ບັ້ນດໍາເນີນຊີວິດການເມືອງ ປັບປຸງປົວແປງພັກ ຂອງໜ່ວຍພັກສໍານັກງານອ້ອມຂ້າງ ເມືອງລະຄອນເພັງ ໄດ້ຈັດຂຶ້ນ ໃນທ້າຍອາທິດຜ່ານມານີ້ ຢູ່ທີ່ສະໂມສອນຂອງເມືອງ ໂດຍພາຍໃຕ້ການເປັນປະທານ ຂອງທ່ານ ແກ້ວຜາ ສີລາດວງໃຈ ຮັກສາການເລຂາພັກ-ເຈົ້າເມືອງໆ ລະຄອນເພັງ ມີບັນດາທ່ານໃນຄະປະຈໍາພັກເມືອງ, ກໍາມະການພັກເມືອງ, ເລຂາໜ່ວຍພັກ, ຄະນະໜ່ວຍພັກ, ສະມາຊິກພັກໜ່ວຍສໍານັກງານອ້ອມຂ້າງເມືອງ ແລະ ລັດຖະກອນຜູ້ມີຕໍາແໜ່ງບໍລິຫານ ນັບແຕ່ຮອງໜ່ວຍງານເຂົ້າຮ່ວມ.
ກອງປະຊຸມໄດ້ຍົກໃຫ້ເຫັນ ຄວາມໝາຍສໍາຄັນ ແລະ ຄວາມຈໍາເປັນອັນຮີບດ່ວນ ໃນການປັບປຸງປົວແປງພັກ ຕາມຄໍາສັ່ງແນນະນໍາເລກທີ 01/ກມສພ. ແນໃສ່ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ, ມີການຫັນປ່ຽນຢ່າງຕັ້ງໜ້າ ແລະ ທັນກັບສະພາບການ. ພ້ອມນີ້, ທ່ານໄດ້ຮຽກຮ້ອງ ໃຫ້ຄະນະໜ່ວຍພັກ ແລະ ສະມາຊິກພັກທຸກທ່ານ ຈົ່ງພ້ອມກັນເຊີດຊູ ແລະ ຍົກສູງຄວາມຮັບຜິດຊອບ, ກ້າຫານຕໍານິຕົນເອງ ແລະ ຕິຊົມໝູ່ຄະນະ, ເດັດດ່ຽວ, ຈິງໃຈຊ່ວຍເຫຼືອເຊິ່ງກັນ ແລະ ກັນ. ເພື່ອພ້ອມກັນຊອກຫາ ແລະ ປັບປຸງແກ້ໄຂ ບັນດາປະກົດການຫຍໍ້ທໍ້ຕ່າງໆພາຍໃນພັກເຊັ່ນ: ການຖືເບົາໃນການເຝິກຫລໍ່ຫລອມຕົນເອງ, ປະກົດການເຊື່ອມຄຸນປ່ຽນທາດ, ພະຍາດອາດຍາສິດ, ແນວຄິດເອກະຊົນ, ສໍ້ລາດບັງຫລວງ, ຝ່າຝືນລ່ວງລະເມີດລະບຽບກົດໝາຍ ແລະ ປະກົດການອື່ນໆ. ທີ່ກໍາລັງປະກົດຂຶ້ນພາຍໃນພັກ. ບັ້ນດໍາເນີນຊີວິດການເມືອງ ຄັ້ງນີ້ ແມ່ນຮັບຟັງການເຜີຍ ແຜ່ຄໍາສັ່ງວ່າດ້ວຍ: ການດຳເນີນ ຊີວິດການເມືອງປັບປຸງປົວແປງທົ່ວພັກຂອງກົມການເມືອງ ສູນກາງພັກ ສະບັບເລກທີ 01/ກມສພ, ເຊື່ອມຊຶມເອກະສານເດັດດ່ຽວປັບປຸງປົວແປງພັກໃຫ້ປອດໃສ, ເຂັ້ມແຂງ ແລະໜັກແໜ້ນ, ຮັບຟັງການແນະນໍາການຂຽນບົດສໍາຫຼວດຕົນເອງ, ເປີດກວ້າງໃຫ້ຕໍານິສົ່ງຂ່າວ ແລະ ທາບທາມລົງຄະແນນສຽງຄວາມເຊື່ອໜັ້ນໄວ້ວາງໃຈ ຕໍ່ຄະນະໜ່ວຍພັກ, ຫົວໜ້າຫົວການ, ຮອງຫ້ອງການ, ຫົວໜ້າໜ່ວຍງານ ແລະ ຮອງໜ່ວຍງານ. ດຳເນີນການສໍາຫຼວດກວດກາ ໃນຄະນະໜ່ວຍ, ສະມາຊິກພັກ ແລະ ລັດຖະກອນຜູ້ມີຕໍາແໜ່ງບໍລິຫານ ເຊິ່ງໄດ້ແບ່ງຈຸດໍາເນີນການ ສໍາຫຼວດອອກເປັນແຕ່ລະຂົງເຂດ ໂດຍມີຄະນະປະຈໍາພັກເມືອງຜູ້ຊີ້ນໍາໃນແຕ່ລະຂົງເຂດ ເປັນຜູ້ຮັບຜິດຊອບ ແລະ ຊີ້ນໍາການສໍາຫຼວດ.
Editor: ດາວໄຊ ສີວິໄລ
