ເມື່ອບໍ່ດົນມານີ້, ຢູ່ທີ່ສຳນັກງານ ສູນກາງແນວລາວສ້າງຊາດ ໄດ້ຈັດງານຖະແຫລງຂ່າວ ຜົນສຳເລັດ ຂອງກອງປະຊຸມສາກົນ ວ່າດ້ວຍ ການສ້າງເສັ້ນທາງຊາຍແດນ ລາວ -ຫວຽດນາມ ສັນຕິພາບ, ມິດຕະພາບ, ຮ່ວມມືພ້ອມກັນພັດທະນາ ຄັ້ງທີ 6 ເຊີ່ງຈັດຂື້ນ ທີ່ແຂວງກວາງບິ່ງ ສາທາລະນະລັດ ສັງຄົມນິຍົມ ຫວຽດນາມ ໃນກາງເດືອນ ກໍລະກົດ 2017 ທີ່ຜ່ານມາ.
ສຳລັບການຖະແຫລງ ຄັ້ງນີ້ ໂດຍແມ່ນ ທ່ານ ແກ້ວຈະເລີນ ເຊ່ຍຢີ້ງຢາງ ຄະນະພັກ, ຄະນະປະຈຳສູນກາງແນວລາວສ້າງຊາດ ໃນນາມຕາງຫນ້າໃຫ້ຄະນະປະຈຳສູນກາງແນວລາວສ້າງຊາດ. ເຊີ່ງທ່ານ ໄດ້ຍົກໃຫ້ເຫັນ ວ່າ: ກອງປະຊຸມຄັ້ງນີ້ ສຶບຕໍ່ມາຈາກການປະຕິບັດຕາມບົດບັນທຶກ ວ່າດ້ວຍການຮ່ວມມື ລະຫວ່າງ ສູນກາງແນວລາວສ້າງຊາດ ແລະ ແນວໂຮມ ປະເທດຊາດ ສສ ຫວຽດນາມ ( ໄລຍະ 2016-2020 ) ການປະຕິບັດຕາມບົດບັນທຶກຊ່ວຍຈຳຂອງກອງປະຊູມປະທານແນວໂຮມ 3 ປະເທດ ກຳປູເຈຍ-ລາວ ແລະ ຫວຽດນາມ. ສຳລັບກອງປະຊູມ ສາກົນວ່າດ້ວຍການສ້າງຊາຍແດນ ລາວ-ຫວຽດນາມ ສັນຕິພາບ, ມິດຕະພາບ, ຮ່ວມມືພ້ອມກັນພັດທະນາ ຄັ້ງທີ 6 ທີ່ແຂວງກວ່າງບີ່ງ ສສ ຫວຽດນາມ ຝ່າຍລາວ ເຂົ້າຮ່ວມມີ:
- ທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ
- ທ່ານ ສົມອົກ ກີ່ງສະດາ ຮອງປະທານສູນກາງແນວລາວສ້າງຊາດ, ພ້ອມດ້ວຍຄະນະຜູ້ຕາງຫນ້າການນຳ, ກົມຊາຍແດນກະຊວງປ້ອງກັນປະເທດ, ຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດ. ມີຄະນະປະທານ, ຮອງປະທານ ຄະນະກຳມະການແນວລາວສ້າງຊາດ 10 ແຂວງ ທີ່ມີຊາຍແດນຕິດຈອດ ກັບ ສສ ຫວຽດນາມ, ເຂົ້າຮ່ວມ. ສ່ວນຝ່າຍຫວຽດນາມ ປະກອບມີ:
- ທ່ານ ເຈີ່ນແທງເມີ້ນ ກຳມະການສູນກາງພັກກອມມູນິດຫວຽດນາມ, ປະທານຄະນະກຳມະການສູນກາງແນວໂຮມປະເທດຊາດ ສສ ຫວຽດນາມ.
- ທ່ານ ຮວ່າງດັງກວາງ ກຳມະການສູນກາງພັກກອມມູນິດຫວຽດນາມ, ເລຂາພັດແຂວງ, ປະທານສະພາປະຊາຊົນ ແຂວງກວ່າງບີ່ງ.
- ທ່ານນາງ ເຈືອງທິ ຫງອກ ແອ໋ງ ຮອງປະທານຄະນະ ກຳມະການສູນກາງແນວໂຮມ ປະເທດຊາດ ຫວຽດນາມ ແລະ ທ່ານ ຫງວຽນ ຫື້ວ ຢຸ້ງ ຮອງປະທານຄະນະກຳມະການສູນກາງແນວໂຮມປະເທດຊາດຫວຽດນາມ. ນອກຈາກນີ້ ຍັງມີຄະນະກຳມະການຊາຍແດນແຫ່ງຊາດ, ຜູ້ຕາງ ຫນ້າກະຊວງການຕ່າງປະເທດ, ກອງບັນຊາການທະຫານຊາຍແດນ, ສູນກາງຄະນະຊາວຫນຸ່ມກອມມູນິດໂຮ່ຈີມິນ, ມີຄະນະປະທານ, ຮອງປະທານຄະນະກຳມະການແນວໂຮມປະທາດຊາດຫວຽດນາມ ໃນ 10 ແຂວງ ທີ່ມີຊາຍແດນຕິດຈອດ ກັບ ສປປ ລາວ.
ໃນກອງປະຊູມດັ່ງກ່າວ ທັງສອງຝ່າຍ ໄດ້ພ້ອມກັນຕີລາຄາການຈັດຕັ້ງປະຕິບັດ ຜົນກອງປະຊູມສາກົນວ່າດ້ວຍ ການສ້າງເສັ້ນຊາຍແດນ ຫວຽດນາມ-ລາວ, ສັນຕິພາບ, ມິດຕະພາບ ໄລຍະ ແຕ່ປີ 2014-2016 ຜ່ານມາ, ແລະ ທັງສອງຝ່າຍຍັງພ້ອມກັນເປັນເອກະພາບການສ້າງເສັນຊາຍແດນ ລາວ-ຫວຍດນາມ ສັນຕິພາບ, ມິດຕະພາບ, ຮ່ວມມືພ້ອມກັນພັດທະນາ ໄລຍະ 2017-2020 , ທັງສອງຝ່າຍຍັງໄດ້ຮັບຮອງ ເຊັນສັນຍາຫມັ້ນຫມາຍການແຂ່ງຂັນ ເນື່ອງໃນໂອກາດຈັດຕັ້ງກອງປະຊຸມສາກົນເສີມສ້າງເສັ້ນທາງຊາຍແດນ ຫວຽດນາມ-ລາວ ສັນຕິພາບ, ມິດຕະພາບ, ຮ່ວມມື ພ້ອມກັນພັດທະນາ ໄລຍະ 2017-2020 ລະຫວ່າງຜູ້ຕາງຫນ້າແນວລາວສ້າງຊາດ 10 ແຂວງ ແລະ ແນວໂຮມປະເທດຊາດຫວຽດນາມ 10 ແຂວງ ທີ່ມີຊາຍແດນຕິດຈອດກັນ. ພ້ອມກັນນັ້ນ, ໃນກອງປະຊຸມຄັ້ງນີ້ ສອງອົງການແນວໂຮມ ສປປ ລາວ- ສສ ຫວຽດນາມ ຍັງໄດ້ມີກິດຈະກຳຮ່ວມກັນ ເຊັ່ນ: ຈັດຕັ້ງການວາງກະຕ່າດອກໄມ້ ແລະ ປູກຕົ້ນໄມ້ ຢູ່ທີ່ອະນຸສອນສະຖານ ປະທານ ໄກສອນ ພົມວິຫານ, ອະນຸສອນສະຖານ ປະທານ ສຸພານຸວົງ ທີ່ເມືອງທ່າແຊກ ແລະ ວາງກະຕ່າດອກໄມ້ ທີ່ອະນຸສອນສະຖານ ປະທານໂຮ່ຈິມີນ ທີ່ບ້ານຊຽງຫວ່າງ ເມືອງຫນອງບົກ, ແຂວງຄຳມ່ວນ. ມີການຈັດຕັ້ງໃຫ້ຄະນະຜູ້ແທນຂັ້ນສູງສູນກາງແນວລາວສ້າງຊາດ ຢ້ຽມຢາມ ແລະ ມອບເຄື່ອງຊ່ວຍເຫລືອຄອບຄົວ ປະຊາຊົນຜູ້ທຸກຍາກ ຕາມບັນດາບ້ານທີ່ຢູ່ລຽບຕາມຊາຍແດນ ຂອງແຂວງກວາງບິງ ສສ ຫວຽດນາມ, ເພື່ອປະກອບສ່ວນເຂົ້າໃນຂະບວນການສະເຫລີມສະຫລອງ 2 ວັນປະຫວັດສາດ ສາຍພົວພັນ ຫວຽດນາມ-ລາວ, ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ, ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ ອີກດ້ວຍ.
Editor: ກຳປານາດ ລັດຖະເຮົ້າ
