ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງວຽງຈັນ ໄດ້ເປີດບັ້ນດຳເນີນຊີວິດການເມືອງປັບປຸງປົວແປງພັກ ໃນວັນທີ 24 ກໍລະກົດ 2017 ແລະ ຈະດຳເນີນເປັນເວລາ 5 ວັນ ຂື້ນຢູ່ທີ່ສູນວັດທະນະທຳແຂວງວຽງຈັນ.
ກອງປະຊຸມຄັ້ງນີ້ ທ່ານ ກອງຄໍາ ອິນໄພຍະລາດ ກຳມະການພັກແຂວງ, ຫົວຫນ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງວຽງຈັນ ກ່າວວ່າ: ການດຳເນີນຊີວິດການເມືອງ ປັບປຸງປົວແປງພັກ ຄັ້ງນີ້, ມີສະມາຊິກພັກພາຍໃນຄະນະພັກຮາກຖານພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ເຂົ້າຮ່ວມ 66 ສະຫາຍ,ຍິງ 17 ສະຫາຍ. ບັ້ນດຳເນີນຊີວິດການເມືອງຄັ້ງນີ້ ນັບວ່າມີຄວາມໝາຍຄວາມສຳຄັນທີ່ສຸດ ເພາະມັນແມ່ນມູນເຊື້ອ ແລະ ທັງແມ່ນຫລັກການນຳພາຂອງພັກ ທີ່ຖືແນວທາງມະຫາຊົນເປັນກົກ ໂດຍມີການໝູນໃຊ້ລັດທິມາກ-ເລນິນເປັນເຂັມຊີ້ທິດເຍືອງທາງ, ທັງແມ່ນຄວາມຮຽກຮ້ອງຕ້ອງການອັນຮີບດ່ວນ ເພື່ອປັບປຸງ, ປົວແປງ ແລະ ເຊີດຊູຄວາມຮັບຜິບຊອບ ຂອງຄະນະພັກແຕ່ລະຂັ້ນ, ສະມາຊິກພັກແຕ່ລະສະຫາຍ ທັງແມ່ນຄວາມຈຳເປັນພາວະວິໄສຂອງພັກເຮົາ ໃນພາລະກິດປ່ຽນແປງໃໝ່,ແນ່ໃສຊອກໃຫ້ເຫັນ ແລະ ແກ້ໄຂປະກົດການ ຫຍໍ້ທໍ້ເປັນຕົ້ນແມ່ນບັນຫາທີ່ດິນ, ພ້ອມນີ້ ກອງປະຊຸມຈະໄດ້ພ້ອມກັນເຊື່ອມຊຶມເອກະສານ ເດັດດ່ຽວປັບປຸງປົວແປງພັກໃຫ້ປອດໃສ, ເຂັ້ມແຂງ, ໜັກແໜ້ນ ແລະ ອື່ນໆ.
ຈາກນັ້ນບັນດາ ສະມາຊິກພັກ ຈະໄດ້ຂຽນໃບສຳຫລວດ, ແບ່ງໜ່ວຍ, ຜ່ານ ແລະ ປະກອບຄຳເຫັນໃສ່ບົດສຳຫລວດບຸກຄົນ ທາບທາມຫາງສຽງຄວາມໄວ້ວາງໃຈຂອງເລຂາໜ່ວຍ, ຄະນະພັກແຕ່ລະສະຫາຍ, ສະຫລຸບຕີລາຄາ ຜົນສຳເລັດການດຳເນີນຊີວິດການເມືອງ ປັບປຸງປົວແປງພາຍໃນພັກໃນເທື່ອນີ້ອີກດ້ວຍ.
ຈາກນັ້ນ, ຈະໄດ້ຮັບຟັງການໂອ້ລົມຂອງ ທ່ານ ວິນັດ ສີສຸວົງ ຄະນະປະຈໍາພັກແຂວງ, ປະທານກວດກາພັກ, ຫົວໜ້າພະແນກກວດກາລັດແຂວງວຽງຈັນ ກ່ຽວກັບການຈັດຕັ້ງປະຕິບັດບັນດາໜ້າວຽກ ແລະ ຂອບເຂດຄວາມຮັບຜິດຊອບຂອງຕົນ ເພື່ອເປັນທິດທາງໃນການຈັດຕັ້ງປະຕິບັດວຽກງານໃນຕໍ່ໜ້າ.
Editor: ກຳປານາດ ລັດຖະເຮົ້າ
