ໃນວັນທີ 24 ກໍລະກົດ 2017 ນີ້ ອົງການໄອຍະການປະຊາຊົນ ແຂວງເຊກອງ ໄດ້ຈັດກອງປະຊຸມດໍາເນີນຊີວິດການເມືອງປັບປຸງປົວແປງພັກ ທົ່ວອົງການໄອຍະການປະຊາຊົນແຂວງເຊກອງ ປະຈໍາປີ 2017 ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ພອນເພັດ ຄິວລະວົງ ຮອງເລຂາພັກແຂວງ, ປະທານສະພາປະຊາຊົນ ແຂວງເຊກອງ, ມີ ທ່ານ ປະລິນຍາເອກ ສົມນິດ ສີລິບຸນລ້ຽງ ເລຂາໜ່ວຍພັກຮາກຖານອົງການໄອຍະການປະຊາຊົນ ແຂວງເຊກອງ, ມີບັນດາສະມາຊິກພັກສົມບູນ-ສໍາຮອງພາຍໃນອົງການໄອຍະການປະຊາຊົນແຂວງເຊກອງ ເຂົ້າຮວ່ມຢ່າງພ້ອມພຽງ.
ທ່ານ ສົມນິດ ສີລິບຸນລ້ຽງ ເລຂາໜ່ວຍພັກຮາກຖານ ອົງການໄອຍະການປະຊາຊົນແຂວງເຊກອງ ກ່າວວ່າ: ຈຸດປະສົງຂອງການຈັດຕັ້ງເຊື່ອມຊຶມໃນຄັ້ງນີ້ ກໍເພື່ອເຮັດໃຫ້ສະມາຊິກພັກທຸກສະຫາຍ, ກຳແໜ້ນແນວທາງນະໂຍບາຍ ແລະ ເສີມຂະຫຍາຍມູນເຊື້ອອັນດີງານຂອງພັກ ໃນໄລຍະຜ່ານມາ ໂດຍສະເພາະຄຸນທາດການເມືອງ ແລະ ຄຸນສົມບັດສິນທຳປະຕິວັດ, ແບບແຜນວິທີເຮັດວຽກ, ແບບແຜນວິທີນຳພາ ມີນ້ຳໃຈຮັບໃຊ້ປະຊາຊົນ ແລະ ຄວາມເສຍສະຫຼະເພື່ອສ່ວນລວມ, ຄວາມຮັບຜິດຊອບຕໍ່ໜ້າທີ່ການເມືອງ ທີ່ໄດ້ຮັບມອບໝາຍຈາກຄະນະພັກຂັ້ນເທິງ.
ກອງປະຊຸມດໍາເນີນຊີວິດການເມືອງປັບປຸງປົວແປງພັກ ຂອງອົງການໄອຍະການປະຊາຊົນແຂວງເຊກອງ ຄັ້ງນີ້, ຜູ້ເຂົ້າຮວ່ມຈະໄດ້ພອ້ມກັນເຊື່ອມຊຶມ ເນື້ອໃນເອກະສານເດັດດ່ຽວປັບປຸງປົວແປງທົ່ວພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ; ຕີລາຄາຄວາມຮັບຜິດຊອບລວມຂອງ ຄະນະບໍລິຫານງານພັກແຂວງ ໃນການນຳພາຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ່ 9 ຂອງອົງຄະນະພັກແຂວງ ແລະ ມະຕິກອງປະຊຸມໃຫ່ຍຄັ້ງທີ 10 ຂອງພັກປະຊາຊົນປະຕິວັດລາວ ແລະ ຮັບຟັງການຕີລາຄາ ຄວາມຮັບຜິດຊອບລວມຂອງ ໜ່ວຍພັກຮາກຖານ ອົງການໄອຍະການປະຊາຊົນ ແຂວງເຊກອງ ໃນໄລຍະ 2 ປີຜ່ານມາ, ພ້ອມດຽວກັນນີ້ ບັນດາສະຫາຍສະມາຊິກພັກ ກໍຈະໄດ້ພ້ອມກັນ ປະກອບຄໍາຄິດເຫັນ, ຕຳນິຕິຊົມເຊີ່ງກັນ ແລະ ກັນ ແລະ ລົງຄະແນນສຽງ ຄວາມເຊື່ອໝັ້ນໄວ້ວາງໃຈ ຕໍ່ບຸກຄົນໃນໜ່ວຍພັກຂອງຕົນ ແນໃສ່ສ້າງໃຫ້ໜ່ວຍພັກມີຄວາມປອດໃສ, ເຂັ້ມແຂງ ແລະ ໜັກແໜ້ນ, ເພື່ອສືບຕໍ່ຊີ້ນໍາ - ນໍາພາ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຫຼຸດພົ້ນອອກຈາກຄວາມດ້ອຍພັດທະນາເທື່ອລະກ້າວ.
ໂອກາດນີ້ ທ່ານ ພອນເພັດ ຄິວລະວົງ ຮອງເລຂາພັກແຂວງ, ປະທານສະພາປະຊາຊົນແຂວງ ກໍໄດ້ມີຄໍາເຫັນຊີ້ນໍາ ໃຫ້ກໍາແໜ້ນເນື້ອໃນຈິດໃຈຂອງຄໍາສັ່ງ ເລກທີ 01/ກມສພ, ລົງວັນທີ 1/2/2017 ວ່າດ້ວຍ ການດໍາເນີນຊີວິດການເມືອງປັບປຸງປົວແປງທົ່ວພັກປີ 2017 ເພື່ອເຮັດໃຫ້ບັ້ນດໍາເນີນຊີວິດການເມືອງປັບປຸງປົວແປງທົ່ວອົງການໄອຍະການປະຊາຊົນ ແຂວງເຊກອງ ໃນຄັ້ງນີ້ ຕ້ອງມີການຫັນປ່ຽນໄປສູ່ອັນໃໝ່ຢ່າງແທ້ຈິງ ແລະ ເປັນແບບຢ່າງໃນການຈັດຕັ້ງປະຕິບັດກົດລະບຽບຂອງພັກ ແລະ ກົດໝາຍຂອງລັດ ເຮັດໃຫ້ສັງຄົມມີຄວາມສະຫງົບປອດໄພໂດຍພື້ນຖານ.
ກອງປະຊຸມດໍາເນີນຊີວິດການເມືອງປັບປຸງປົວແປງພັກ ຂອງໜ່ວຍພັກຮາກຖານ ອົງການ ໄອຍະການປະຊາຊົນ ແຂວງເຊກອງ ຄັ້ງນີ້ຈະໄດ້ດຳເນີນໄປເປັນເວລາ 5 ວັນ ນັບແຕ່ວັນທີ ( 24-28/07/2017) ຈຶ່ງຈະສຳເລັດ.
Editor: ກຳປານາດ ລັດຖະເຮົ້າ
