ເມື່ອບໍ່ດົນຜ່ານມານີ້ ຄະນະຜູ້ແທນສະມາຄົມມິດຕະພາບ ລາວ-ຫວຽດນາມ,ຫວຽດນາມ-ລາວ ນຳໂດຍ ທ່ານນາງ ທຸມມາລີ ວົງພະຈັນ ຮອງປະທານສູນກາງສະຫະພັນແມ່ຍິງລາວ, ຮອງປະທານສະມາຄົມມິດຕະພາບລາວ-ຫວຽດນາມ ແລະ ທ່ານ ຕະມິງເຈົາ ຮອງປະທານສະມາຄົມມິດຕະພາບຫວຽດນາມ-ລາວ, ພ້ອມດ້ວຍຄະນະ ໄດ້ມາຢ້ຽມຢາມ ແລະ ພົບປະການນຳແຂວງວຽງຈັນ ເນື່ອງໃນໂອກາດສະເຫຼີມສະຫຼອງສອງວັນປະຫວັດສາດ ຄື: ວັນເຊັນສັນຍາມິດຕະພາບ ແລະ ການຮ່ວມມື ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ, ໂດຍການຕ້ອນຮັບຢ່າງອົບອຸ່ນຂອງ ທ່ານ ວິດົງ ໄຊຍະສອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ ແລະ ບັນດາພະນັກງານການນຳຂອງແຂວງວຽງຈັນ.
ໃນໂອກາດນີ້ ເຈົ້າແຂວງໆວຽງຈັນ ໄດ້ລາຍງານສະພາບລວມໂດຍຫຍ້ໍ ແລະ ຜົນງານບາງດ້ານຂອງແຂວງວຽງຈັນ ໃນໄລຍະຜ່ານມາ ໂດຍສະເພາະແມ່ນການຂະຫຍາຍຕົວທາງດ້ານເສດຖະກິດແມ່ນປະຕິບັດໄດ້ດີ ແລະ ຕໍ່ເນື່ອງໃນລະດັບ 8,13 ສ່ວນຮ້ອຍ, ລວມຍອດຜະລິດຕະພັນພາຍໃນ (GDP) ໝົດສົກປີ 2015-2016 ມີມູນຄ່າເຖິງ 5 ພັນ ກວ່າຕື້ກີບ, ສະເລ່ຍຕໍ່ຫົວຄົນໄດ້ 13 ລ້ານກວ່າກີບ, ເຂົ້າກິນໄດ້ 564 ກິໂລຕໍ່ຄົນຕໍ່ປີ, ສະເລ່ຍອັດຕາເພີ່ມຂຶ້ນຂອງປະຊາກອນ 1,5 ສ່ວນຮ້ອຍ. ດ້ານວຽກງານຮ່ວມ ມືກັບຕ່າງປະເທດ ໂດຍສະເພາະແມ່ນ ສສ ຫວຽດນາມ ແມ່ນໄດ້ເຊັນສົນທິ ສັນຍາມິດຕະພາບ-ຮ່ວມມືກັບບັນດາແຂວງ ສສ ຫວຽດນາມ 4 ແຂວງຄື: ແຂວງຮາຍເຢືອງ, ນະຄອນຮາຍຟອງ, ແຂວງອ່ຽນບາຍ ແລະ ແຂວງເຫງະອານ, ພ້ອມກັນນັ້ນ ບັນດາແຂວງແຮກສ່ຽວໄດ້ປະກອບສ່ວນໃນການພັດທະນາພື້ນຖານໂຄງລ່າງຕ່າງໆ ຄື: ແຂວງຮາຍເຢືອງ ໄດ້ໃຫ້ການຊ່ວຍເຫຼືອກໍ່ສ້າງໂຮງຮຽນອານຸບານ 1 ຫຼັງມູນຄ່າ 6 ຕື້ດົງ, ທຶນກໍ່ສ້າງຫ້ອງເຕັກນິກວິທະຍາສາດ ປະສົມພັນທຽມສັດ 1 ແຫ່ງ, ແນວພັນງົວ 15 ໂຕ, ແນວພັນໝູ 34 ໂຕ,ໃຫ້ທຶນກໍ່ສ້າງຊັບພະຍາກອນມະນຸດ 32 ທຶນ. ນະຄອນຮາຍຟອງ ໃຫ້ທຶນກໍ່ສ້າງໂຮງຮຽນ ມໍສໍ ປາກແຈ້ງ 1 ຫຼັງມູນຄ່າ 2,5 ຕື້ດົງ, ຊ່ວຍແນວພັນເຂົ້າ 10 ໂຕນ, ທຶນການສຶກສາ 48 ທຶນ ແລະ ຄອມພິເຕີໃຫ້ຫ້ອງຮຽນ 29 ຊຸດ. ແຂວງອ່ຽນບາຍໃຫ້ທຶນກໍ່ສ້າງຫ້ອງປະຖົມພະຍາບານ ແລະ ຫ້ອງກວດພະຍາດເບື້ອງຕົ້ນ, ຫ້ອງທົດລອງວິທະຍາສາດ ແລະ ສ້າງຫໍພັກ,
ໂຄງການກໍ່ສ້າງນ້ຳລິນທີ່ໂຮງຮຽນຊົນເຜົ່າເມືອງວັງວຽງ ລວມທັງໝົດ 5 ຕື້ກວ່າດົງ, ຊ່ວຍເຫຼືອຄອມພິເຕີ 40 ຊຸດ ແລະ ຄອມພິວເຕີໂນດບຸກ 15 ເຄື່ອງ, ຊ່ວຍທຶນການສຶກສາແຕ່ປີ 2008 ເປັນຕົ້ນມາ 128 ທຶນ. ແຂວງເຫງະອ່ານໄດ້ໃຫ້ທຶນການສຶກສາເລີ່ມແຕ່ປີ 2012 ຈຳນວນ 50 ທຶນ. ຮອດປະຈຸບັນນີ້ມີຊາວ ສສ ຫວຽດນາມ ມາດຳລົງຊີວິດທຳມາຫາກິນ, ຄ້າຂາຍ, ບໍລິການສ້ອມແປງ, ຮັບເໝົາກໍ່ສ້າງຢູ່ແຂວງວຽງຈັນ ມີຈຳນວນ 1 ພັນກວ່າຄົນ. ນອກຈາກນັ້ນຍັງໄດ້ຮັບການຊ່ວຍເຫຼືອຈາກ ທະຫານເຂດ 4 ສສ ຫວຽດນາມ ຊ່ວຍກໍ່ສ້າງໂຮງໝໍທະຫານແຂວງວຽງຈັນ 60 ຕຽງ ມູນຄ່າ 22 ຕື້ກວ່າດົງ ແລະ ໄດ້ຮັບການຊ່ວຍເຫຼືອຈາກກຸ່ມບໍລິສັດກັອບລ່ອງແທ່ງ ໃຫ້ທຶນກໍ່ສ້າງຫໍສີລາຈາລຶກສຳພັນສູ້ຮົບ ລາວ-ຫວຽດນາມ ມູນຄ່ 1 ແສນກວ່າໂດລາສະຫາລັດ. ໃນໂອກາດດຽວກັນນີ້ ຄະນະຜູ້ແທນສະມາຄົມມິດຕະພາບລາວ-ຫວຽດນາມ ໄດ້ໄປວາງກະຕ່າດອກໄມ້ ແລະ ຈູດທູບ ຢູ່ຫໍສີລາຈາລຶກສຳພັນສູ້ຮົບ ລາວ-ຫວຽດນາມ ທີ່ບ້ານໂພນແຮ່ ເມືອງທຸລະຄົມ ເພຶ່ອສະແດງເຖິງຄວາມຮູ້ບຸນຄຸນ ແລະ ໄວ້ອາໄລເຖິງດວງວິນຍານທະຫານປະສົມ ລາວ-ຫວຽດນາມ 28 ຄົນ, ທີ່ໄດ້ສະຫຼະຊິວິດຕໍ່ສູ້ກັບພວກລ່າເມືອງຂຶ້ນ ຝຮັ່ງເພຶ່ອປົກປັກຮັກສາປະເທດຊາດ.
Editor: ກຳປານາດ ລັດຖະເຮົ້າ
