ພິທີປາຖະກະຖາ ດັ່ງກ່າວ ໄດ້ຈັດຂື້ນ ທີ່ສຳນັກງານສູນກາງແນວລາວສ້າງຊາດ, ທີ່ນະຄອນຫລວງວຽງຈັນ ໃນວັນທີ 26 ກໍລະກົດ 2017 ໂດຍການເປັນປະທານຂອງ ທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສູນກາງແນວລາວສ້າງຊາດ ແລະ ທ່ານ ທ່າວ ຊວນຊຸງ ກຳມະການສູນກາງພັກ ກອມມູນິດຫວຽດນາມ, ຮອງຫົວຫນ້າຄະນະຂົນຂວາຍ ປະຊາຊົນ ສູນກາງກອມມູນິດຫວຽດນາມ. ພ້ອມດ້ວຍຄະນະຮອງປະທານ ທັງສອງຝ່າຍ, ມີບັນດາຫົວຫນ້າກົມ, ຮອງກົມ, ພະນັກງານຫລັກແຫລ່ງ ພາຍໃນ ແລະ ອ້ອມຂ້າງເຂົ້າຮ່ວມ ຢ່າງພ້ອມພຽງ.
ການປາຖະກະຖາ ດັ່ງກ່າວ ຈັດຂື້ນໃນທ່າມກາງບັນຍາກາດ ທີ່ສອງພັກ-ສອງລັດ ແລະ ປະຊາຊົນລາວ ສອງຊາດ ລາວ-ຫວຽດນາມ ພວມມີຄວາມປິຕິຊົມຊື້ນ ແລະ ເອກອ້າງທະນົງໃຈ ຕໍ່ສາຍພົວພັນທີ່ເປັນມູນເຊື້ອ ຂອງ ລາວ-ຫວຽດນາມ, ດ້ວຍນ້ຳໃຈ ມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ການສະເຫລີມສະຫລອງ 2 ວັນປະຫວັດສາດ ແຫ່ງການພົວພັນ ລາວ-ຫວຽດນາມ, ຫວຽດນາມ-ລາວ ຄື: ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 40 ປີ.
ການປາຖະກະຖາ ດັ່ງກ່າວ ຈັດຂື້ນ ໃນໂອກາດທີ່ ຄະນະຜູ້ແທນຂັ້ນສູງ ຂອງຄະນະຂົນຂວາຍປະຊາຊົນ ສູນກາງພັກກອມມູນິດ ຫວຽດນາມ ມາເຄື່ອນໄຫວ ຢ້ຽມຢາມ ແລະ ປະຕິບັດຫນ້າທີ່ ຢູ່ ສປປ ລາວ ຕາມຂໍ້ຕົກລົງສອງຝ່າຍ ລະຫວ່າງ ຄະນະກຳມະການສູນກາງແນວລາວສ້າງຊາດ ແລະ ຄະນະຂົນຂວາຍປະຊາຊົນສູນກາງ ພັກກອມມູນິດຫວຽດນາມ ໂດຍຈັດຈັ້ງປາຖະກາຖາ ພາຍໃຕ້ຫົວຂໍ້: ບົດຮຽນວຽກງານຂົນຂວາຍປະຊາຊົນ ພັກກອມມູນິດຫວຽດນາມ ໃນໄລຍະໃຫມ່.
Editor: ກຳປານາດ ລັດຖະເຮົ້າ
