ໃນເມື່ອບໍ່ດົນນີ້ ອົງການໄອຍະການປະຊາຊົນສູງສຸດ ໄດ້ຈັດຕັ້ງປາຖະກະຖາ ຫວນຄູນມູນເຊື້ອການສ້າງຕັ້ງສໍາຄັນຂອງຊາດຄື: ວັນຄ້າຍວັນເກີດປະທານ ສຸພານຸວົງ ຄົບຮອບ 108 ປີ, ວັນເຊັນສົນທິສັນຍາມິດຕະພາບ ການຮ່ວມມືລາວ-ຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ ເພື່ອໃຫ້ສະມາຊິກພັກພະນັກງານ-ລັດຖະກອນ, ອ້ອມຂ້າງອົງການດັ່ງກ່າວໃຫ້ຮັບຮູ້ເຂົ້າໃຈເຫັນໄດ້ຄວາມສໍາຄັນຂອງວັນດັ່ງກ່າວຢ່າງເລິກເຊິ່ງ ແລະ ໜັກແໜ້ນ,
ໃຫ້ກຽດປາຖະກະຖາ ໂດຍທ່ານ ໄຊຊະນະ ໂຄດພູທອນ, ຮອງຫົວໜ້າອົງການໄອຍະການປະຊາຊົນສູງສຸດ,ເຊິ່ງທ່ານໄດ້ຍົກໃຫ້ເຫັນບັນດາຜົນງານ ແລະ ຄວາມງາມຄວາມດີຂອງປະທານ ສຸພາ ນຸວົງ, ທີ່ໄດ້ສະແດງອອກໃນທຸກໆໄລຍະຂອງການປະຕິວັດ ທີ່ທ່ານໄດ້ສຸມສະຕິປັນຍາ ແລະ ເຫື່ອແຮງຂອງຕົນ ເພື່ອຊີ້ນຳຂະບວນການປະຕິວັດ ລາວ ຍາດເອົາໄຊຊະນະອັນຫຍິ່ງໃຫຍ່ມາໃຫ້ປະເທດຊາດ ຫຼັງຈາກປະເທດຊາດໄດ້ຮັບການປົດປ່ອຍ ນັບແຕ່ປີ 1975 -1995 ປະທານ ສຸພາ ນຸວົງ ໄດ້ນຳພາປະຊາຊົນລາວ ຜ່ານຜ່າອຸປະສັກຕ່າງໆ ໃນໄລຍະຂ້າມຜ່ານນຳພາປະຊາຊົນ ດຳເນີນພາລະກິດປ່ຽນແປງໃໝ່ ແລະ ນໍາພາປະຊາຊົນສ້າງສາພັດທະນາປະເທດຊາດໃຫ້ຈະເລີນຮຸ່ງ ເຮືອງເທື່ອລະກ້າວ.
ພ້ອມນີ້ ທ່ານ ໄຊຊະນະ ໂຄດພູທອນ ຍັງໄດ້ຍົກໃຫ້ເຫັນໝາກຜົນອັນພົ້ນເດັ່ນຂອງການພົວພັນມິດຕະພາບ ແລະ ການຮ່ວມມືຮອບດ້ານລາວ-ຫວຽດນາມ, ໃນໄລຍະຜ່ານມາຈົນເຖິງປັດຈຸບັນ ລາວ-ຫວຽດນາມ ໄດ້ສືບຕໍ່ເສີມຂະຫຍາຍສາຍພົວພັນຄວາມສາມັກຄີພິເສດ ແລະ ການຮ່ວມມືຮອບດ້ານນຳກັນທັງທາງກ້ວາງ ແລະ ທາງເລິກ ທັງລະດັບສູນກາງ ແລະ ທ້ອງຖິ່ນ ເພື່ອຜົນປະໂຫຍດຂອງປະຊາຊົນສອງປະເທດ ໂດຍສະເພາະດ້ານການເມືອງ, ການຕ່າງປະເທດ ໄດ້ຮັບການປັັບປຸງເສີມຂະຫຍາຍຢ່າງໜັກແໜ້ນ ສ້າງຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ ສ້າງຄວາມຜູກພັນລະຫວ່າງ ການນຳ ແລະ ປະຊາຊົນສອງປະເທດ ໄດ້ມີຄວາມເລິກເຊິ່ງກວ່າເກົ່າ. ບັນດາກະຊວງຂະແໜງການ, ອົງການ, ການຈັດຕັ້ງທ້ອງຖິ່ນສອງປະເທດ ໄດ້ເພີ່ມທະວີການພົບປະແລກປ່ຽນບົດຮຽນ ປະສານສົມທົບເປີດກ້ວາງຮ່ວມມືຊ່ວຍເຫຼືອເຊິ່ງກັນ ແລະ ກັນ ໃຫ້ແທດເໝາະກັບຕົວຈິງມີປະສິດທິຜົນ ແລະ ໃນປີ 2011 ໄດ້ສຳເລັດໂຄງການຮຽບຮຽງປື້ມປະຫວັດສາດສາຍພົວພັນພິເສດລາວ-ຫວຽດນາມ ນັບແຕ່ປີ 1930 - ປີ 2007 ແລະ ໄດ້ກຳນົດເອົາປີ 2012 ເປັນປີສາມັກຄີມິດຕະພາບລາວ-ຫວຽດ.
Editor: ດາວໄຊ ສີວິໄລ
