ແຂວງຊຽງຂວາງ ເປັນແຂວງດຽວໃນປະເທດລາວ ທີ່ມີການຄົ້ນພົບໄຫຫີນ ແລະ ໃນປັດຈຸບັນ ທາງອົງການອຸຍແນສໂກ (UNESCO) ພວມພິຈາລະນາຮັບຮອງເອົາ ທົ່ງໄຫຫີນ ເປັນສະຖານທີ່ ທ່ອງທ່ຽວ ມໍລະດົກໂລກ ແຫ່ງທີ 3 ຂອງປະເທດລາວ. ຢູ່ແຂວງຊຽງຂວາງ ມີທົ່ງໄຫຫີນ ເຖິງ 3 ແຫ່ງ ຄື: ໄຫຫີນ 1 ແມ່ນ ຕັ້ງຢູ່ທາງ ທິດຕາເວັນຕົກສ່ຽງເໜືອຂອງຕົວເມືອງໂພນສະຫວັນ ປະມານ 8 ກິໂລແມັດ, ຢູ່ທີ່ນີ້ ປະກອບ ດ້ວຍໄຫຫີນ ທັງ ໝົດ 334 ໜ່ວຍ, ຈາກການປະເມີນ ທາງດ້ານນ້ຳໜັກ ແລະ ລວງຮອບຕົວຈິງ ເຫັນວ່າໄຫຫີນ ໜ່ວຍທີ່ໃຫຍ່ກວ່າໝູ່ ມີນ້ຳໜັກ ຫລາຍກ່ວາ 10.000 ກິໂລກລາມ ແລະ ລວງຮອບ 8,14 ແມັດ, ສິ່ງດັ່ງກ່າວຈຶ່ງເປັນທີ່ໜ້າສົນໃຈວ່າ: ຄົນສະໄໝກ່ອນ ຂົນຍ້າຍໄຫຫີນ ດ້ວຍວິທີໃດ ຈາກບ່ອນຜະລິດ ໄຫຫີນຢູ່ພູເກັງ ມາຫາສະຖານທີ່ນີ້ ທີ່ມີໄລຍະ ທາງເກືອບ 10 ກິໂລແມັດ.
ພາຍໃນທົ່ງໄຫຫີນ ຍັງມີຖ້ຳ ທີ່ມີຄວາມລຶກລັບ ທາງດ້ານປະຫວັດສາດ ອີກຫລາຍຢ່າງ ທີ່ໜ້າສຶກສາ ຄົ້ນຄວ້າ. ສ່ວນໄຫຫີນ 2 ແມ່ນຕັ້ງຢູ່ລະຫວ່າງ ທາງຕົວເມືອງໂພນສະຫວັນ ຫາ ເມືອງຜາໄຊ ປະມານ 20 ກິໂລແມັດ, ເປັນແຫລ່ງທ່ອງທ່ຽວ ທີ່ມີໄຫຫີນ ແລະ ຕົ້ນໄມ້ທີ່ສວຍງາມ, ໃນນີ້ ມີໄຫຫີນ ທັງໝົດ 92 ໜ່ວຍ, ມີທາດ 1 ທາດ ເຊິ່ງຕາມການໃຫ້ຂໍ້ມູນຂອງປະຊາຊົນວ່າ ທາດດັ່ງກ່າວສ້າງຂຶ້ນ ໂດຍຝຣັ່ງ ແຕ່ບໍ່ມີຂໍ້ມູນຢັ້ງຢືນ. ໃນໄລຍະຜ່ານມານັກທ່ອງທ່ຽວ ທີ່ເຂົ້າມາທ່ຽວຊົມແຫລ່ງທ່ອງທ່ຽວແຫ່ງນີ້ ແມ່ນມີຈຳນວນ ເພີ່ມຂຶ້ນທຸກວັນ, ຖືວ່າເປັນແຫລ່ງທ່ອງທ່ຽວ ທີ່ນັກທ່ອງທ່ຽວສົນໃຈເປັນອັນດັບສອງ… ແລະ ຫ່າງຈາກຕົວເມືອງ ໂພນສະຫວັນ ປະມານ 32 ກິໂລແມັດ ແມ່ນແຫລ່ງທ່ອງ ທ່ຽວທາງດ້ານ ວັດທະນະທໍາ ທີ່ໄດ້ຮັບຄວາມນິຍົມເປັນອັນດັບ 3 ຂອງແຂວງຊຽງຂວາງ ນັ້ນກໍແມ່ນໄຫຫີນ 3 ເຊິ່ງໃນນີ້ ມີໄຫຫີນ ທັງໝົດ 150 ໜ່ວຍ, ມີຕົ້ນໄມ້ ທີ່ສວຍງາມ. ໃນລະດູແລ້ງ ສາມາດເດີນທາງໄປເຖິງແຫລ່ງທ່ອງທ່ຽວ ໄດ້ຢ່າງສະດວກ ສະບາຍ, ສ່ວນລະດູຝົນ ນັກທ່ອງທ່ຽວ ບາງຄົນບໍ່ສາມາດໄປໄດ້ ຍ້ອນທາງຍ່າງ ຈາກ ບ້ານຂ້າມທົ່ງນາ ໄປຫາທົ່ງໄຫຫີນ ມີຄວາມຫຍຸ້ງຍາກຫລາຍ.
ໄຫຫີນ ທັງສາມແຫ່ງນີ້ ຖືວ່າ ເປັນສະຖານທີ່ ທ່ອງທ່ຽວທີ່ມີຊື່ສຽງ ແລະ ໄດ້ຮັບຄວາມ ນິຍົມຈາກ ນັກທ່ອງທ່ຽວ ພາຍໃນ ແລະ ຕ່າງປະເທດ ເປັນຈຳນວນ ຫລວງຫລາຍ ເຮັດໃຫ້ ທົ່ງໄຫຫີນ ມີຊື່ສຽງໂດງດັງ ແລະ ທ່ານໃດທີ່ໄດ້ໄປແຂວງຊຽງຂວາງ ກໍຢ່າລືມໄປສຳພັດກັບຄວາມຍິ່ງໃຫຍ່ ຂອງໄຫຫີນເຊື່ອ ວ່າທ່ານຈະປະທັບໃຈ ກັບບັນຍາກາດອັນສົດຊື່ນ ຈົນອົດບໍ່ໄດ້ທີ່ຈະຖ່າຍຮູບງາມໆ ເພື່ອເກັບໄວ້ເປັນທີ່ລະນຶກ…
ຂອບໃຈຂໍ້ມູນຈາກ ຫນັງສືພິມຂ່າວສານປະເທດລາວ

Editor: ຕະວັນ ແສງສະຫວັນ