ຊຶ່ງສົກຮຽນນີ້ ມີນັກຮຽນ ມ7 ໃຫ້ຄວາມສົນໃຈເຂົ້າສອບເສັງເຂົ້າສຶກສາຕໍ່ມະຫາວິທະຍາໄລແຫ່ງຊາດ ໃນທົ່ວປະເທດ ສູງເຖິງ 18.000 ກວ່າຄົນ ແລະ ໄດ້ສໍາເລັດການສອບເສັງໃນວັນທີ 25 ກໍລະກົດ 2017 ຜ່ານມານີ້ ແຕ່ແມ່ນໃຜແນ່ທີ່ຈະແມ່ນຜູ້ໄດ້ຄະແນນດີ ແລະ ຖືກຄັດເລືອກເຂົ້າຮຽນຕົວຈິງ ເນື່ອງຈາກຕົວເລກຮອງຮັບພຽງ 1/3 ຂອງຜູ້ເຂົ້າເສັງທັງໝົດ.
ຕາມຂໍ້ມູນຫຼ້າສຸດໃຫ້ຮູ້ວ່າ: ປີນີ້ ມະຫາວິທະຍາໄລແຫ່ງຊາດ ຈະຮັບເອົານັກສຶກສາເຂົ້າຮຽນໃໝ່ ໃນຕົວເລກປະມານ 6 ພັນຄົນ ຊຶ່ງໝາຍຄວາມວ່າ ມຊ ຈະໄດ້ຄັດເລືອກເອົາພຽງ 6 ພັນຄົນ ທີ່ມີຄະແນນສອບເສັງດີທີ່ສຸດ ເພື່ອບັນຈຸເຂົ້າຮຽນຕາມຄວາມສາມາດຮອງຮັບເທົ່ານັ້ນ ໃນຂະນະທີ່ຕົວເລກເຂົ້າເສັງຕົວຈິງສູງເຖິງ 18 ພັນກວ່າຄົນທຽບໃສ່ປີ 2016 ລື່ນ 3 ພັນກວ່າຄົນ.
ສະນັ້ນ ນ້ອງນັກຮຽນທີ່ມີຈຸດປະສົງຈະເຂົ້າຮຽນທີ່ມະຫາວິທະຍາໄລແຫ່ງຊາດ ກໍ່ຕ້ອງເພື່ອໃຈໄວ້ ແລະ ຫາທາງເສັງຫຼາຍບ່ອນ ເພື່ອເປັນທາງເລືອກຕົນເອງ ໄດ້ມີບ່ອນຮຽນວິຊາຊີບສົມກັບຄວາມມຸ້ງຫວັງຕັ້ງໃຈຂອງຄອບຄົວ ແລະ ການທຸ່ມເທຮ່ຳຮຽນມາ 10 ກວ່າປີຢູ່ສາຍສາມັນ.
ຊຶ່ງການເຂົ້າຮຽນສາຍອາຊີບ ບໍ່ຈຳເປັນຕ້ອງຢູ່ ມະຫາວິທະຍາໄລສະເຫມີໄປ ຍັງມີສະຖາບັນການສຶກສາອີກຫຼາຍແຫ່ງ ເປັນຕົ້ນໂຮງຮຽນເຕັກນິກວິຊາຊີບ ແຖມຍັງເປັນສາຍທີ່ຕະຫຼາດແຮງງານຕ້ອງການຫຼາຍຢູ່ບ້ານເຮົາ ດັ່ງນັ້ນ, ນ້ອງໆຈົ່ງກຽມບົດຮຽນໃຫ້ຫຼາຍໆ ແລະ ເສັງໃຫ້ໄດ້ບ່ອນໃດໜຶ່ງ ເພາະທຸກການສຶກສາລ້ວນແລ້ວແຕ່ມີຜົນດີຕໍ່ອະນາຄົດຂອງທຸກຄົນ.
Editor: ຕະວັນ ແສງສະຫວັນ
