ໃນວັນທີ 17 ກໍລະກົດ ທີ່ຜ່ານມາ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ຈັດກອງປະຊຸມບັ້ນດຳເນີນຊີວິດການເມືອງປັບປຸງປົວແປງພັກທົ່ວເມືອງຂຶ້ນ ຢູ່ທີ່ສະໂມສອນ ສະຖາບັນສ້າງຄູດົງຄຳຊ້າງ ໂດຍເປັນກຽດເຂົ້າຮ່ວມຂອງ ທ່ານ ຄຳພັນ ມາລາບັນດິດ, ຄະນະປະຈຳພັກ ນະຄອນຫຼວງວຽງຈັນ ຫົວໜ້າພະແນກການເງິນ ນະຄອນຫຼວງວຽງຈັນ, ທ່ານ ບຸນທາມ ພຸດທະວົງສາ ເລຂາພັກເມືອງ ເຈົ້າເມືອງຫາດຊາຍຟອງ, ມີຮອງເລຂາພັກ, ຮອງເຈົ້າເມືອງ, ຄະນະພັກ, ຫົວໜ້າຫ້ອງການ ແລະ ເລຂາ, ຮອງເລຂາໜ່ວຍພັກທົ່ວເມືອງເຂົ້າຮ່ວມ.
ໃນບັ້ນດຳເນີນຊີວິດການເມືອງປັບປຸງປົວແປງພັກທົ່ວເມືອງຫາດຊາຍຟອງໃນຄັ້ງນີ້ ແມ່ນໄດ້ພ້ອມກັນທົບທວນຫວນຄືນຕີລາຄາຜົນສຳເລັດໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ 10 ຂອງພັກ ແລະ ເປັນໂອກາດທີ່ດີໃຫ້ແກ່ຄະນະພັກເມືອງຫາດຊາຍຟອງ ໃນການເຊື່ອມຊືມເອກະສານບັ້ນດຳເນີນຊີວິດການເມືອງປັບປຸງປົວແປງພັກ ເພື່ອສ້າງໃຫ້ໄດ້ຄວາມໂປ່ງໃສຄວາມສາມັກຄີ ແລະ ດິດດ່ຽວໜຽວແໜ້ນໃນທົ່ວອົງຄະນະພັກເມືອງຫາດຊາຍຟອງ ເພື່ອໃຫ້ບັນລຸຕາມເປົ້າໝາຍ ແລະ ຈຸດປະສົງທີ່ວາງໄວ້.
ໃນໂອກາດດັ່ງກ່າວ ທ່ານ ບຸນທາມ ພຸດທະວົງສາ ເລຂາພັກເມືອງ ເຈົ້າເມືອງຫາດຊາຍຟອງ, ກໍ່ໄດ້ຂຶ້ນກ່າວລາຍງານຈຸດປະສົງ ແລະ ເນື້ອໃນສຳຄັນຂອງບັ້ນດຳເນີນຊີວິດການເມືອງປັບປຸງປົວແປງພັກ, ຈາກນັ້ນ ທ່ານ ຄຳພັນ ມາລາບັນດິດ, ຄະນະປະຈຳພັກ ນະຄອນຫຼວງວຽງຈັນ ຫົວໜ້າພະແນກການເງິນ ນະຄອນຫຼວງວຽງຈັນ, ທັງເປັນຜູ້ຮັບຜິດຊອບດຳເນີນຊີວິດການເມືອງປັບປຸງປົວແປງພັກ, ຂັ້ນນະຄອນຫຼວງວຽງຈັນ, ກໍ່ໄດ້ມີຄຳ ແລະ ໃຫ້ທິດຊີ້ນຳຕໍ່ກອງປະຊຸມໃນຄັ້ງນີ້ ເພື່ອໃຫ້ກອງປະຊຸມໄດ້ມີເນື້ອໃນ ຄວາມໝາຍທີ່ໜັກແໜ້ນ ເຂັ້ມແຂງ ແລະ ປອດໃສມີຄວາມສາມັກຄີ ທົ່ວພັກຢ່າງເລິກເຊິ່ງ.
Editor: ດາວໄຊ ສີວິໄລ
