ເມື່ອບໍ່ດົນມານີ້ ຫ້ອງການໂຄສະນາອົບຮົມເມືອງຄຳ ໄດ້ຈັດພິທີ ປະຖະກະຖາວັນສຳຄັນຕ່າງໆຂອງພັກ-ລັດ, ຂື້ນທີ່ສະໂມສອນປົກຄອງເມືອງຄຳ, ແຂວງຊຽງຂວາງ ໂດຍການເປັນປະທານ ທ່ານ ວຽງໄຊ ສີວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຄຳ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ທະຫານ, ຕຳຫຼວດ, ພະນັກງານ-ລັດຖະກອນພ້ອມດ້ວຍຄະນະພັກອຳນາດການປົກຄອງ 5 ບ້ານເທດສະບານເຂົ້າຮ່ວມ.
ໃນພິທີ ທ່ານ ວຽງໄຊ ສີວິໄລ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງຄຳ ໄດ້ຂື້ນຜ່ານເອກະສານວັນຄ້າຍວັນເກີດຂອງ ປະທານ ສຸພານຸວົງ ຄົບຮອບ 108 ປີ, ເອກະສານດັ່ງກ່າວ ໄດ້ຍົກໃຫ້ເຫັນເຖິງປະຫວັດ ຂອງປະທານສຸພານຸວົງ ການກຳເນີດ, ການສຶກສາຮ່ຳຮຽນ ແລະ ການນຳພາປະຊາຊົນລາວ ລູກຂື້ນຕໍ່ສູ້ ຕ້ານສັດຕູຈົນໄດ້ຮັບໄຊຊະນະ ອັນຍີ່ງໃຫຍ່.
ຫຼັງຈາກນັ້ນ ທ່ານ ມີໄຊ ແພງສາ ຮອງເລຂາພັກເມືອງ ຮອງເຈົ້າເມືອງ-ເມືອງຄຳ ກໍ່ຍັງໄດ້ຂື້ນຜ່ານເອກະສານວັນສົນທິສັນຍາມິດຕະພາບ ແລະ ການຮ່ວມມືຄົບຮອບ 40 ປີ, ວັນທີ 18 ກໍລະກົດ 1977 ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ ໃຫ້ຮູ້ອີກຕື່ມວ່າ: ລາວ-ຫວຽດນາມ ເປັນປະເທດບ້ານໃກ້ເຮືອນຄຽງມີຊາຍແດນຮ່ວມກັນຍາວ ກ່ວາ 2,000 ກິໂລແມັດ, ໂດຍອີງໃສສັນພູຫຼວງ ຮ່ວນຳໃຊ້ແມ່ນ້ຳລຳເຊ, ພູຜາປ່າດົງ, ດິນດອນຕອນຫຍ້າໃນການດຳລົງຊີວິດ ແລະ ດຳເນີນການຕໍ່ສູ້ຕ້ານກັບສັດຕູຜູ້ຮຸກຮານ, ປະຊາຊົນສອງ ຊາດລາວ-ຫວຽດນາມ ມີມູນເຊື້ອໄປມາຫາສູ້ແລກປ່ຽນສີນຄ້າ, ວັດທະນະທຳເຊິ່ງກັນ ແລະ ກັນ. ຢູ່ຫຼາຍ ທ້ອງຖິ່ນຫຼາຍບ້ານ, ຫຼາຍຄອບຄົວເປັນເປັນດອງ, ມີອຸດົມຂະຕິ, ມີຄວາມມຸ້ງມາດປາດຖະໜາອັນດຽວກັນເຊັ່ນ: ຢາກມີຄວາມເປັນເອກະລາດ, ສັນຕິພາບ ແລະ ຮັ່ງມີຜາສຸກ. ພ້ອມດຽວກັນນັ້ນ ທ່ານນາງ ທັນດາ ມີລະບູນ ກຳມະການພັກເມືອງ ຮອງປະທາງສະຫະພັນແມ່ຍິງ, ທ່ານ ຄຳແສງ ໄທລະທົມ ປະທານສານເຂດ II ກໍ່ຍັງໄດ້ຜັດປ່ຽນກັນຂື້ນຜ່ານເອກະສານວັນສ້າງຕັ້ງອົງການຈັດຕັ້ງສະຫະພັນແມ່ຍິງ ຄົບຮອບ 62 ປີ ແລະ ເອກະສານມູນເຊື້ອສານປະຊາຊົນ ຄົບຮອບ 35 ປີຕື່ມອີກ.
ຈຸດປະສົງກໍ່ເພື່ອໃຫ້ພະນັກງານລັດຖະກອນ, ທະຫານ, ຕະຫຼວດໄດ້ຮັບຮູ້ເຖິງຜົນງານຄວາມດີ ຂອງບັນພະບູລຸດໃນເມື່ອກ່ອນ, ຮູ້ເຕົ້າໂຮມຄວາມສາມັກຄີ, ຮູ້ໄຈແຍກ ມິດ ແລະ ສັດຕູ ພ້ອມທັງເອົາເປັນ ແບບຢ່າງໃນການຈັດຕັ້ງປະຕິບັດໜ້າທີ່ວຽກງານຂອງຕົນໃຫ້ມີບາດກ້າວຂະຫຍາຍຕົວຂື້ນເລື່ອຍໆ.
Editor: ກຳປານາດ ລັດຖະເຮົ້າ
