ໃນວັນທີ 22 ກໍລະກົດ ນີ້, ຢູ່ທີ່ສູນການຄ້າລາວ-ໄອເຕັກ ໄດ້ຈັດພິທີເປີດໂລກແຫ່ງການລົງທຶນ 2017 ຄັ້ງທີ 5 ພາຍໃຕ້ຫົວຂໍ້: ທຸລະກິດຍືນຍົງ ສ້າງສະຖານະໝັ້ນຄົງໃນຕະຫຼາດທຶນ ໄດ້ຖືກຈັດຕັ້ງຂຶ້ນພາຍໃຕ້ການຮ່ວມມືລະຫວ່າງ ຕະຫຼາດຫຼັກຊັບລາວ, ທະນາຄານແຫງ ສາທາລະນະລັດ ປະຊາທິປະໄຕ ປະຊາຊົນລາວ, ສໍານັກງານຄະນະກໍາມະການຄຸ້ມຄອງຕະຫຼາດຫຼັກຊັບ, ບໍລິສັດຈົດທະບຽນ, ບໍລິສັດຫຼັກຊັບ, ບໍລິສັດກວດສອບ, ບໍລິສັດທີ່ປຶກສາທາງດ້ານກົດໝາຍ ແລະ ບັນດາບໍລິສັດເປົ້າໝາຍກຽມເຂົ້າຈົດທະບຽນ ຫຼາຍກວ່າ 30 ບໍລິສັດ. ໂດຍເປັນກຽດເຂົ້າຮ່ວມຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານຄະນະກຳມະການຄຸ້ມຄອງຫຼັກຊັບ ແລະ ກ່າວເປີດພິທີໂດຍ ທ່ານ ວັນຄຳ ວໍຣະວົງ, ຜູ້ອຳນວຍການໃຫຍ່ຕະຫຼາດຫຼັບຊັບລາວ, ມີບັນດາຮອງຜູ້ວ່າການທະນາຄານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຫົວໜ້າສໍານັກງານຄະນະກໍາມະການຄຸ້ມຄອງຕະຫຼາດຫຼັກຊັບ ແລະ ພ້ອມດ້ວຍບໍລິສັດຫ້າງຮ້ານເຂົ້າຮ່ວມ.
ພິທີເປີດໂລກແຫ່ງການລົງທຶນ 2017 ນີ້, ແມ່ນເພື່ອສ້າງໂອກາດໃຫ້ແກ່ມວນຊົນ ບໍ່ວ່າຈະເປັນນັກລົງທຶນ ທີ່ມີຄວາມສົນໄຈໃນການລົງທຶນຜ່ານຕະຫຼາດທຶນ ຫຼື ວິສາຫະກິດຜູ້ປະກອບການຕ່າງໆ ທີ່ມີຄວາມສົນໃຈລະດົມທຶນຜ່ານຕະ ຫຼາດທຶນໃຫ້ມີຄວາມຮັບຮູ້ ແລະ ເຂົ້າໃຈຍິ່ງຂຶ້ນກ່ຽວກັບວຽກງານຕະຫຼາດທຶນ. ງານດັ່ງກ່າວແມ່ນດຳເນີນເປັນເວລາ 2 ວັນ (22-23 ກໍລະກົດ) ໂດຍຈະໄດ້ຮັບຮູ້ຜ່ານມຸມມອງຂອງບໍລິສັດຫຼັກຊັບ, ບໍລິສັດຈົດທະບຽນ ແລະ ນັກວິຊາກອນທີ່ມີຄວາມຮູ້ປະສົບການສູງ. ນອກນີ້, ພາຍໃນງານໄດ້ເປີດໂອກາດໃຫ້ຜູ້ເຂົ້າຮ່ວມງານ ໄດ້ແລກປ່ຽນໂອລົມແລກປ່ຽນສົນທະນາ ກັບຜູ້ບໍລິຫານ ຈາກ 5 ບໍລິສັດຈົດທະບຽນ, ຮັບຟັງການບັນຍາຍຈາກບັນດາຜູ້ບໍລິການ ບໍລິສັດຫຼັກຊັບ ໃນຫົວຂໍ້ຕ່າງໆ, ປຶກສາລືກ່ຽວກັບການລົງທຶນໃນຫຼັກຊັບ, ພ້ອມທັງທ່ຽວຊົມຫ້ອງວາງສະແດງຈາກພາກສ່ວນຕ່າງໆ ແລະ ຮ່ວມຫຼິ້ນກິດຈະກຳເພື່ອຮັບຂອງລາງວັນ ເຊິ່ງສ້າງຄວາມສົນໃຈ ແລະ ຄວາມມ່ວນຊື່ນໃຫ້ແກ່ຜູ້ເຂົ້າຮ່ວມງານເປັນຈຳນວນຫຼາຍ.
ງານເປີດໂລກແຫ່ງການລົງທຶນ ເປັນງານໜຶ່ງທີ່ຍິ່ງໃຫຍ່ຂອງ ຕະຫຼາດຫຼັກຊັບລາວ ທີ່ຖືກຈັດຂຶ້ນທຸກໆປີ ເພື່ອສົ່ງເສີມໃຫ້ປະຊາຊົນລາວເຫັນໄດ້ເຖິງຄວາມໝາຍຄວາມສຳຄັນຂອງຕະຫຼາດທຶນ.
Editor: ກຳປານາດ ລັດຖະເຮົ້າ
