍຸ 49 ປີ ຢູ່ບ້ານລາດຄວາຍ, ເມືອງໄຊທານີ, ນະຄອນຫຼວງວຽງຈັນ, ທ້າວ ພູວຽງ ອາຍຸ 41 ຢູ່ ບ້ານແຈ້ງສະຫວ່າງ ເມືອງໂພນໂຮງ ແຂວງວຽງຈັນ ແລະ ທ້າວ ສົມ ອາຍຸ 40 ປີ ຢູ່ບ້ານ ອານຸສອນໄຊ, ເມືອງປາກຊັນ, ແຂວງບໍລິຄຳໄຊ ຂຶ້ນມາພິຈາລະນາ.
ພວກກ່ຽວໄດ້ຮ່ວມກັນກໍ່ເຫດປຸ້ນຊັບ, ລັກພາຕົວ, ນໍາໃຊ້ອາວຸດເສີກ ແລະ ນຳໃຊ້ເອກະສານວິຊາສະເພາະປອມຂອງເຈົ້າໜ້າທີ່ຕຳຫຼວດ ໄປກໍ່ເຫດທັງໝົດ 13 ຄັ້ງ, ໂດຍການນໍາໃຊ້ວິທີຕິດຕາມເປົ້າໝາຍ ໂດຍແອບອ້າງເປັນເຈົ້າໜ້າທີ່ຕຳຫຼວດ ພ້ອມສ້າງເອກະສານກວດຄົ້ນເຄຫະສະຖານປອມ ແລະ ທຳການກວດຄົ້ນເຮືອນ ເມື່ອພົບຊັບສິນ ກໍຢຶດເອົາໄປຫຼາຍຄັ້ງ.
ຜ່ານການວິນິດໄສຂອງສານຢ່າງຄົບຖ້ວນ ພ້ອມທັງມີຂໍ້ມູນຫຼັກຖານ ຈັດເຈນ ຄະນະສານ ຈຶ່ງເຫັນຄວນຕັດອິດສະຫຼະພາບທ້າວ ທິບພະກອນ, ທ້າວ ຄຳພອນ, ທ້າວ ປະຈວບ, ທ້າວ ສົມ, ທ້າວ ຊຽງຂາວ, ທ້າວ ອານຸສັກ ແລະ ທ້າວ ສຸລິເດດ ຜູ້ລະ 15 ປີ ປັບໃໝຜູ້ລະ 56 ລ້ານກີບ, ຕັດອິດສະຫຼະພາບ ທ້າວ ແສງເພັດ ແລະ ນາງ ໜູກອນ ຜູ້ລະ 11 ປີ ປັບໃໝຜູ້ລະ 12 ລ້ານກີບ, ສ່ວນທ້າວ ວັນ ຕັດອິດສະຫຼະພາບ 15 ປີ ປັບໃໝ 58 ລ້ານກີບ ແລະ ທ້າວ ພູວຽງ 15 ປັບໃໝ 56 ລ້ານ 4 ແສນກີບ.
Editor: ຕະວັນ ແສງສະຫວັນ
