ໃນວັນທີ 15 ກໍລະກົດ 2017 ທີ່ໂຮງແຮງຄຣາວພາຊ້າ ໄດ້ມີເທດສະການສຶກສາຕໍ່ຕ່າງປະເທດ ຄັ້ງທຳອິດ ໃນສາທາລະນະລັດ ປະຊາທິປະໄຕ ປະຊາຊົນລາວ ຫລື ( Cassy Edcation Expo 2017 ) ງານດັ່ງກ່າວຍັງໄດ້ຮັບກຽດເຂົ້າຮ່ວມ ແລະ ຖ່າຍທອດປະສົບການຂອງ ທ່ານ ບຸນວາດສະໜາ ສຸທໍາມະວົງ, ທີ່ເຄີຍໄດ້ຮັບທືນການສຶກສາ ຈາກປະເທດ(ຍີ່ປຸ່ນ), ທ່ານ ອານຸພາບ ບຸນພານິດ ທີ່ເຄີຍໄດ້ຮັບທຶນການສຶກສາຈາກປະເທດ( ອົດສະຕາລີ), ທ່ານ ສຸກວິໄລ ວິລາວົງ ທີ່ເຄີຍໄດ້ຮັບທຶນການສຶກສາຈາກ ( ອາເມລິກາ) ແລະ ນ້ອງໆນັກຮຽນເຂົ້າຮ່ວມຢ່າງພ້ອມພຽງ.
ຈຸດປະສົງໃນການຈັດງານ ໃນຄັ້ງນີ້ ເພື່ອສົ່ງເສີມ ແລະ ແບ່ງປັນຂໍ້ມູນການສຶກສາຢູ່ຕ່າງປະເທດ ບໍ່ວ່າຈະເປັນທຶນການສຶກສາສ່ວນຕົວ, ທຶນມະຫາໄລ ຫຼື ທຶນຂອງລັດຖະບານ ຜ່ານໜ່ວຍງານ ສະຖາບັນທີ່ໃຫ້ທຶນ ແລະ ນັກສຶກສາ ທີ່ເຄີຍໄດ້ຮັບທືນຜ່ານມາ ເພື່ອມາໃຫ້ຂໍ້ມູນ ແລະ ແບ່ງປັນປະສົບການ ແລະ ໂອກາດຕ່າງໆ ທີ່ນ້ອງໆນັກສຶກສາ ຂອງປະເທດລາວຄວນໄດ້ຮັບ ແລະ ຖາມຕອບໃຫ້ນ້ອງໆທີ່ມີຄວາມສົນໃຈ ກຳລັງຢາກຈະໄປຮຽນຕໍ່ຕ່າງປະເທດ ແລະ ເຄັດລັບການກຽມພ້ອມການເສັງເອົາທືນຕ່າງໆ ທີ່ມີຢູ່ໃນປະເທດລາວ. ນອກຈາກນັ້ນ ຍັງມີສະຖາການສຶກສາຈາກຕ່າງປະເທດໄດ້ເຂົ້າຮ່ວມເຊັ່ນ: ຈາກປະເທດອັງກິດ, ອົດສະລີ, ມາເລເຊຍ, ໄທ ແລະ ປະເທດອື່ນໆ ມາໃຫ້ຂໍ້ມູນຢ່າງເຊິງລຶກ ທີ່ຫຼາກຫຼາຍ. ແລະ ຍັງມີນ້ອງໆນັກຮຽນລາວ 10 ກວ່ານ້ອງ ທີ່ກຳລັງສຶກສາຕໍ່ຢູ່ປະເທດ ອັງກິດ, ອາເມລິກາ, ມາເລເຊຍ ມາແບ່ງປັນປະສົບການ ໃນເລື່ອງການນໍາໃຊ້ຊີວິດ, ຄ່າຄອງຊີບຢູ່ຕ່າງປະເທດ.
ພາຍໃນງານ ຍັງມີກິດຈະກຳ ການຫຼີ້ນເກມຮ່ວມກັບນ້ອງທີ່ເຂົ້າຮ່ວມງານ, ການຟັງຄຳບັນຍາຍຂອງອາຈານທີ່ເຄີຍໄດ້ຮັບທືນການສຶກສາມາກ່ອນ, ການເຝິກອົບຮົມເຄັດລັບການສອບເສັງ ໄອເອວສ (IETL) ຈາກອາຈານທີ່ມີປະສົບການໂດຍກົງຈາກຕ່າງປະເທດ ແລະ ປະເທດລາວ ທີ່ມາໃຫ້ຄວາມຮູ້ໃນການສອບເສັງໄປຮຽນຕໍ່.
Editor: ຕະວັນ ແສງສະຫວັນ
