ໃນວັນທີ 20 ກໍລະກົດ 2017 ຜ່ານມານີ້ ຢູ່ທີ່ສະໂມສອນເມືອງ ລະຄອນເພັງ ໄດ້ມີພິທີ ປາຖະກະຖາ ວັນເຊັນສົນທິສັນຍາມິດຕະພາບ ແລະ ການຮ່ວມມືຮອບດ້ານລາວ - ຫວຽດນາມ ຄົບຮອບ 40 ປີ (18 ກໍລະກົດ 1977 ຫາ 18 ກໍລະກົດ 2017), ວັນສ້າງຕັ້ງສາຍພົວພັນການທູດຄົບຮອບ 55 ປີ ( 5 ກັນຍາ 1962 – 5 ກັນຍາ 2017), ວັນຄ້າຍວັນເກີດປະທານ ສຸພາ ນຸວົງ ຄົບຮອບ 108 ປີ (13 ກໍລະກົດ 1909 - 13 ກໍລະກົດ 2017) ແລະ ວັນສ້າງຕັ້ງສະຫາພັນແມ່ຍິງລາວ ຄົບຮອບ 62 ປີ (20 ກໍລະກົດ 1955 – 20 ກໍລະກົດ 2017). ໂດຍເປັນກຽດເຂົ້າຮ່ວມ ແລະ ປາຖະກະຖາ ຂອງທ່ານ ພັນຕີ ບຸນທະວີ ພິມະສານ ຮອງເລຂາພັກເມືອງ, ຫົວໜ້າຄະນະຈັດຕັ້ງເມືອງ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ພະນັກງານລັດຖະກອນ - ອາສາສະ ໝັກ, ທະຫານ, ຕໍ່າຫຼວດ, ຄອບຄົວການນໍາ ແລະ ສະຫາພັນແມ່ຍິງ ບ້ານອ້ອມຂ້າງເທສະບານ ເຂົ້າຮ່ວມຮັບຟັງ 198 ທ່ານ,ຍິງ 120 ທ່ານ.
ໃນພິທີ ທ່ານ ພັນຕີ ບຸນທະວີ ພິມະສານ ຮອງເລຂາພັກເມືອງ, ຫົວໜ້າຄະນະຈັດຕັ້ງເມືອງ ໄດ້ຍົກໃຫ້ເຫັນ ສະພາບແວດລ້ອມ ແຫ່ງການກໍາເນີດເຕີບໃຫຍ່ຂະຫຍາຍຕົວ ຂອງຄວາມສາມັກຄີພິເສດ ແລະ ການຮ່ວມມືຮອບດ້ານ, ໝາກຜົນອັນພົ້ນເດັ່ນ ແລະ ການສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ ,ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງລາວ-ຫວຽດນາມ. ຄວາມຜູກພັນ, ສາມັກຄີ, ຊ່ວຍເຫຼືອເຊິ່ງກັນ ແລະ ກັນ ອັນເປັນມູນເຊື້ອ ຍິ່ງເພີ່ມຄວາມສິໜິດແໜ້ນ ແລະ ເຕີບໃຫຍ່ ກາຍເປັນຄວາມສາມັກຄີພິເສດ ແລະການພົວພັນຮ່ວມມືຮອບດ້ານ ຂອງສອງຊາດລາວ-ຫວຽດນາມ ໂດຍແມ່ນທ່ານປະທານ ໂຮຈີມິນ, ປະທານ ໄກສອນ ພົມວິຫານ ແລະ ປະທານ ສຸພາ ນຸວົງ ເປັນຜູ້ລິເລີ່ມ. ນັບແຕ່ນັ້ນມາ, ການນໍາແຕ່ລະຮຸ່ນ ຂອງສອງພັກ,ສອງລັດ ແລະ ປະຊາຊົນສອງຊາດ ຕ່າງກໍໄດ້ເອົາໃຈໃສ່ປັບປຸງ, ເສີມຂະຫຍາຍ ກາຍເປັນການພົວພັນສາມັກຄີ ອັນບໍລິສຸດຜຸດຜ່ອງ ທີ່ຫາໄດ້ຍາກໃນການພົວສາກົນ ແລະ ກາຍເປັນມໍລະດົກອັນລໍ້າຄ່າຂອງສອງຊາດລາວ-ຫວຽດນາມ.
ຈາກນັ້ນ, ຜູ້ເຂົ້າຮ່ວມຍັງໄດ້ຮັບຟັງ ການປາຖະກະຖາ ວັນຄ້າຍວັນເກີດປະທານ ສຸພາ ນຸວົງ ຄົບຮອບ 108 ປີ ແລະ ວັນສ້າງຕັ້ງສະຫາພັນແມ່ຍິງລາວ ຄົບຮອບ 62 ປີ ໂດຍການຜັດປ່ຽນກັນຂຶ້ນປາຖະກະຖາຂອງ ທ່ານ ນາງ ສຸວັນນີ ລາຊະວົງເມືອງ ກໍາມະການພັກເມືອງ ຫົວໜ້າຄະນະໂຄສະນາອົບຮົມເມືອງ ແລະ ທ່ານ ນາງ ມະນີໄລ ຈໍາປາມະນີວົງ ກໍາມະການພັກເມືອງ ປະທານສະຫາພັນແມ່ຍິງເມືອງ.
Editor: ດາວໄຊ ສີວິໄລ
