ໃນເມື່ອບໍ່ດົນນີ້ ສະຫະພັນແມ່ຍິງເມືອງ ລະຄອນເພັງ ໄດ້ຈັດຕັ້ງປະຖະກະຖາ ເນື່ອງໃນໂອກາດວັນສ້າງຕັ້ງສະຫະພັນແມ່ຍິງລາວ ຄົບຮອບ 62 ປີ (20 ກໍລະກົດ 1955 ຫາ 20 ກໍລະກົດ 2017) ຂຶ້ນຢ່າງເປັນທາງການ ຢູ່ທີ່ສະໂມສອນຂອງເມືອງ ໂດຍການປາຖະກະຖາຂອງທ່ານນາງ ມະນີໄລ ຈໍາປາມະນີວົງ, ກໍາມະການພັກເມືອງ ປະທານສະຫະພັນແມ່ຍິງເມືອງ, ມີທ່ານ ພັນຕີ ບຸນທະວີ ພິມມະສານ, ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ, ບັນດາທ່ານໃນຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ພະນັກງານ-ລັດຖະກອນ,ທະຫານ, ຕໍາຫຼວດ, ຄອບຄົວການນໍາ ແລະ ສະຫາພັນແມ່ຍິງບ້ານອ້ອມຂ້າງເທສະບານເຂົ້າຮ່ວມຮັບຟັງ.
ທ່ານປະທານສະຫະພັນແມ່ຍິງເມືອງ ໄດ້ຫວນຄືນເຖິງປະຫວັດແຫ່ງການກໍາເນີດ ແລະ ການຂະຫຍາຍຕົວຂອງອົງການຈັດຕັ້ງສະຫະພັນແມ່ຍິງລາວ ພ້ອມທັງຍົກໃຫ້ເຫັນເຖິງຜົນງານທີ່ພົ້ນເດັ່ນ ຂອງຂະບວນການແມ່ຍິງ ນັບແຕ່ມື້ສ້າງຕັ້ງເປັນຕົ້ນມາ ອົງການຈັດຕັ້ງແມ່ຍິງລາວ ກໍໄດ້ເຄື່ອນໄຫວຕາມພາລະບົດບາດ ທີ່ໄດ້ກໍານົດໃນໂຄງການດໍາເນີນງານ, ກົດລະບຽບ, ທັງການຄົ້ນຄວ້າປັບປຸງ, ຂະຫຍາຍການຈັດຕັ້ງ, ການເຄື່ອນໄຫວໃຫ້ສອດຄ່ອງກັບຄວາມເປັນຈິງ ແລະ ຄວາມຮຽກຮ້ອງຕ້ອງການຂອງໜ້າທີ່ການເມືອງໃນແຕ່ລະໄລຍະ.
ເຊິ່ງການເຄື່ອນໄຫວຂອງແມ່ຍິງ ໄດ້ກາຍເປັນການປະກອບສ່ວນອັນສໍາຄັນ ເຂົ້າໃນພາລະກິດຕໍ່ສູ້ປົດປ່ອຍຊາດໃນໄລຍະກ່ອນ ແລະ ເຂົ້າຮ່ວມຢ່າງຕັ້ງໜ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ ໂດຍສະເພາະແມ່ນການຈັດຕັ້ງປະຕິບັດແຜນພັດທະນາແມ່ຍິງລາວ ແນ່ໃສ່ສົ່ງເສີມຄວາມກ້າວໜ້າຂອງແມ່ຍິງ, ສົ່ງເສີມສິດສະເໝີພາບລະຫວ່າງ ຍິງ - ຊາຍ ໃນຄອບຄົວ, ອົງການຈັດຕັ້ງພັກ-ລັດ ແລະ ສັງຄົມ.
Editor: ດາວໄຊ ສີວິໄລ
