ໃນວັນທີ 24 ກໍລະກົດ ທີ່ຜ່ານມາ ສູນກາງແນວລາວສ້າງຊາດ ໄດ້ຈັດກອງປະຊຸມ ຝຶກອົບຮົມວຽກງານສ້າງຄອບຄົວ ແລະ ບ້ານສາມັກຄີປອງດອງຂຶ້ນ ໂດຍການກ່າວເປີດພິທີຂອງທ່ານ ຄຳໃບ ດຳລັດ ກໍາມະການສູນກາງພັກ, ຮອງປະທານ ສູນກາງແນວລາວສ້າງຊາດ, ທ່ານນາງ ຄຳຈັນ ພົມແສງສະຫັວນ ຮອງປະທານສູນກາງແນວລາວສ້າງຊາດ, ມີບັນດາຄະນະປະຈຳສູນກາງແນວລາວສ້າງຊາດ, ຮອງປະທານແນວລາວສ້າງຊາດແຂວງ-ນະຄອນຫຼວງ, ພ້ອມດ້ວຍສຳມະນາກອນ ເຂົ້າຮ່ວມ.
ກອງປະຊຸມ ຝຶກອົບຮົມວຽກງານສ້າງຄອບຄົວ ແລະ ບ້ານສາມັກຄີປອງດອງຄັ້ງນີ້ ມີຄວາມໝາຍສຳຄັນຕໍ່ການປະຕິບັດໜ້າທີ່ການເມືອງຂອງແນວລາວສ້າງຊາດ ແມ່ນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ 10 ຂອງແນວລາວສ້າງຊາດ, ເນື່ອງຈາກພາລະບົດບາດຕົ້ນຕໍຂອງແນວລາວສ້າງຊາດ ແມ່ນເປັນຄັນທຸງເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ, ແນວລາວສ້າງຊາດ ຍັງມີໜ້າທີ່ໂຄສະ ນາ, ສຶກສາອົບຮົມ, ປຸກລະດົມ, ເສີມຂະຫຍາຍສິດເປັນເຈົ້າຂອງປະຊາຊົນບັນດາເຜົ່າ ເຂົ້າຮ່ວມຈັດຕັ້ງປະຕິບັດແນວທາງ, ນະໂຍບາຍ, ລັດຖະທຳມະນູນ, ກົດໝາຍ, ແລະ ແຜນພັດທະນາເສດຖະກິດ-ສັງຄົມ ຂອງຊາດໃນແຕ່ລະໄລຍະ. ຄອບຄົວ ແລະ ບ້ານສາມັກຄີປອງດອງ ແມ່ນມາດຕະຖານໜຶ່ງຂອງບ້ານພັດທະນາ. ຊຶ່ງກອງປະຊຸມຄັ້ງນີ້ ແມ່ນດຳເນີນເປັນເວລາ 3 ວັນ, ສໍາມະນາກອນຍັງໄດ້ພ້ອມກັນເຊື່ອມຊຶມທິດສະດີ ແລະ ຈັດຕັ້ງການແລກປ່ຽນບົດຮຽນ ກ່ຽວກັບວຽກງານສ້າງຄອບຄົວ ແລະ ບ້ານສາມັກຄີປອງດອງ ຢູ່ແຕ່ລະທ້ອງຖິ່ນຢ່າງກົງໄປກົງມາ ເພື່ອສ້າງຄວາມເປັນເອກະພາບໃນພາກຈັດຕັ້ງປະຕິ ບັດຕົວຈິງ.
ນອກນັ້ນ ກອງປະຊຸມຝຶກອົບຮົມຍັງໄດ້ລົງເລິກ 4 ຫົວຂໍ້ຄື: ນິຕິກໍາສ້າງຄອບຄົວ ແລະ ບ້ານສາມັກຄີປອງດອງ, ຍົກສູງບົດບາດຂອງແນວລາວສ້າງຊາດ ໃນໄລຍະໃໝ່, ເພີ່ມທະວີຄວາມສາມັກຄີປອງດອງທົ່ວປວງຊົນ ແລະ ບົດຮຽນວຽກງານຂົນຂວາຍມະຫາຊົນຂອງພັກກອມມູນິດຫວຽດນາມ.
Editor: ກຳປານາດ ລັດຖະເຮົ້າ
